पीएमआरडीएचा ‘अभियांत्रिकी’वर भर; रस्ते, मेट्रो अन् बोगद्यासाठी निधीचे मोठे आव्हान

पुणे महानगर प्रदेश विकास प्राधिकरणाच्या (पीएमआरडीए) आगामी अर्थसंकल्पीय बैठकीकडे संपूर्ण जिल्ह्याचे लक्ष लागले असतानाच, प्राधिकरणाने चालू आर्थिक वर्षात सर्वाधिक खर्च अभियांत्रिकी प्रकल्पांवर केल्याचे स्पष्ट झाले आहे.

पिंपरी : पुणे महानगर प्रदेश विकास प्राधिकरणाच्या (पीएमआरडीए) आगामी अर्थसंकल्पीय बैठकीकडे संपूर्ण जिल्ह्याचे लक्ष लागले असतानाच, प्राधिकरणाने चालू आर्थिक वर्षात सर्वाधिक खर्च अभियांत्रिकी प्रकल्पांवर केल्याचे स्पष्ट झाले आहे. रस्ते, मेट्रो, नदी सुधार आणि सांडपाणी व्यवस्थापनासह बहुचर्चित कात्रज-येरवडा दुमजली बोगद्यासारख्या महत्त्वाकांक्षी प्रकल्पांसाठी आगामी काळात मोठा निधी उभा करण्याचे कठीण आव्हान प्रशासनासमोर असणार आहे.

 

स्वतःच्या हद्दीलाच प्राधान्य

विशेष म्हणजे, पीएमआरडीए आता स्वतःच्या कार्यक्षेत्राबाहेरील स्थानिक स्वराज्य संस्थांच्या हद्दीत विकासकामांसाठी निधी खर्च करण्याबाबत ‘हात आखडता’ घेण्याची चिन्हे आहेत. मूळ उद्दिष्टाला बाधा येऊ नये, यासाठी हा सावध पवित्रा घेतला जात असल्याचे सूत्रांनी सांगितले.

तिजोरीत काय आणि किती?

पीएमआरडीएचे अध्यक्ष तथा मुख्यमंत्री देवेंद्र फडणवीस यांच्या उपस्थितीत येत्या आठवड्यात वार्षिक अर्थसंकल्पीय सभा होण्याची शक्यता आहे. चालू आर्थिक वर्षात पीएमआरडीएला विविध स्रोतांतून १३१०.७७ कोटी रुपये प्राप्त झाले. त्यापैकी १२०८.७० कोटी रुपये खर्च झाले असून, यात सर्वाधिक ६२२ कोटी रुपये केवळ अभियांत्रिकी प्रकल्पांवर खर्च झाले आहेत.

जमा महसूल : बांधकाम परवानगी विभागातून सर्वाधिक ६८४.४५ कोटी, तर जमीन व मालमत्ता विभागातून ४७२.३२ कोटी रुपये जमा झाले आहेत. अग्निशमन दलाच्या माध्यमातून १३४ कोटी रुपये मिळाले आहेत.

खर्चाचा ताळेबंद : अभियांत्रिकीनंतर ‘पीएमपीएमएल’ला २३० कोटी रुपये देण्यात आले आहेत. प्रशासकीय खर्चासाठी ३१९.९६ कोटी, तर आस्थापना खर्चासाठी १७.५६ कोटी रुपये खर्च झाले आहेत.

४७४९ कोटींची थकबाकी प्रलंबित

पीएमआरडीएची आर्थिक स्थिती भक्कम दिसत असली, तरी शासनाकडून येणारी मोठी रक्कम अद्याप रखडलेली आहे. शहरी मुद्रांक शुल्कापोटी तब्बल ४१४३.२५ कोटी रुपये शासनाकडून येणे बाकी आहे. तसेच जिल्हा परिषदेकडून ग्रामीण मुद्रांक शुल्काचे ३०४.७४ कोटी आणि महापालिकांकडून ‘टीओडी’पोटी मोठी रक्कम येणे बाकी आहे. ही एकूण थकबाकी ४७४९.६१ कोटी रुपयांच्या घरात आहे.

बोगद्याचे ‘तांत्रिक’ आव्हान

कात्रज-येरवडा या दुमजली बोगद्याचा प्रकल्प तांत्रिकदृष्ट्या जितका महत्त्वाकांक्षी आहे, तितकाच तो आर्थिकदृष्ट्या खर्चिक आहे. या प्रकल्पासाठी अवाढव्य निधी उभा करणे हे प्रशासनापुढील मोठे उद्दिष्ट असणार आहे. त्यामुळे आगामी अर्थसंकल्पात या प्रकल्पासाठी नेमकी काय तरतूद केली जाते, याकडे सर्वांचे डोळे लागले आहेत.

हे सुद्धा वाचा : भोर तालुक्यातील 26 ग्रामपंचायतीच्या पोटनिवडणुकीचा बिगुल वाजला; ‘या’ तारखेला होणार मतदान

एका दृष्टिक्षेपात पीएमआरडीएची तिजोरी :

एकूण जमा : १३१०. ७७ कोटी रुपये
एकूण खर्च : १२०८. ७० कोटी रुपये
व्याजातून उत्पन्न : २९६ कोटींच्या मुदत ठेवींवर (FD) वार्षिक २०९ कोटी रुपये व्याज.
शासनाकडून येणे बाकी : ४१४३.२५ कोटी रुपये (शहरी मुद्रांक शुल्क)