मीरा-भाईंदरमधील प्लेझंट पार्कमध्ये भीषण आग; चार इमारतींना फटका, अनधिकृत शेडवर महापालिकेची कारवाई
भाईंदर : मीरा-भाईंदर शहरातील काशिमिरा परिसरातील प्लेझंट पार्क येथे लागलेल्या भीषण आगीमुळे संपूर्ण परिसरात एकच खळबळ उडाली. या आगीत उसळलेल्या ज्वाळा तब्बल १० ते १२ फुटांपर्यंत पोहोचत असल्याने परिस्थिती काही काळ नियंत्रणाबाहेर गेली होती. आगीच्या तडाख्यात आजूबाजूच्या ३ ते ४ इमारती आल्याने रहिवाशांचे मोठ्या प्रमाणात नुकसान झाले आहे.
मिळालेल्या प्राथमिक माहितीनुसार, प्लेझंट पार्क परिसरातील एका मोकळ्या जागेत अचानक आग लागली. काही क्षणांतच आगीने विक्राळ रूप धारण करत परिसरात दाट धुराचे लोट पसरले. ज्वाळांची उंची वाढत असल्याने शेजारील इमारतींमध्ये राहणाऱ्या नागरिकांमध्ये भीतीचे वातावरण निर्माण झाले. अनेक रहिवाशांनी घाबरून घराबाहेर धाव घेत सुरक्षित ठिकाणी आश्रय घेतला.
घटनेची माहिती मिळताच अग्निशमन दलाच्या अनेक गाड्या तात्काळ घटनास्थळी दाखल झाल्या. जवानांनी युद्धपातळीवर प्रयत्न करत आगीवर नियंत्रण मिळवण्यासाठी पाण्याचा मारा सुरू केला. काही तासांच्या अथक प्रयत्नांनंतर आग आटोक्यात आणण्यात यश आले. यावेळी पोलिसांनीही परिसरात बंदोबस्त वाढवून नागरिकांना सुरक्षित अंतर राखण्याचे आवाहन केले.
सुदैवाने या घटनेत कोणतीही जीवितहानी झाल्याची नोंद नाही. मात्र, आगीमुळे घरगुती साहित्य, वाहनं आणि इतर मालमत्तेचे मोठे नुकसान झाल्याची शक्यता वर्तवली जात आहे. आगीचे नेमके कारण अद्याप स्पष्ट झाले नसून संबंधित यंत्रणांकडून सखोल तपास सुरू आहे.
दरम्यान, या घटनेनंतर मीरा-भाईंदर महानगरपालिकेची झोप उडाल्याचे चित्र दिसून आले. ज्या ठिकाणी आग लागली त्या परिसरात अनधिकृतपणे उभारण्यात आलेल्या शेडवर महापालिकेकडून तत्काळ बुलडोझर कारवाई करण्यात आली. संबंधित अनधिकृत बांधकाम जमीनदोस्त करण्यात आले असून अशा प्रकारच्या धोकादायक बांधकामांवर कठोर कारवाई करण्याचे संकेत प्रशासनाने दिले आहेत. जवळपास २५ हून घरांच्या बालकण्यांना याच्या झळा बसल्या. तर दुसरीकडे त्याच आगीत दोन सिलेंडरचा स्फोट झाला असून काही गाड्या ही आगीत जळून खाक झाल्या असल्याची माहिती समोर आली आहे.
या घटनेमुळे शहरातील अग्निसुरक्षा उपाययोजनांवर पुन्हा एकदा प्रश्नचिन्ह उपस्थित झाले आहे. नागरिकांकडून महापालिकेने नियमित तपासण्या करून अनधिकृत बांधकामे हटवावीत, तसेच अग्निसुरक्षा नियमांची काटेकोर अंमलबजावणी करावी, अशी जोरदार मागणी होत आहे.
.png "Videos"){kind=small}
