Raigad News: खोपोली-पनवेल-बेलापूर मार्गावर प्रवाशांची गर्दी वाढली; एनएमएमटी बसफेऱ्या अपुऱ्या, विद्यार्थी आणि नोकरदारांचे हाल
खोपोली है औद्योगिक, शैक्षणिक आणि व्यावसायिकदृष्ट्या महत्त्वाचे शहर म्हणून विकसित होत आहे. खोपोली आणि परिसरातील अनेक नागरिक नोकरी, व्यवसाय, शिक्षण तसेच विविध कामानिमित्त दररोज पनवेल आणि बेलापूरकडे प्रवास करतात. विशेषतः महाविद्यालयीन विद्यार्थ्यांची संख्या मोठी असून, सकाळी आणि सायंकाळी प्रवासाच्या वेळेत बसमध्ये प्रचंड गर्दी होत असल्याचे चित्र पाहायला मिळते, एनएमएमटीच्या माध्यमातून खोपोली ते पनवेल आणि बेलापूर या मार्गावर बससेवा सुरू असल्याने नागरिकांना मोठा दिलासा मिळाला आहे. (फोटो सौजन्य – AI Created)
मात्र, प्रवाशांची वाढती संख्या लक्षात घेता सध्या उपलब्ध असलेल्या बसफेऱ्या पुरेशा ठरत नसल्याची वस्तुस्थिती आहे. अनेकदा बसमध्ये क्षमतेपेक्षा अधिक प्रवासी असल्याने काही प्रवाशांना बसमध्ये चढताही येत नाही. परिणामी पुढील बसची वाट पाहण्यात त्यांचा महत्त्वाचा वेळ खर्च होतो. याचा सर्वाधिक फटका विद्यार्थ्यांना आणि वेळेत कामावर पोहोचण्याची घाई असलेल्या नोकरदार वर्गाला बसत आहे.
विशेषतः महाविद्यालयीन विद्यार्थ्यांची संख्या मोठी असल्याने बसमध्ये जागा मिळविण्यासाठी विद्याथ्यांना मोठी कसरत करावी लागते. काही वेळा गर्दीमुळे विद्यार्थ्यांना बसमध्ये प्रवेश मिळत नाही, तर काहींना पुढील बसची प्रतीक्षा करावी लागते. त्यामुळे महाविद्यालयात वेळेवर पोहोचणे कठीण होत असून, शैक्षणिक कामकाजावरही त्याचा परिणाम होण्याची शक्यता आहे. त्याचप्रमाणे ज्येष्ठ नागरिक, महिला आणि लहान मुलांसह प्रवास करणाऱ्या प्रवाशांनाही गर्दीचा त्रास सहन करावा लागत आहे.






