तिरंगा रॅलीनिमित्त पुण्यातील वाहतुकीत बदल; दुपारपासून 'हे' मार्ग राहणार बंद
पुणे : तिरंगा गौरव समिती पुणे यांच्या वतीने मंगळवारी (दि. ११) तिरंगा रॅलीचे आयोजन करण्यात आले असून, या रॅलीनिमित्ताने वाहतूकीत बदल करण्यात आला आहे. दुपारी दोन वाजल्यापासून रॅली संपेपर्यंत हा वाहतूक बदल असणार असून, फर्ग्युसन कॉलेज रोड तसेच रॅलीच्या मार्गाला जोडणारे काही उपरस्ते वाहतुकीसाठी तात्पुरते बंद ठेवण्यात येणार आहेत. त्यामुळे संबंधित मार्गावरील वाहतूक पर्यायी मार्गाने वळविण्याचे आदेश वाहतूक पोलिसांनी दिले आहेत.
असा आहे रॅलीचा मार्ग
ही रॅली ललित महल हॉटेल चौक ते ज्ञानेश्वर महाराज पादुका चौक, तुकाराम महाराज पादुका चौक, गुडलक चौक आणि गरवारे चौक या मार्गावरून जाणार आहे. रॅलीच्या सुरक्षिततेसाठी आवश्यकतेनुसार वाहतूक बंद ठेवण्यात येणार आहे.
असा आहे वाहतुकीत बदल
खंडोजीबाबा चौक ते गरवारे ब्रिज चौक हा मार्ग बंद राहणार आहे. स्वारगेटकडून पुणे विद्यापीठाकडे जाणाऱ्या वाहनचालकांनी अलका चौक, खंडोजीबाबा चौक, वीर सावरकर चौकाकडे न जाता भाऊसाहेब पाटील चौक, ना. सी. फडके चौक, मंगळवारवाडा चौक, सेनादत्त चौक, बालशिवाजी, म्हात्रे पूल, नळ स्टॉप आणि लॉ कॉलेज रोडमार्गे जावे. तसेच स्वारगेटकडून खडकी/जुना पुणे-मुंबई महामार्गाकडे जाणाऱ्या वाहनांसाठी भाऊसाहेब पाटील चौक, पुरम चौक, बाजीराव रोड, गाडगीळ पुतळा, कुंभार वेस आणि आरटीओ चौक हा पर्यायी मार्ग सुचविण्यात आला आहे. दरम्यान, गरवारे चौक ते चाफेकर चौक (एफ.सी. रोड) तसेच गरवारे चौक ते तुकाराम पादुका चौक, ज्ञानेश्वर पादुका चौक, ललित महल चौक ते चाफेकर चौक या मार्गांवरही वाहतूक बंद ठेवण्यात येणार आहे. वाहनचालकांनी रॅलीच्या काळात पर्यायी मार्गांचा वापर करावा, असे आवाहन वाहतूक पोलिसांनी केले आहे.
पर्यायी मार्ग
गरवारे चौक परिसरातून जाणाऱ्या वाहनांसाठी लॉ कॉलेज रोड, एस.बी. रोड, विद्यापीठ चौक तसेच भांडारकर रोड, बी.एम.सी.सी. रोड, चतु:शृंगी रोड, मॉडेल कॉलनी रोडमार्गे वाहतूक वळविण्यात येणार आहे. वाहतूक पोलिस उपआयुक्त डॉ. संदीप भाजीभाकरे यांनी नागरिकांनी पर्यायी मार्गांचा वापर करावा असे आवाहन केले आहे.
.png "Videos"){kind=small}
