सौजन्य फोटो-सोशल मिडीया
दोन दिवसांपूर्वी झालेल्या महापालिकेच्या मुख्य सभेत फर्ग्युसन रस्त्यावरील अतिक्रमणांच्या मुद्द्यावरून सत्ताधारी भाजपच्याच नगरसेवकांनी आंदोलन करत प्रशासनाला धारेवर धरले होते. या सभेत प्रशासनावर हप्तेखोरीचे गंभीर आरोपही करण्यात आले होते. या घडामोडींनंतर आयुक्त नवल किशोर राम यांनी स्वतः मैदानात उतरून कारवाईचा धडाका सुरू केला. फर्ग्युसन रस्त्यापाठोपाठ जंगली महाराज रस्ता, कोथरूड आणि शिवाजी रस्त्यावरही अतिक्रमणांवर कारवाई करण्यात आली. या पार्श्वभूमीवर आयोजित पत्रकार परिषदेत त्यांनी आगामी दोन महिन्यांच्या मोहिमेची सविस्तर रूपरेषा मांडली.
पत्रकार परिषदेत बोलताना नवल किशोर राम म्हणाले की, शहरात केवळ २२ हजार परवानाधारक पथारी व्यावसायिक असताना सुमारे अडीच ते तीन लाख अनधिकृत व्यावसायिक फ्रंट आणि साईड मार्जिनमध्ये व्यवसाय करत असल्याचा प्राथमिक अंदाज आहे. या जागा मोकळ्या झाल्यास वाहतूककोंडी कमी होण्याबरोबरच पादचाऱ्यांना सुरक्षितपणे चालता येईल.
तसेच अग्निशमन दलाच्या वाहनांच्या जलद हालचालींसाठीही या जागा मोकळ्या असणे गरजेचे असल्याचे त्यांनी नमूद केले. अनधिकृत ओटे, रेलिंग, बॅरिकेड्स, कॅनोपी हटवण्यात येतील आणि पुन्हा अतिक्रमण झाल्यास बांधकाम विभागामार्फत कठोर कारवाई केली जाईल. या मोहिमेसाठी अतिरिक्त जेसीबी, बुलडोझर आणि यंत्रसामग्रीसह १०० एमएसएफ जवानांची नियुक्ती करण्यात येणार असून, सुट्टीच्या दिवशीही कारवाई थांबणार नाही.
अतिक्रमण हटविताना कोणत्याही स्तरावरून दबाव आणला गेल्यास तो सहन केला जाणार नाही, असा ठाम इशारा आयुक्तांनी दिला. चुकीचे काम करण्यासाठी कोणी सूचना दिल्यास अधिकाऱ्यांनी ती मान्य करू नये आणि हस्तक्षेप करणाऱ्यांची नावे जाहीर करण्याचे निर्देश क्षेत्रीय व वरिष्ठ अधिकाऱ्यांना देण्यात आल्याचे त्यांनी स्पष्ट केले. गरीब किंवा श्रीमंत असा कोणताही भेदभाव न करता अतिक्रमण असेल तर ते हटवलेच जाईल, असेही ते म्हणाले.
पुण्यातील अतिक्रमणांवर यापूर्वी कारवाई का केली नाही, या प्रश्नावर स्पष्ट कबुली देत नवल किशोर राम म्हणाले की, यावर माझ्याकडे उत्तर नाही. यावेळी त्यांनी महात्मा गांधीजींच्या विचारांची आठवण करून देत म्हटले की, गांधीजी म्हणायचे आपण दररोज काहीतरी नवे शिकतो; मलाही पुण्यातील फ्रंट मार्जिनवरील अतिक्रमणांची समस्या सर्वांत मोठी असल्याचे आता समजले. दरम्यान, इतकी वर्षे अतिक्रमणांचा प्रश्न कायम असताना प्रशासनाला त्याचे गांभीर्य आताच का कळले, असा सवालही या निमित्ताने उपस्थित केला जात आहे.
Ans: पुणे महापालिकेकडून पुढील दोन महिने सलग अतिक्रमणविरोधी बुलडोझर मोहीम राबवली जाणार असून, सुट्टीच्या दिवशीही ही कारवाई सुरू राहणार आहे.
Ans: इमारतींच्या फ्रंट मार्जिन, साईड मार्जिन आणि पार्किंगच्या जागांमधील अनधिकृत व्यवसाय, ओटे, रेलिंग, बॅरिकेड्स आणि कॅनोपी यांवर प्रामुख्याने कारवाई केली जाणार आहे.
Ans: कोणताही दबाव सहन केला जाणार नसून, कारवाईत हस्तक्षेप करणाऱ्यांचे नाव आणि फोटो सार्वजनिक करण्याचे निर्देश अधिकाऱ्यांना देण्यात आले आहेत.






