लोणावळा: नवर्षाच्या स्वागतासाठी आणि सरत्या वर्षाला निरोप देण्यासाठी पर्यटकांचे आकर्षण लोणावळा- खंडाळा येथील पर्यटनस्थळासह मावळातील विविध पर्यटनस्थळी पर्यटकांनी सायंकाळी ठीकठाक गर्दी केली होती. नववर्षाच्या पार्श्वभूमीवर पर्यटननगरी लोणावळा-खंडाळा पर्यटकांच्या स्वागतासाठी सज्ज झाली होती, मात्र ओमायक्रोन विषाणू प्रसाराच्या पार्श्वभूमीवर लागू करण्यात आलेले निर्बंध आणि पोलीसांच्या कडक बंदोबस्ताच्या धास्तीमुळे पर्यटकांची संख्या मोठया प्रमाणात घटल्याचे चित्र होते. यामुळे लोणावळ्यातील विविध व्यावसायिकायिकासह हॉटेल व्यावसायिकांचा मोठा हिरमोड झाला.
सर्व ऋतूत पर्यटनासाठी नावलौकिक असणाऱ्या लोणावळा-खंडाळा या पर्यटन स्थळासह मावळातील विविध पर्यटनस्थळे पर्यटकांची आकर्षण ठरत आहे. या पर्यटनस्थळाना भेट देण्यासाठी दरवर्षी लाखो पर्यटक येतात. पावसाळा, हिवाळा आणि उन्हाळ्यातही पर्यटकांचा ओघ कायम असतो. मागील काही वर्षापासून नवीन वर्षाच्या पूर्वसंध्येला (थर्टीफस्ट) सरत्या वर्षाला निरोप देत आणि नवीन वर्षाचे स्वागत धुमधडाक्यात करण्याची मोठी क्रेज नागरिकांमध्ये निर्माण झाली आहे. यामुळे लोणावळा खंडाळा यासारख्या पर्यटन स्थळांना नागरिक प्राधान्य देत असतात. मात्र मागील दोन वर्षांपासून कोरोनामुळे लागलेले लॉक डाऊन आणि विविध निर्बंध यामुळे नागरिक बाहेर पडण्यास कचरू लागले आहे.
लोणावळ्यातील पर्यटकांची आकर्षण असलेल्या टायगर, लायन्स व राजमाची ह्या पॉइंट्सह कार्ला, भाजे लेणी, पवना, भुशी, लोणावळा, तुंगारली हि जलाशय परिसर आणि लोहगड, विसापूर, तुंग, तिकोना, राजमाची व कोराईगड या गड किल्ले परिरात मोठ्याप्रमाणात पर्यटकांच्या संख्येत घट झाल्याचे चित्र होते. असेच चित्र मावळातील इतर ठिकाणी होते. कोरोनाचे निर्बंध हटवल्याने यावेळी पर्यटक मोठ्याप्रमाणात येतील या आशेने व्यवसायिकांनी जोरदार तयारी केली होती. मात्र ओमायक्रोन मुळे लागू करण्यात आलेल्या निर्बंधांमुळे पर्यटकांचा थंड प्रतिसाद बघायला मिळाला आणि त्यामुळे व्यावसायिकांची साफ निराशा झाली. एकूणच पर्यटकांच्या अल्पप्रतिसादाने लोणावळा खंडाळा आणि मावळातील सर्वच व्यावसायिकांवर संक्रात ओढवली आहे.
