Raigad News: महाडकरांना दिलासा! वरंधा घाट बंद न करता रुंदीकरणाचे काम सुरूच, प्रशासनाचा मोठा निर्णय
भोर उपविभागीय अधिकारी यांनी सादर केलेल्या प्रस्तावानुसार हा घाट भाग दरडप्रवण असून रस्ता अत्यंत अरुंद व वळणावळणाचा आहे. एका बाजूस निरा देवघर धरणाचे पाणी तर दुसऱ्या बाजूस उंच डोंगररांग असल्याने वाहतूक वळविण्यासाठी पुरेशी जागा उपलब्ध नाही. त्यामुळे २५ मार्च ते ३० एप्रिल या कालावधीत रस्ता पूर्णतः बंद करण्याची मागणी करण्यात आली होती.
तथापी धामणदेव, कारुंगण, हिंडोशी, सोमजाई माळ, टाक्या माळ, वारवंड, शिरगाव, अशिंपी, उंबर्डेवाडी, उंबर्डेगाव व शिळीम या गावांचा या मार्गाशी थेट संपर्क असल्याने स्थानिकांना पर्यायी मार्ग नसल्याचे प्रशासनाच्या उपलब्ध अहवालातून स्पष्ट झाले. त्यामुळे नागरिकांचे दैनंदिन कामकाज, अत्यावश्यक सेवा व विद्यार्थ्यांची ये-जा बाधित होऊ नये, या दृष्टीने घाट पूर्णतः बंद करण्यास नकार देण्यात आला.
जिल्हाधिकाऱ्यांच्या आदेशानुसार, रस्ता रुंदीकरणाचे काम सुरू ठेवताना स्थानिकांसाठी पर्यायी मार्ग उपलब्ध करून देणे बंधनकारक करण्यात आले आहे. तसेच रुग्णवाहिका, अग्निशमन दल व इतर अत्यावश्यक सेवांची वाहतूक सुरळीत राहील याची दक्षता घेण्याच्या सूचना देण्यात आल्या आहेत. दरम्यान, बाहेरील वाहनांसाठी प्रशासनाने पर्यायी मार्ग सुचविले आहेत. पुण्याकडे जाण्यासाठी माणगाव-निजामपूर-ताम्हिणी घाट-मुळशी-पिरंगुट-पुणे असा मार्ग, तर कोल्हापूरकडे जाण्यासाठी पोलादपूर-महाबळेश्वर-वाई-सातारा-कराड किंवा खेड-चिपळून-पाटण-कराड-कोल्हापूर असे पर्याय देण्यात आले आहेत.
पुणे ‘झेडपी’ ई-गव्हर्नन्समध्ये राज्यात अव्वल; सेवाकर्मी कार्यक्रमातही ‘प्रथम’ क्रमांकाने निवड
पावसाळ्यापूर्वी घाटातील कामे पूर्ण करण्याच्या दृष्टीने आणि नागरिकांची गैरसोय टाळण्यासाठी हा निर्णय घेण्यात आल्याचे प्रशासनाकडून स्पष्ट करण्यात आले आहे. दरम्यान मागील काही वर्षात हा घाट मार्ग सातत्याने बंद होत असल्याच्या कारणाने या मार्गावरील विविध गावातील ग्रामस्थांनी संताप व्यक्त करीत प्रशासनाला पत्र व्यवहार देखील केला होता. दरवर्षीच्या पावसाळ्यात तर बरेच अंशी हा घाट मार्ग बंद असतो. त्यामुळे येथील दळणवळण, व्यवसाय, शाळा महाविद्यालय इत्यादीवर त्याचा परिणाम होत असून जनजीवन देखील बाधित होत असते. त्यामुळे पुणे जिल्हाधिका-यांनी दिलेल्या या सध्याच्या निर्णयामुळे येथील नागरिकांकडून समाधान व्यक्त केले जात आहे.
.png "Videos"){kind=small}
