बालाजी चौक परिसरातील मैलापाण्याच्या दुर्गंधीवरुन मनसे आक्रमक; महापालिका प्रशासनाला दिला इशारा 

पाषाण-सूस रस्त्यावरील बालाजी चौक परिसरात मैलापाणी थेट रस्त्यावर वाहत असल्याने परिसरात दुर्गंधी, शेवाळ आणि डासांचा प्रादुर्भाव वाढला आहे. त्यामुळे नागरिकांच्या आरोग्याचा प्रश्न निर्माण झाला असून, यावरुन आता महाराष्ट्र नवनिर्माण सेना आक्रमक झाली आहे.

• मैलापाण्याच्या दुर्गंधीवरुन मनसे आक्रमक
• महापालिका प्रशासनाला दिला इशारा 
• ड्रेनेजची समस्या तातडीने सोडवण्याची मागणी

बाणेर : पाषाण-सूस रस्त्यावरील बालाजी चौक परिसरात सीएनजी पेट्रोल पंपासमोरील मुख्य ड्रेनेज लाइन गेल्या दोन महिन्यांपासून वारंवार तुंबत आहे. त्यातून मैलापाणी थेट रस्त्यावर वाहत असल्याने परिसरात दुर्गंधी, शेवाळ आणि डासांचा प्रादुर्भाव वाढला आहे. त्यामुळे नागरिकांच्या आरोग्याचा प्रश्न निर्माण झाला असून, यावरुन आता महाराष्ट्र नवनिर्माण सेना आक्रमक झाली आहे. ही ड्रेनेज लाइन तातडीने दुरुस्त करावी, अशी मागणी महाराष्ट्र नवनिर्माण सेनेचे पुणे शहर उपाध्यक्ष सुहास निम्हण यांनी पुणे महापालिकेकडे केली आहे.

ड्रेनेजमधून वाहणारे मैलापाणी उताराच्या दिशेने शुभतेज मंगल कार्यालयापर्यंत वाहत जाते. त्यामुळे रस्त्यावर शेवाळ साचून रस्ता निसरडा झाला आहे. तसेच खोलगट भागात मैलापाणी साचत असल्याने दुचाकी घसरून अपघात होण्याचे प्रकार घडत आहेत. याप्रकरणी मनसेचे पुणे शहर उपाध्यक्ष सुहास निम्हण यांच्या नेतृत्वाखाली पुणे महापालिका आयुक्त कार्यालयात निवेदन देण्यात आले आहे. ड्रेनेजची समस्या तातडीने सोडवावी, अन्यथा मनसेच्या वतीने आंदोलन करण्यात येईल, असा इशारा निवेदनाद्वारे देण्यात आहे. यावेळी निलेश जुनवणे, पांडुरंग सुतार, गोपाळ जाधव, अशोक मराठे, प्रेमनाथ उमप, राजेंद्र फुके, संदेश कांबळे उपस्थित होते.

बालाजी चौकातून दररोज पीएमपी बस, दुचाकी आणि चारचाकी वाहनांची मोठी रहदारी असते. मुख्य रस्त्यावरच मैलापाणी पसरल्याने दुचाकी घसरून अपघात होण्याचा धोका निर्माण झाला आहे. महापालिकेकडून तत्काळ प्रत्यक्ष काम सुरू होऊन बालाजी चौक स्वच्छ व सुरक्षित व्हावा, अशी अपेक्षा पाषाणकर नागरिक व्यक्त करत आहेत.

हे सुद्धा वाचा : गांजा ओढणाऱ्यांनी रेल्वे पोलिसाचा चाकूने गळा चिरला, छातीवरही सापसप वार; पुण्यातील खळबळजनक घटना

बसथांब्याच्या दुरावस्थेवरुन मनसे आक्रमक

पुण्यातील पाषाण येथील मुख्य बसथांब्याची दुरवस्था झाली आहे. देखभाली अभावी तो जीर्ण झाला असल्याने तो कोणत्याही क्षणी कोसळण्याची शक्यता आहे. त्यामुळे प्रवाशांच्या जीवितास धोका निर्माण होऊ शकतो. याची तातडीने दखल घेऊन या बसथांब्यांची दुरुस्ती करण्यात यावी, अशी मागणी मनसेचे पुणे शहर उपाध्यक्ष सुहास निम्हण यांनी गेल्या काही दिवसाखाली केली आहे. निम्हण यांनी महापालिका आयुक्तांकडे निवेदनाद्वारे ही मागणी केली आहे. तसेच सुहास निम्हण यांनी आंदोलनाचा इशाराही दिला आहे.