पिंपरी-चिंचवडच्या विकासाला गती, विकासकामांना स्थायीची मंजुरी; बैठकीत घेतले ‘हे’ मोठे निर्णय

पिंपरी- चिंचवड महानगरपालिकेच्या स्थायी समिती सभेत शहराच्या विकासासाठी विविध महत्त्वपूर्ण कामांना मंजुरी देण्यात आली आहे. सभापती अभिषेक बारणे यांच्या अध्यक्षतेखाली मुख्य प्रशासकीय इमारतीतील सभागृहात ही बैठक झाली.

• पिंपरी-चिंचवडच्या विकासाला गती
• विकासकामांना स्थायीची मंजुरी
• बैठकीत घेतले ‘हे’ मोठे निर्णय

पिंपरी : पिंपरी- चिंचवड महानगरपालिकेच्या स्थायी समिती सभेत शहराच्या विकासासाठी विविध महत्त्वपूर्ण कामांना मंजुरी देण्यात आली आहे. सभापती अभिषेक बारणे यांच्या अध्यक्षतेखाली मुख्य प्रशासकीय इमारतीतील सभागृहात ही बैठक झाली. सभेला महापालिका आयुक्त डॉ. विजय सूर्यवंशी, अतिरिक्त आयुक्त विजयकुमार खोराटे, तृप्ती सांडभोर, नगरसचिव मुकेश कोळप आणि विविध विभागांचे अधिकारी उपस्थित होते. बैठकीत पायाभूत सुविधा, स्वच्छता, आरोग्य, शिक्षण आणि प्रशासनाशी संबंधित अनेक विषयांवर निर्णय घेण्यात आले आहेत.

 

स्वच्छ सर्वेक्षण २०२५-२६ अंतर्गत शहरातील झोपडपट्टी व दाट वस्ती भागांमध्ये गटार, स्टॉर्म वॉटर लाईन, शौचालय दुरुस्ती आणि इमारतींची देखभाल यासारखी कामे मोठ्या प्रमाणावर राबविण्यात येणार आहेत. निगडी- दापोडी, सांगवी-किवळे आदी प्रमुख मार्गांसह विविध प्रभागांतील अंतर्गत रस्त्यांचे डांबरीकरण व काँक्रीटीकरण करण्यास मंजुरी देण्यात आली आहे.

सबवे उभारण्यासाठी सल्लागार नेमणार

वाहतूक सुधारण्यासाठी पिंपळे सौदागर येथील पीके चौक सिग्नलमुक्त करण्यासाठी आणि कल्पतरू चौकात सबवे उभारण्यासाठी सल्लागार नेमण्याचा निर्णय घेण्यात आला आहे. आरोग्य सेवांच्या बळकटीकरणासाठी विविध रुग्णालयांमध्ये उपकरणे खरेदी, जैववैद्यकीय कचरा व्यवस्थापन, थेरगाव येथे मल्टीस्पेशालिटी रुग्णालयासाठी आवश्यक सुविधा उपलब्ध करून देण्यास मान्यता देण्यात आली आहे.

हे सुद्धा वाचा : गरिबाच्या फ्रीजला वाढली मागणी; कुंभारवाड्यांमध्ये माठ बनवणाऱ्या कारागीरांची लगबग सुरू

महिला बचत गटांना मुदतवाढ, मानधनवाढ

शैक्षणिक क्षेत्रात महापालिका शाळांमध्ये डेटा एन्ट्री ऑपरेटर नेमणे, परीक्षा साहित्य छपाई आणि संगणकीय सुविधा उभारणीस मंजुरी देण्यात आली आहे. स्वच्छता व्यवस्थापनासाठी महिला बचत गटांना मुदतवाढ व मानधनवाढ देण्याचा निर्णय घेण्यात आला आहे. या बैठकीत शहराच्या सर्वांगीण विकासासाठी महत्त्वपूर्ण निर्णय घेण्यात आले आहेत.

कौशल्यममधून युवकांना रोजगाराच्या संधी – महापौर रवि लांडगे

कौशल्याधारित प्रशिक्षणामुळे युवकांना रोजगाराच्या नव्या संधी उपलब्ध होत असून, अशा प्रकल्पांचा विस्तार करण्याची गरज असल्याचे प्रतिपादन महापौर रवि लांडगे यांनी केले. निगडी येथील यमुनानगर परिसरातील कौशल्यम लाईट हाऊस प्रकल्पाच्या पाहणीदरम्यान ते बोलत होते. महापौरांनी प्रकल्पाचा आढावा घेत प्रशिक्षण प्रक्रियेची माहिती जाणून घेतली. प्रशिक्षण पूर्ण करून नोकरी मिळवलेल्या युवकांशी संवाद साधत त्यांच्या यशाचे कौतुक केले. यावेळी उपमहापौर शर्मिला बाबर, नगरसदस्य उत्तम केंदळे, अनिल घोलप, तसेच संबंधित अधिकारी उपस्थित होते.