अतिवृष्टीमुळे यंदाचा द्राक्ष हंगाम वाया; नवीन द्राक्ष बागा उभारणीसाठी आंबेगाव तालुक्यातील शेतकऱ्यांकडून पॅकेजची मागणी
द्राक्ष उत्पादकांना दिलासा देण्यासाठी शासनाने दीर्घ मुदतीच्या कर्जावरील व्याज माफ करावे. पीक कर्ज मार्च अखेर वसूल न करता एक वर्षांची मुदतवाढ मिळावी, तसेच नवीन द्राक्ष बागा उभारणीसाठी पॅकेज जाहीर करावे, अशी मागणी तालुक्यातील द्राक्ष उत्पादकांनी उपमुख्यमंत्री अजित पवार यांच्याकडे केली आहे.
आंबेगाव तालुक्यात जवळजवळ ५०० एकर क्षेत्र द्राक्ष लागवड झाली आहे. जम्बो जातीच्या द्राक्ष निर्यातीत पुणे जिल्ह्यात आआंबेगाव आणि जुन्नर तालुका अग्रेसर समजला जातो, अन्य फळबागाच्या तुलनेत द्राक्ष पिकाचा खर्च हा अधिक असतो.द्राक्ष पीक वार्षिक असल्याने वर्षभर बागेच्या संगोपनासाठी खर्च करावा लागतो. घड निर्मिती पूर्वी दोन लाख आणि घड निर्मिती झाल्यानंतर पुढील चार महिन्यांत दोन लाख रुपये असा एकरी चार लाख रुपये द्राक्ष बागेला खर्च येतो. नवीन द्राक्षबाग उभारण्यासाठी सुमारे नऊ लाख रुपये खर्च येतो. द्राक्ष निर्यातीतून पैसे मिळवून देणारे हे पीक हवामान बदलामुळे मागील काही वर्षात अडचणीत सापडले आहेत.
शेतकऱ्यांना द्राक्ष बागांची उभारणी करण्यासाठी लाखो रुपये खर्चाची गुंतवणूक करावी लागते. फवारणीसाठी ट्रॅक्टरची गरज असते.
मशागतीसाठी अवजारे मोठ्या प्रमाणात घ्यावी लागतात. त्यामुळे एकूणच द्राक्ष बाग उभारणीचा एकूण विचार केला तर कोट्यावधी रुपयाची गुंतवणूक द्राक्ष बागेसाठी करावी लागते.
जिल्हा मध्यवर्ती बँकेसह पतसंस्था आणि विविध राष्ट्रीयकृत बँकेकडून यावर्षी शेतकऱ्यांनी द्राक्ष पिकासाठी कर्ज घेतले आहे. या कर्जाचा आकडा काही कोटी रुपांच्या घरात आहे.
जिल्हा बँकेच्या वतीने सहकारी सोसायटी मार्फत करोडो रुपयांचे पीक कर्ज आणि दीर्घ मुदतीचे कर्ज देण्यात आले आहे.
एकूणच यंदा द्राक्ष बागांचा विचार केला तर अतिवृष्टीमुळे तालुक्यात द्राक्षाचा जवळ जवळ ७० टक्क्याहून अधिक हंगाम वाया गेला. सोसायटी मार्फत घेतलेले कर्ज कसे फेडायचे हा द्राक्ष उत्पादकांपुढे मोठा चिंतेचा विषय इवला. शेतकरी वर्ग मोठ्या आर्थिक संकटात सापडला आहे.
