पुण्यात फरासखाना, विश्रामबाग पोलिसांची जागा दगडूशेठ ट्रस्टला
पुणे : श्रीमंत दगडूशेठ हलवाई गणपती मंदिराच्या विस्तारासाठी फरासखाना, विश्रामबाग पोलिस ठाण्याची जागा ट्रस्टला हस्तांतरित करण्यास सहमती दर्शवली असून, पुणे पोलिसांनी याला तत्त्वतः ‘ना हरकत’ दिले आहे. मात्र, त्यासाठी नवीन आधुनिक पोलिस संकुल उभारणे, सर्व पोलिस कार्यालयांचे स्थलांतर करणे आणि त्यानंतरच या जागेचा ताबा ट्रस्टकडे देणे अशा महत्त्वाच्या अटी घालण्यात आल्या आहेत.
पोलिस आयुक्त अमितेश कुमार यांनी अपर मुख्य गृह सचिवांकडे नुकताच सविस्तर प्रस्ताव सादर केला आहे. वाढती भाविक संख्या, सुरक्षेची गरज यादृष्टीने ट्रस्टने ही जागा शासनाकडे मागितली होती. १९७६-७७ पासून दगडूशेठ मंदिरालगत या इमारती आहेत. प्रस्तावानुसार, विद्यमान पोलिस इमारतीऐवजी बुधवार पेठेतील महापालिकेची सिटी सर्व्हे क्रमांक १११२ व १११३ मधील सुमारे ७५९.२० चौरस मीटर जागा असून ३.५ एफएसआयमुळे सुमारे २८,६२१ चौरस फूट बांधकाम करता येणार आहे.
सध्याची जागा ८६३.७० चौरस मीटर असून, विद्यमान इमारतीचे एकूण बांधकामक्षेत्र सुमारे २२ हजार चौरस फूट आहे. या जागेवर फरासखाना व विश्रामबाग पोलिस ठाणे, वाहतूक चौकी तसेच वरिष्ठ पोलिस अधिकाऱ्यांच्या कार्यालयांसाठी आधुनिक सुविधांनी सुसज्ज नवे पोलिस संकुल उभारण्यात यावे. विद्यमान शासकीय जागेची किंमत ट्रस्टने शासनाला द्यावी, अशी अटही प्रस्तावात नमूद करण्यात आली आहे.
नवीन संकुलानंतरच जागेचा ताबा
नवीन पोलिस संकुल पूर्ण होऊन सर्व कार्यालये तेथे स्थलांतरित होईपर्यंत विद्यमान पोलिस इमारतीतच सर्व कामकाज सुरू राहणार आहे. पर्यायी जागा उपलब्ध नसल्याने कोणतेही कार्यालय तत्काळ हलवण्यात येणार नाही. नवीन संकुल तयार झाल्यानंतरच विद्यमान इमारतीचा ताबा दगडूशेठ ट्रस्टकडे सुपूर्द केला जाईल. वाढत्या कामकाजाच्या तुलनेत उपलब्ध जागा अपुरी पडत असल्याने आधुनिक पोलिस संकुलाची गरज या प्रस्तावात अधोरेखित करण्यात आली आहे.
Pune News : धर्मांतराच्या आरोपप्रकरणी ब्रिटिश धर्मगुरू देवनूर यांना अटकपूर्व जामीन
.png "Videos"){kind=small}
