गुरुवार, 17 सप्टेंबर 2026
प्रसिद्ध युट्यूबर संतोष पंडित यांना जामीन मंजूर; पुणे सत्र न्यायालयाचा निकाल (File Photo : Santosh Pandit)
पुणे : महाराष्ट्राचे मंत्री चंद्रकांत पाटील आणि पुणे महानगरपालिकेच्या एका महिला नगरसेविकेविरुद्ध आक्षेपार्ह वक्तव्य केल्याच्या आरोपाखाली पुणे सत्र न्यायालयाने युट्युबर संतोष पंडित यांना जामीन मंजूर केला आहे. न्यायालयाने पंडित यांना 25000 रुपयांच्या वैयक्तिक जामीनपत्रावर जामीन मंजूर केला आहे.
मंत्री चंद्रकांत पाटील आणि महानगरपालिकेच्या एका महिला नगरसेविकेविरुद्ध आक्षेपार्ह वक्तव्य केल्याचा पंडितवर आरोप आहे. याप्रकरणी त्याच्याविरुद्ध पोलिसात तक्रार दाखल करण्यात आली होती आणि कारवाईही करण्यात आली होती. जामीन मंजूर करताना न्यायालयाने पंडितवर काही अटीही घातल्या आहेत. या प्रकरणाच्या पुढील सुनावणीदरम्यान या अटींचे पालन करणे बंधनकारक असेल.
उच्च आणि तंत्रशिक्षण मंत्री चंद्रकांत पाटील यांच्याविषयी अवमानकारक वक्तव्य करणारी चित्रफीत सोशल मीडियावर व्हायरल करण्यात आल्याचा प्रकार उघडकीस आला आहे. याप्रकरणी डेक्कन पोलिसांकडून दोघांविरुद्ध गुन्हा दाखल केला आहे. याबाबत भारतीय जनता पक्षाचे नगरसेवक सुनील पांडे (वय ५६, रा. भांडारकर रस्ता, डेक्कन जिमखाना) यांनी डेक्कन पोलिस ठाण्यात तक्रार दिली आहे. याप्रकरणी संतोष पंडीत याच्यासह दोघांवर गुन्हा दाखल करण्यात आला आहे.
कोण आहे संतोष पंडित?
संतोष पंडित हे पुणेकर असून, सोशल मीडियावर ते व्हिडिओ पोस्ट करुन भूमिका मांडत असतात. रस्ते आणि महापालिकेच्या कारभारावर टीका करणाऱ्यांमध्ये ते अग्रेसर असतात. ते स्वतःचा उल्लेख ‘नागरिक पत्रकार’ असा करतात. रस्त्यांवरील खड्डे आणि अन्य समस्यांवर ते आपल्या पद्धतीने टीका करतात. काही वेळा ते अतिरेक करत असल्याने त्यातून ते अडचणीतही आले आहेत.
पत्रकारांनाही विचारला होता प्रश्न
टिळक रोडवरील ग्राहक पेठेसमोर संगीता तिवारी यांच्या ‘गुलाबो गँग’च्या वतीने भोंदू अशोक खरात याच्याविरुद्ध आंदोलन करण्यात आले होते. यावेळी वृत्तांकनासाठी काही पत्रकारही उपस्थित होते. तेथून जात असलेल्या संतोष पंडित यांनी ‘तुमच्यामुळे वाहतूक कोंडी होत आहे,’ असे सांगितले. त्यानंतर त्यांनी वाहतूक कोंडीचा व्हिडिओ बनवला. तेथे उपस्थित असलेल्या महिला पत्रकार आणि आंदोलनकर्त्या महिलांवर त्यांनी अत्यंत अर्वाच्च भाषेत टीका करण्यास सुरुवात केली.
