चिमुकल्यांच्या स्वप्नातील ‘चॉकलेटचा बंगला’! श्रीकृष्ण मंडळ ट्रस्टच्या देखाव्याने पुणेकरांना घातली भुरळ

पुण्यातील श्रीकृष्ण मंडळ ट्रस्टने यंदाच्या गणेशोत्सवात चिमुकल्यांच्या याच आनंदाला मूर्त रूप देत ‘चॉकलेटचा बंगला’ हा अनोखा देखावा साकारला आहे. हा देखावा पाहण्यासाठी पुणेकरांची मोठी गर्दी होत आहे.

• चिमुकल्यांच्या स्वप्नातील ‘चॉकलेटचा बंगला’!
• श्रीकृष्ण मंडळ ट्रस्टच्या देखाव्याने पुणेकरांना घातली भुरळ
•  चिमुकल्यांचा आनंद गगनात

पुणे : चॉकलेट म्हटले की चिमुकल्यांच्या चेहऱ्यावर आनंदाची लकेर उमटते. पण चॉकलेटपासून साकारलेला चक्क बंगला पाहायला मिळाला तर? पुण्यातील श्रीकृष्ण मंडळ ट्रस्टने यंदाच्या गणेशोत्सवात चिमुकल्यांच्या याच आनंदाला मूर्त रूप देत ‘चॉकलेटचा बंगला’ हा अनोखा देखावा साकारला आहे. हा देखावा पाहण्यासाठी पुणेकरांची मोठी गर्दी होत असून, विशेषतः लहान मुलांच्या उत्साहाने परिसर अक्षरशः फुलून गेला आहे.

 

१९३९ मध्ये स्थापना झालेल्या श्रीकृष्ण मंडळ ट्रस्टचे यंदा ८८ वे वर्ष आहे. मंडळाचे अध्यक्ष धनंजय मोरे यांच्या नेतृत्वाखाली यंदा हा आगळावेगळा देखावा साकारण्यात आला आहे. मागील वर्षी मंडळाने ‘अंदरबन अभयारण्य’ हा देखावा सादर केला होता. त्या देखाव्याला चिमुकल्यांचा उत्स्फूर्त प्रतिसाद मिळाला. मुलांना निसर्ग आणि जंगलाची सफर घडवून आणणारी ही संकल्पना लक्षात घेऊन यंदा त्यांच्या आवडीच्या चॉकलेटभोवती देखावा उभारण्याची कल्पना पुढे आली.

विशेष म्हणजे, ‘चॉकलेटचा बंगला’ ही संकल्पना मंडळाच्या एका व्यक्तीची नसून सर्व कार्यकर्त्यांच्या सामूहिक विचारातून साकारली आहे. हा देखावा प्रत्यक्षात आणण्यासाठी तब्बल दोन ते अडीच महिन्यांचा कालावधी लागला. बारकावे, सजावट आणि चिमुकल्यांना आकर्षित करणारी रचना यामुळे हा बंगला सध्या गणेशोत्सवातील आकर्षणाचा केंद्रबिंदू ठरत आहे. देखावा पाहण्यासाठी येणारी मुले चॉकलेटच्या बंगल्यात फेरफटका मारताना दिसत आहेत. चॉकलेटच्या दुनियेत प्रवेश केल्याचा अनुभव मिळत असल्याने त्यांच्या चेहऱ्यावरचा आनंद पाहण्यासारखा आहे. पालकही मुलांचा हा आनंद आपल्या मोबाईलच्या कॅमेऱ्यात कैद करत आहेत. परंपरा आणि चिमुकल्यांचा आनंद यांचा सुंदर मेळ घालत श्रीकृष्ण मंडळाने साकारलेला ‘चॉकलेटचा बंगला’ पुणेकरांच्या भेटीला विशेष ठरत आहे. मंडळाचे अध्यक्ष धनंजय मोरे, उपाध्यक्ष अमर शर्मा , खजिनदार विराज चव्हाण, सेक्रेटरी अनिल रणधीर, उत्सवप्रमुख पवन दवे यांनी देखाव्याचे आयोजन केले होते.

हे सुद्धा वाचा : अपघातग्रस्तांच्या मदतीला पुणे महापालिका धावणार? नगरसेवक अमोल बालवडकरांचा स्थायी समितीसमोर प्रस्ताव