बुधवार, 9 सप्टेंबर 2026
सातारा जिल्हा बँक निवडणूक अंतिम टप्प्यात; ११ सप्टेंबरला मतदार यादी होणार प्रसिद्ध!
प्रारूप मतदार यादी जाहीर झाल्यानंतर सभासद संस्था तसेच संबंधितांकडून विविध स्वरूपाच्या हरकती दाखल करण्यात आल्या होत्या. या हरकतींवर सुनावणी घेऊन विभागीय सहनिबंधकांनी त्यावर निर्णय दिला. आता संबंधित निर्णयांची अंमलबजावणी करून अंतिम मतदार यादी तयार करण्याची प्रक्रिया सुरू होणार आहे.
Pimpri Chinchwad: ओपन स्पेस मध्ये गाळे उभारून भाड्याने दिले? महिंद्रा अँथियाला महापालिकेचा दणका
जिल्हा बँकेची अंतिम मतदार यादी ११ सप्टेंबर रोजी प्रसिद्ध होणार आहे. त्यामुळे कोणत्या हरकती मान्य झाल्या, कोणत्या नोंदी कायम राहिल्या आणि अंतिम मतदार यादीत किती मतदार राहणार, याबाबतचे चित्र त्याच दिवशी स्पष्ट होणार आहे. अंतिम यादीकडे सहकार क्षेत्रासह जिल्ह्यातील राजकीय वर्तुळाचेही लक्ष लागले आहे.
अंतिम मतदार यादी प्रसिद्ध झाल्यानंतर साधारण दहा दिवसांनी निवडणुकीचा प्रत्यक्ष कार्यक्रम जाहीर होण्याची शक्यता व्यक्त केली जात आहे. त्यामुळे सप्टेंबरच्या उत्तरार्धात निवडणूक प्रक्रियेला वेग येण्याची चिन्हे आहेत. दरम्यान, जिल्हा बँकेवर वर्चस्व मिळवण्यासाठी विविध राजकीय गटांकडून अंतर्गत मोर्चेबांधणी सुरू झाली असून, इच्छुक उमेदवारांकडूनही चाचपणी केली जात आहे.
मात्र, निवडणुकीतील मतदारसंघनिहाय गणित, उमेदवारांची संख्या आणि राजकीय आघाड्यांचे अंतिम स्वरूप हे निवडणूक कार्यक्रम जाहीर झाल्यानंतरच स्पष्ट होणार आहे. ऑक्टोबरअखेरपर्यंत निवडणूक कार्यक्रम जाहीर होण्याची शक्यता असल्याने आगामी काळात जिल्हा बँकेच्या राजकारणातील हालचाली अधिक तीव्र होण्याची चिन्हे आहेत.
