डॉक्टरांच्या निष्काळजीपणाचा कळस! सिझेरियननंतर महिलेच्या पोटात सर्जिकल ग्लोव्हज अन् पेपर नॅपकिन

पुण्यात डॉक्टरांच्या कथित हलगर्जीपणाचा धक्कादायक प्रकार समोर आला आहे. सिझेरियन ऑपरेशननंतर महिलेच्या पोटात सर्जिकल ग्लोव्हज आणि पेपर नॅपकिनचा तुकडा राहिल्याचा आरोप आहे. काही दिवसांनंतर त्रास वाढल्यानंतर हा प्रकार समोर आला. या घटनेमुळे वैद्यकीय निष्काळजीपणाचा गंभीर प्रश्न उपस्थित झाला आहे.

• संध्या सूरज गायकवाड यांची १ ऑगस्ट रोजी प्रसूती झाली.
• डिस्चार्जनंतर उलट्या आणि पोटदुखीचा त्रास सुरू झाला.
• त्रास वाढल्यानंतर वडवणी, बीड आणि पुण्यातील रुग्णालयांमध्ये उपचारासाठी धाव.
• ससून रुग्णालयात दाखल केल्यानंतर पोटात मोठ्या प्रमाणात संसर्ग आढळला.
• रुग्णावर आतापर्यंत दोनदा ऑपरेशन करण्यात आले.
• संसर्ग झालेल्या आतड्याचा काही भाग काढण्यात आला.
• सध्या संध्या गायकवाड ICU मध्ये उपचार घेत आहेत.

पुणे : बीड जिल्ह्यात एक भयानक घटना घडली. एका डॉक्टरच्या हलगर्जीपणामुळे महिलेचं सीझेरियन केल्यानंतर पोटात सर्जिकल ग्लोव्हज आणि पेपर नॅपकिनचा तुकडा आतमध्ये राहिल्यामुळे त्यांची प्रकृती चिंताजनक असल्याचं समोर आलं आहे. १ ऑगस्टला रुग्ण संध्या सूरज गायकवाड यांची प्रसूती झाली. त्यानंतर त्यांना हॉस्पिटलमधून डिस्चार्ज देण्यात आला.

घरी आल्यानंतर त्यांना पुन्हा उलट्या आणि पोटदुखी सुरू झाली, म्हणून त्यांनी पुन्हा हॉस्पिटलमध्ये धाव घेतली. त्रास वाढल्यामुळे कुटुंबीयांनी वडवणी, बीड, पुण्यातील रुग्णालयांमध्ये धाव घेतली. अखेर त्यांना ससून रुग्णालयात दाखल केल्यानंतर पोटात मोठ्या प्रमाणात संसर्ग आढळला. त्यांच्या कुटुंबाचं असं म्हणणं आहे की, ऑपरेशन करताना रुग्णाच्या पोटात ग्लोव्हज आणि पेपर नॅपकिनचा तुकडा राहिल्याने तिला इन्फेक्शन झालं आहे.

रुग्णाचे त्यानंतर दोनदा ऑपरेशन झाले, पण तिच्यात काही सुधारणा दिसत नाही आहे. उलट तिची प्रकृती अजून गंभीर होताना दिसत आहे. संसर्ग झालेल्या काही आतड्यांचा भाग काढण्यात आला आहे. सध्या त्या ICU मध्ये आहेत. दोषी डॉक्टरवर कारवाई झाली पाहिजे, अशी मागणी त्यांचे पती सूरज गायकवाड यांनी केली आहे. आमची परिस्थिती फारच गरीब असल्यामुळे हॉस्पिटलचा खर्च आम्हाला परवडणारा नाही, पण माझ्या बायकोचा जीव वाचवा, म्हणून ते मदतीची याचना करत आहेत.