भोर तालुक्यात 26 ग्रामपंचायतींमध्ये रणधुमाळी; पोटनिवडणुकीसाठी राजकीय हालचालींना वेग

भोर तालुक्यातील २६ ग्रामपंचायतींमधील रिक्त जागांसाठी पोटनिवडणुकीचा बिगुल वाजला असून, राजकीय वातावरण तापू लागले आहे. ९ थेट सरपंच पदे आणि ३४ सदस्यपदे अशा एकूण ४३ जागांसाठी ही निवडणूक होत आहे.

भोर : भोर तालुक्यातील २६ ग्रामपंचायतींमधील रिक्त जागांसाठी पोटनिवडणुकीचा बिगुल वाजला असून, राजकीय वातावरण तापू लागले आहे. ९ थेट सरपंच पदे आणि ३४ सदस्यपदे अशा एकूण ४३ जागांसाठी ही निवडणूक होत आहे. मंगळवार (दि. ७) पासून अर्ज भरण्यास सुरुवात झाली असली, तरी पहिल्या दोन दिवसांत एकही अर्ज दाखल झालेला नाही. यामुळे राजकीय वर्तुळात सध्या ‘शांतता’ असली तरी पडद्यामागे मात्र रणनीती आखली जात असल्याचे चित्र आहे.

 

भोर तालुक्यातील आपटी, करंदी खुर्द, कोळवडी, खडकी, परहर बुद्रुक, रावडी, शिरवली, सोणवडी आणि वाढाणे या ९ ग्रामपंचायतींमध्ये थेट सरपंचपदासाठी निवडणूक होत असून, चुरशीची लढत होण्याची शक्यता जाणकारांकडून वर्तवली जात आहे. तहसीलदार राजेंद्र नजन, गटविकास अधिकारी चंद्रकांत विपट आणि निवासी नायब तहसीलदार अरुण कदम यांनी निवडणूक प्रक्रियेची तयारी पूर्ण झाल्याची माहिती दिली. निवडणूक ही प्रामुख्याने अंगसुळे, आंबेघर, आपटी, करंजे, करंदी खुर्द, कांबरे खे.बा., कासुर्डी गु. मा., कुंबळे, कोर्ले, कोळवडी, खडकी, तेलवडी, परहर बुद्रुक, बसरापूर, म्हाकोशी, रावडी, वडतुंबी, वाढाणे, वारखंड, शिरगाव, शिरवली, सांगवी, सांगवी बुद्रुक, सांगवी हि.मा.,साळव आणि सोनवडी. या गावांसाठी होणार आहे.

झेडपी व पंचायत समिती निवडणुकीनंतर पुन्हा धुमशान

नुकत्याच पार पडलेल्या जिल्हा परिषद आणि पंचायत समिती निवडणुकीची धूळ खाली बसते न बसते, तोच आता ग्रामपंचायतीच्या निवडणुका जाहीर झाल्या आहेत. यामुळे तालुक्यातील राजकीय वारे पुन्हा वेगाने वाहू लागले आहेत. झेडपी निवडणुकीत कोणत्या गावात कोणाला मताधिक्य मिळाले, याचा आढावा घेऊन दिग्गज नेते आता पोटनिवडणुकीसाठी व्यूहरचना आखत आहेत. रिक्त जागी प्रबळ आणि सर्वसमावेशक उमेदवार देण्यासाठी गावागावांत बैठकांचे सत्र सुरू झाले आहे. पहिल्या दोन दिवसांत अर्ज आले नसले, तरी शेवटच्या दोन दिवसांत अर्जांचा ओघ वाढण्याची शक्यता प्रशासनाकडून वर्तवण्यात येत आहे.

असा आहे निवडणूक कार्यक्रम

अर्ज भरण्यासाठी : ७ ते १३ एप्रिल

अर्ज छाननी १५ एप्रिल

अर्ज मागे घेण्याची मुदत : १७ एप्रिल (दुपारी ३ वाजेपर्यंत).

चिन्ह वाटप : १७ एप्रिल (दुपारी ३ नंतर).

मतदान : २८ एप्रिल सकाळी ७:३० ते ५:३०.

निकाल : २९ एप्रिल.