नगरपंचायतीच्या नोटिशीला ठेकेदाराची केराची टोपली! इंद्रायणी नदीपात्रातील राडारोडा अद्यापही कायम

भामा आसखेड जलवाहिनी प्रकल्पाचे काम करताना इंद्रायणी नदीपात्रात टाकण्यात आलेला राडारोडा अद्याप हटविण्यात आलेला नसल्याचे उघड झाले आहे. नदीपात्र पूर्ववत करण्यासाठी प्रशासन पुढाकार घेणार का, याकडे देहूगावमधील नागरिक आणि येलवाडी परिसरातील शेतकऱ्यांचे लक्ष लागले आहे.

• इंद्रायणी नदीपात्रातील राडारोडा अद्याप हटवलेला नाही
• देहू नगरपंचायतीची जावळे कन्स्ट्रक्शनला नोटीस
• येलवाडीतील शेतकऱ्यांचे नुकसान होत असल्याची तक्रार

देहूगाव : भामा आसखेड जलवाहिनी प्रकल्पाचे काम करताना इंद्रायणी नदीपात्रात टाकण्यात आलेला राडारोडा अद्याप हटविण्यात आलेला नसल्याचे उघड झाले आहे. देहू नगरपंचायतीने संबंधित जावळे कन्स्ट्रक्शनला राडारोडा हटवून नदीपात्र पूर्ववत करण्याची नोटीस बजावली होती. मात्र, त्यानंतरही नदीपात्रातील राडारोडा कायम असल्याचे सध्या नदीचे पाणी आटल्याने दिसून येत आहे. त्यामुळे संबंधित ठेकेदारावर नगरपंचायतीने कारवाई करावी, अशी मागणी नागरिकांकडून होत आहे.

 

देहू नगरपंचायत हद्दीतील साई चौक ते वडाचा माळदरम्यान असलेल्या पुलाजवळ भामा आसखेड जलवाहिनी प्रकल्पांतर्गत पाइपलाइन टाकण्याचे काम जावळे कन्स्ट्रक्शनला देण्यात आले होते. हे काम सुरू असताना नदीपात्रात मोठ्या प्रमाणावर माती, गोटे आणि मुरूम टाकण्यात आला होता. तसेच, जेसीबीच्या साहाय्याने नदीपात्रात खोलवर खोदकाम करण्यात आले होते.

पाइपलाइन टाकण्याचे काम पूर्ण झाल्यानंतर नदीपात्रात टाकलेला राडारोडा आणि बांधकामातील अवशेष पूर्णपणे हटविणे आवश्यक होते. मात्र, संबंधित ठेकेदाराने केवळ काही प्रमाणात माती काढून तिचे ढीग नदीकाठावर ठेवले. नदीपात्रातील संपूर्ण माती आणि अन्य अवशेष हटविण्यात आले नसल्याचा आरोप होत आहे. त्यामुळे नदीचे पाणी आटल्यावर नदीपात्रातील राडारोडा उघडपणे दिसू लागला आहे.

नदीच्या प्रवाहात बदल; शेतकऱ्यांचे नुकसान

नदीपात्रात टाकण्यात आलेल्या राडारोड्यामुळे इंद्रायणी नदीच्या नैसर्गिक प्रवाहात बदल होत असल्याचे स्थानिकांकडून सांगण्यात येत आहे. परिणामी, येलवाडी परिसरातील शेतजमिनीत पाणी शिरत असल्याने शेतकऱ्यांचे नुकसान होत असल्याची तक्रार आहे. जून महिन्यात झालेल्या अतिवृष्टीमुळे इंद्रायणी नदीला महापूर आला होता. या पुराच्या पाण्यामुळे नदीकाठावर टाकलेली माती पुन्हा वाहून नदीपात्रात मिसळल्याचेही दिसून आले. त्यामुळे नदीपात्रातील राडारोडा हटविण्याचा प्रश्न अधिक गंभीर बनला आहे.

ठेकेदाराला दोन दिवसांची मुदत

इंद्रायणी नदीपात्रातील राडारोडा, बांधकाम साहित्य आणि अन्य अवशेष तातडीने हटवून नदीपात्र स्वच्छ करण्याचे निर्देश देहू नगरपंचायतीने संबंधित ठेकेदाराला २४ जून २०२६ रोजी नोटीसद्वारे दिले होते. नोटीस मिळाल्यापासून दोन दिवसांच्या आत काम पूर्ण करून, केलेल्या कार्यवाहीचा अनुपालन अहवाल छायाचित्रांसह नगरपंचायतीकडे सादर करण्याचे आदेशही देण्यात आले होते.

नदीपात्रातील राडारोडा आणि बांधकाम साहित्य अद्याप हटविण्यात आले नसल्याने नदीच्या नैसर्गिक प्रवाहात अडथळा निर्माण होण्याची शक्यता नगरपंचायतीने नोटिशीत नमूद केली होती. नदीपात्रातील सर्व अवशेष हटवून ते पूर्ववत करणे ही संबंधित ठेकेदाराची जबाबदारी असल्याचेही स्पष्ट करण्यात आले होते. मात्र, नोटीसीला ठेकेदाराने केराची टोपली दाखवल्याचे दिसून येत आहे. नदीपात्रातील राडारोडा अद्याप कायम असल्याचे प्रत्यक्ष परिस्थितीवरून दिसत आहे.

हे सुद्धा वाचा : पुण्यात डेंग्यूचा प्रसार रोखण्यासाठी महापालिका प्रशासन सतर्क; बांधकामस्थळांना बजावण्यात आल्या नोटिसा

प्रशासनाच्या कारवाईकडे नागरीकांचे लक्ष

इंद्रायणी नदीचे नैसर्गिक पात्र आणि जलप्रवाह अबाधित ठेवण्यासाठी नदीपात्रातील राडारोडा तातडीने हटविणे गरजेचे आहे. त्यामुळे नोटिशीतील निर्देशांचे पालन न झाल्यास संबंधित ठेकेदारावर नगरपंचायत कोणती कारवाई करणार, तसेच नदीपात्र पूर्ववत करण्यासाठी प्रशासन पुढाकार घेणार का, याकडे देहूगावमधील नागरिक आणि येलवाडी परिसरातील शेतकऱ्यांचे लक्ष लागले आहे.