४ ते ९ डिसेंबरदरम्यान रोहित पवारांचा ट्रॅक्टर मोर्चा (Photo - X)
मुंबई : राज्यातील दुष्काळी परिस्थिती आणि शेतकऱ्यांच्या प्रश्नांवरून राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी राज्य सरकारविरोधात आक्रमक भूमिका घेतली आहे. शेतकऱ्यांच्या मागण्यांवर सरकारकडून ठोस घोषणा होत नसल्याचा आरोप करत त्यांनी थेट आंदोलनाची घोषणा केली आहे. येत्या ४ डिसेंबर ते ९ डिसेंबरदरम्यान शेगाव ते नागपूर असा न्यायहक्क ट्रॅक्टर मोर्चा काढण्यात येणार असून हा मोर्चा थेट विधानसभा अधिवेशनापर्यंत धडकणार आहे. (Rohit Pawar)
विदर्भातील पदाधिकारी आणि प्रमुख नेत्यांच्या उपस्थितीत झालेल्या बैठकीनंतर रोहित पवार यांनी ही घोषणा केली. शरद पवार यांच्या मार्गदर्शनाखाली राज्यातील शेतकरी आणि शेतमजुरांच्या भेटी घेऊन त्यांच्या अडचणी समजून घेतल्याचं त्यांनी सांगितलं. यानंतर शरद पवार यांनी मुख्यमंत्र्यांना पत्रही लिहिलं. मात्र, तरीही सरकारकडून शेतकऱ्यांसाठी कोणतीही ठोस घोषणा झालेली नाही, असा आरोप रोहित पवार यांनी केला.
रोहित पवार यांनी शेतकरी आणि शेतमजुरांसाठी अनेक मागण्या मांडल्या आहेत. शेतकऱ्यांना हेक्टरी एक लाख रुपये, तर भूमिहीन शेतमजुरांना २५ हजार रुपयांची मदत देण्यात यावी, अशी त्यांची मागणी आहे. फळबागांसाठी प्रति हेक्टर दीड लाख रुपये आणि फळबागा जगवण्यासाठी ६० हजार रुपयांची अतिरिक्त मदत द्यावी, अशीही मागणी करण्यात आली आहे.
Harshwardhan Sapkal : ‘इतके दिवस झोपले होते का?’ सुनील तटकरेंवर हर्षवर्धन सपकाळांचा घणाघात
याशिवाय एक रुपयात पीकविमा योजना पुन्हा सुरू करावी, मायक्रो फायनान्स कंपन्यांची वसुली थांबवावी आणि दुष्काळी भागात तातडीने चारा छावण्या सुरू कराव्यात, असे मुद्देही त्यांनी मांडले.
यंदाच्या दुष्काळी परिस्थितीवर बोलताना रोहित पवार यांनी रब्बीच्या पेरणीचा मुद्दा उपस्थित केला. त्यांच्या दाव्यानुसार, यंदा रब्बीची पेरणी केवळ १७ टक्क्यांवर म्हणजे १५ ते १६ लाख हेक्टरवर झाली आहे. १९७२ च्या दुष्काळातही ४७ लाख हेक्टरवर पेरणी झाली होती, असं सांगत त्यांनी यंदाच्या परिस्थितीचं गांभीर्य अधोरेखित केलं. सरकार केवळ मदतीच्या घोषणा करण्यात व्यस्त असल्याचा आरोपही त्यांनी केला.
आता ४ ते ९ डिसेंबरदरम्यान निघणाऱ्या या मोर्चातून शेतकऱ्यांचे प्रश्न थेट नागपूरच्या अधिवेशनात मांडले जाणार आहेत. त्यामुळे या आंदोलनाला सरकार कसा प्रतिसाद देणार, याकडे राज्यातील शेतकरी आणि राजकीय वर्तुळाचं लक्ष लागलं आहे.
Satara News : माण तालुक्यात चारा छावण्यांसाठी शेतकरी रस्त्यावर! बिजवडीत २३ नोव्हेंबरला रास्ता रोको






