वाघोली येथील सर्किट हाऊस येथे पशुसुधार समितीची सभा शेतकरी व पशुपालकांच्या उपस्थितीत उत्साहपूर्ण वातावरणात पार पडली. यावेळी अमित चव्हाण यांनी शेतकऱ्यांशी संवाद साधून पशुधन वाढीसाठी उपलब्ध असलेल्या विविध योजनांचा लाभ घेण्याचे आवाहन केले. पशुविभागामार्फत राबविण्यात येणाऱ्या योजना अधिक प्रभावीपणे शेतकऱ्यांपर्यंत पोहोचवाव्यात तसेच पात्र लाभार्थ्यांना त्याचा प्रत्यक्ष लाभ मिळवून द्यावा, अशा सूचनाही त्यांनी संबंधित अधिकारी व कर्मचाऱ्यांना दिल्या.
यावेळी डॉ. विरकर यांनी पशुसंवर्धन विभागामार्फत राबविण्यात येणाऱ्या विविध योजना, पशुधनाची निगा, आरोग्य व विमा याबाबत शेतकऱ्यांना मार्गदर्शन केले.
सभेच्या निमित्ताने पिंपोडे बुद्रुक गटाची पशुसुधार समिती स्थापन करण्यात आली. या समितीच्या माध्यमातून पशुपालकांच्या अडचणी सोडविण्यासह शासनाच्या योजना तळागाळातील शेतकऱ्यांपर्यंत पोहोचविण्यासाठी प्रयत्न केले जाणार आहेत.
यावेळी कोरेगाव पंचायत समिती सदस्य रुपाली ताई साळुंखे, सुधीर साळुंखे, भाजपा युवा नेते कुमार भोईटे, नरेंद्र वाघंबरे,सरपंच अमिता भोईटे, अरुणा बेस्के, संतोष उगले, पूजा शिंदे, श्रीकांत जगताप यांच्यासह परिसरातील शेतकरी व पशुपालक मोठ्या संख्येने उपस्थित होते. शेतकऱ्यांच्या उत्स्फूर्त सहभागामुळे सभा आनंदी व उत्साहपूर्ण वातावरणात पार पडली.
.png "Videos"){kind=small}
