पानटपरीवाल्याकडून 300 रुपये हप्ता, सिगारेटची पाकीटेही घेतली; खराडीतील पोलीस तडकाफडकी निलंबित

पानटपरीचालकाकडून ३०० रुपयांचा हप्ता घेतल्याप्रकरणी पुण्यातील खराडी पोलिस ठाण्यातील पोलिस कर्मचाऱ्याला तडकाफडकी निलंबित करण्यात आले आहे. पोलिस शिपाई आकाश मुळे असे निलंबित करण्यात आलेल्या कर्मचाऱ्याचे नाव आहे.

• पानटपरीवाल्याकडून ३०० रुपये हप्ता
• सिगारेटची पाकीटेही घेतली
• खराडीतील पोलीस तडकाफडकी निलंबित

पुणे : पुण्यातून एक मोठी बातमी समोर आली आहे. पानटपरीचालकाकडून ३०० रुपयांचा हप्ता घेतल्याप्रकरणी पुण्यातील खराडी पोलिस ठाण्यातील पोलिस कर्मचाऱ्याला तडकाफडकी निलंबित करण्यात आले आहे. ५०० रुपयांची मागणी करून चालकाकडून ३०० रुपये घेऊन नंतर २०० रुपये द्यावे असे सांगण्यात आल्याचेही चौकशीनंतर समोर आले आहे. पोलिस शिपाई आकाश मुळे असे निलंबित करण्यात आलेल्या कर्मचाऱ्याचे नाव आहे. पानटपरीचालकाकडून पैसे घेतल्यामुळे मोठी खडबळ उडाली आहे. यामुळे पोलिस दलाची प्रतिमा मलिन झाल्याचे निरीक्षण निलंबन आदेशात नोंदविण्यात आले आहे.

पोलिस शिपाई आकाश मुळे हे खराडी पोलिस ठाण्यात कार्यरत आहेत. त्यांना रात्रपाळी ड्युटी होती. तेव्हा त्यांना अनधिकृत आस्थापनांवर पानटपरी तसेच स्टॉल यांच्यावर रात्री दहा ते पहाटे पाचपर्यंत सुरू असल्यास कारवाई करण्याची जबाबदारी दिली होती. यादरम्यान झेन्सॉर रस्त्यावरील स्मोक शॉप उघडे असताना आकाश मुळे हे त्याठिकाणी सव्वा बाराच्या सुमारास तेथे गेले. त्यांनी संबंधित पानटपरीचालकाला सिगारेट विकताना पकडले. त्यांच्याकडील सर्व सिगारेट पिशवीत घालून संबंधित टपरी चालकाला घेऊन ते येत असताना वाटेतच आकाश मुळे यांनी त्यांना सुरुवातीला ५०० रुपये महिना द्यावा लागेल, असे सांगितले. तसेच, आता किती देऊ शकतो अशी विचारणा देखील केली. त्यावरून चालकाने त्यांना ३०० रुपये देतो आणि नंतर २०० रुपये, देतो असे सांगितले. तेव्हा आकाश मुळे यांनी ३०० रुपये घेऊन चालकाला सोडून दिले.

हे सुद्धा वाचा : पुरंदर विमानतळाच्या जागेत बदल करताना कोणते निकष लावले? मुंबई उच्च न्यायालयाचे सरकारला स्पष्टीकरण देण्याचे निर्देश

महिला अधिकाऱ्यांकडून कारवाई

दरम्यान, रात्रगस्तीवरील महिला पोलिस अधिकाऱ्यांना हा प्रकार समजल्यानंतर त्यांनी याबाबत पानटपरी चालकाला बोलवून त्याचा जबाब नोंदवला. तेव्हा त्याने सर्व घटना सांगितली. त्यानंतर त्यांनी हा प्रकार वरिष्ठांच्या कानावर घातला. परिमंडळ सातचे पोलिस उपायुक्त अबिनाश कुमार यांनी तडकाफडकी पोलिस शिपाई आकाश मुळे यांना पोलिस खात्यातून निलंबित केले आहे.

हे सुद्धा वाचा : पुण्यात डीजेविरोधात आवाज उठवणाऱ्या विद्यानंद बापट यांना मारहाण; टिळक रस्त्यावर हल्ला