आरोपीला ५ दिवसांची पोलिस कोठडी (फोटो- istockphoto)
पुणे: लहान मुलींवर अत्याचार झालेले बदलापूर प्रकरण ताजे असताना पुण्यामध्ये देखील असाच संतापजनक प्रकार घडला आहे. वानवडी भागातील एका नामांकित शाळेतील 8 वर्षांच्या दोन मुलींवर व्हॅनमध्ये व्हॅन चालकाने लैंगिक अत्याचार केल्याची घटना घडली आहे. यामुळे पुण्यामध्ये वातावरण तापले आहे. पालकांनी रोष व्यक्त केला असून या प्रकरणातील आरोपीला पोलिसांनी अटक केली आहे. दरम्यान आज आरोपीला अटक केल्यानंतर कोर्टात हजर करण्यात आले.
वानवडी अत्याचार प्रकरणातील आरोपीचे नाव संजय जेटींग रेड्डी (वय ४५, रा. वैदुवाडी, हडपसर) आहे. या आरोपीला पोलिसांनी अटक केली असून त्याला पळून जाण्यासाठी स्थानिक नेत्यांनी मदत केल्याचे समोर आले आहे. दरम्यान आरोपीला आज पोलिसांनी कोर्टात हजर केले. त्यानंतर कोर्टाने त्या आरोपीला ५ दिवसांची पोलिस कोठडी सुनावली आहे. आज पुणे कोर्टात हजर केल्यानंतर आरोपी न्यायाधीशांसामोर ढसाढसा रडला.
पुण्याच्या वानवडी भागात शाळेतील आठ वर्षांच्या मुलींवर व्हॅन चालकाने अत्याचार केल्याची धक्कादायक घटना घडली. आरोपी हा शाळेच्या स्कूल व्हॅनमध्ये काम करत होता. ४५ वर्षीय आरोपीने ६ वर्षांच्या चिमूकलीसह तिच्या मैत्रिणीवर ४ दिवस अत्याचार करण्यात येत होता. स्कूल बसमध्ये आरोपी त्या लहान मुलीना पुढील सीटवर बसवायचा. त्या ठिकाणी त्यांच्यासोबत तो अश्लील चले करत असे. हा प्रकार कुठे सांगू नये यासाठी चिमूकलीला धमकी द्यायचा. मात्र मुलीला त्रास होऊ लागल्यावर तिने घरी सांगितले आणि हा प्रकार उघडकीस आला. दरम्यान पुणे कोर्टाने या नराधमाला ५ दिवसांची पोलिस कोठडी सुनावली आहे.
या दुर्दैवी घटनेवर गृहमंत्र्यांचे भाष्य
देवेंद्र फडणवीस म्हणाले की, “पोलिसांच्या प्राथमिक चौकशीत असे लक्षात आले आहे की, स्थानिक काही नेत्यांनी त्याला पळून जाण्यात मदत केलेली आहे. अशा प्रकारच्या घटनांमध्ये मी काही राजकीय पक्ष वैगरे बघत नाही. आरोपी हा आरोपीच असतो. अशा आरोपीवर कडक कारवाई केली जाईल. तसेच आरोपीला मदत करणाऱ्यांवरही कारवाईचा बडगा उगारण्यात येईल, असे आश्वासन फडणवीस यांनी दिले आहे.
