पुणे शहरात डेंग्यूच्या रुग्णांमध्ये वाढ; आरोग्य प्रमुखांकडून क्षेत्रीय कार्यालयांची झाडाझडती

प्रतिबंधात्मक उपाययोजनांची सातत्याने अंमलबजावणी करावी तसेच वैद्यकीय अधिकाऱ्यांनी आपली जबाबदारी गांभीर्याने पार पाडावी, असेही डॉ. बोराडे यांनी स्पष्ट केले.

• पुणे शहरात डेंग्यूच्या रुग्णांमध्ये वाढ
• ऑक्टोबरमध्ये ८४३ डेंग्यू रुग्ण
• महापालिका आरोग्य विभागाकडून प्रतिबंधात्मक उपाययोजनांना वेग

पुणे : शहरात डेंग्यूचा प्रादुर्भाव वाढत असल्याने महापालिकेच्या आरोग्य विभागाने प्रतिबंधात्मक उपाययोजनांची तीव्रता वाढविली आहे. ऑक्टोबर महिन्यात शहरात डेंग्यूचे तब्बल ८४३ रुग्ण आढळले आहेत. या पार्श्वभूमीवर महापालिकेच्या आरोग्य प्रमुख डॉ. नीना बोराडे यांनी विविध क्षेत्रीय कार्यालयांना प्रत्यक्ष भेटी देत डेंग्यू नियंत्रणासाठी सुरू असलेल्या उपाययोजनांचा आढावा घेतला. तसेच कामकाजात कोणत्याही प्रकारची हलगर्जीपणा खपवून घेतला जाणार नाही, असे स्पष्ट निर्देश संबंधित अधिकाऱ्यांना दिले.

या पाहणीदरम्यान क्षेत्रीय वैद्यकीय अधिकाऱ्यांसह आरोग्य, बांधकाम, अतिक्रमण, घनकचरा आणि पाणीपुरवठा विभागांच्या कामकाजाची तपासणी करण्यात आली. नगर रोड, येरवडा, औंध-बाणेर, ढोले पाटील, शिवाजीनगर-घोले रोड, बिबवेवाडी, सिंहगड रोड, विश्रामबागवाडा आणि कसबा पेठ या क्षेत्रीय कार्यालयांना भेटी देण्यात आल्या. संबंधित सहाय्यक आयुक्तांच्या उपस्थितीत संयुक्त बैठका घेऊन डेंग्यू नियंत्रणासाठी सर्व विभागांनी समन्वयाने काम करण्याच्या सूचना देण्यात आल्या.

डासांची उत्पत्ती रोखण्यासाठी परिसरातील स्वच्छता, पाणी साचणारी ठिकाणे आणि संभाव्य डासोत्पत्ती स्थळांवर नियमित लक्ष ठेवण्याचे निर्देश देण्यात आले आहेत. प्रतिबंधात्मक उपाययोजनांची सातत्याने अंमलबजावणी करावी तसेच वैद्यकीय अधिकाऱ्यांनी आपली जबाबदारी गांभीर्याने पार पाडावी, असेही डॉ. बोराडे यांनी स्पष्ट केले.

औंध-बाणेरमध्ये सर्वाधिक रुग्ण

ऑक्टोबरमधील रुग्णसंख्येचा विचार करता औंध-बाणेर क्षेत्रीय कार्यालयाच्या हद्दीत सर्वाधिक १५२ रुग्णांची नोंद झाली आहे. त्याखालोखाल येरवडा-वडगाव शेरीत ११०, केशवनगरमध्ये ७४, कोथरूडमध्ये ७३, नगर रोड-वाघोलीत ७१, कोंढवा-उंड्रीत ६५ आणि सिंहगड रोड परिसरात ५५ रुग्ण आढळले. शिवाजीनगर-घोले रोडमध्ये ३३, धनकवडी-सहकारनगरमध्ये २२, तर वानवडी आणि कसबा-विश्रामबागवाडा परिसरात प्रत्येकी २१ रुग्णांची नोंद झाली.

उपाययोजनांची नियमित अंमलबजावणी करणे आवश्यक

‘डेंग्यू प्रतिबंधक उपाययोजनांची नियमित अंमलबजावणी करणे आवश्यक आहे. डासोत्पत्ती होऊ नये, यासाठी संबंधित विभागांनी सतर्क राहून आपली जबाबदारी गांभीर्याने पार पाडावी.’

– डॉ. नीना बोराडे, आरोग्य प्रमुख

FAQ

1. पुणे शहरात डेंग्यूच्या रुग्णांमध्ये वाढ झाली आहे का?
होय. ऑक्टोबर महिन्यात पुणे शहरात डेंग्यूचे ८४३ रुग्ण आढळले आहेत.

2. डेंग्यूच्या वाढत्या प्रादुर्भावाच्या पार्श्वभूमीवर महापालिकेने काय केले?
महापालिकेच्या आरोग्य विभागाने डेंग्यू प्रतिबंधात्मक उपाययोजनांची तीव्रता वाढविली आहे.

3. डेंग्यू नियंत्रणासाठी पाहणी कोणी केली?
महापालिकेच्या आरोग्य प्रमुख डॉ. नीना बोराडे यांनी विविध क्षेत्रीय कार्यालयांना प्रत्यक्ष भेटी देऊन उपाययोजनांचा आढावा घेतला.