'लाडक्या बहिणीं'ना 2100 रुपयांचा हफ्ता कधी मिळणार? अर्थमंत्र्यांनी दिली महत्त्वपूर्ण माहिती;
मुंबई : मुख्यमंत्री माझी लाडकी बहीण योजना महिलांच्या चांगलीच पसंतीस उतरली आहे. लाडकी बहीण योजनेच्या लाभार्थी महिला योजनेच्या रकमेत वाढ होण्याची वाट पाहत आहेत. असे असताना यावर राज्याचे उपमुख्यमंत्री आणि अर्थमंत्री अजित पवार यांनी महत्त्वाची माहिती दिली आहे. ‘राज्य सरकारची आर्थिक परिस्थिती सुधारल्यानंतर मुख्यमंत्री माझी लाडकी बहीण योजनेतील लाभार्थ्यांना वाढीव मदत देण्यात येईल, असे त्यांनी म्हटले आहे.
भाजप-महायुतीला विधानसभा निवडणुकीत मोठ्या बहुमताने विजय मिळाला आहे. यामध्ये लाडकी बहीण योजनेने महत्त्वाची भूमिका बजावल्याचे सांगण्यात येत आहे. या योजनेला महिला वर्गाकडून चांगला प्रतिसादही दिला जात आहे. त्यात विधानसभेत सन २०२५-२६ च्या अर्थसंकल्पातील वित्त, नियोजन, अन्न आणि नागरी पुरवठा विभागाच्या अनुदानाच्या मागण्या मंजूर करण्यात आल्या. त्यानंतर लाडकी बहीण योजनेबाबत विधान करण्यात आले आहे.
अर्थमंत्री पवार म्हणाले, सगळी सोंगे आणता येतात. पण, पैशांची सोंगे आणता येत नाही. त्यामुळे राज्य सरकारची आर्थिक परिस्थिती सुधारल्यानंतर मुख्यमंत्री माझी लाडकी बहीण योजनेतील लाभार्थ्यांना वाढीव मदत देण्यात येईल, असे स्पष्टीकरण त्यांनी गुरुवारी विधानसभेत केले.
महिलांना करावी लागणार दीर्घ प्रतिक्षा
अजित पवारांच्या या स्पष्टीकरणानंतर योजनेतील पात्र लाडक्या बहिणींना 2100 रुपयांच्या मदतीसाठी दीर्घ प्रतीक्षा करावी लागणार आहे. लॉटरीच्या माध्यमातून राज्याचे उत्पन्न वाढावे यासाठी विधानसभा सदस्यांची समिती नेमण्याची घोषणा पवार यांनी यावेळी केली.
अन्य राज्यांच्या लॉटरीचा अभ्यास होणार
तत्पूर्वी झालेल्या चर्चेला उत्तर देताना अजित पवार यांनी मुख्यमंत्री लाडकी बहीण योजनेतील लाभार्थ्यांना वाढीव अनुदान देण्याच्या मागणीवर सरकारची भूमिका स्पष्ट केली. सध्या आम्ही लाडक्या बहिणींना कबूल केल्याप्रमाणे मदत देत आहोत. त्यामुळे आर्थिक परिस्थिती सुधारली की आम्ही वाढीव मदत देऊ, असे त्यांनी सांगितले. भाजपचे ज्येष्ठ आमदार सुधीर मुनगंटीवार यांनी या चर्चेत भाग घेताना राज्य सरकारने लॉटरीच्या माध्यमातून उत्पन्न वाढवावे, अशी सूचना केली होती.
.png "Videos"){kind=small}
