पुणे : सर्वाेच्च न्यायालयाच्या निर्णयानंतर सर्वच पक्षांनी महापालिका निवडणुकीची तयारी सुरु केली आहे. राष्ट्रवादी काँग्रेस (शरद पवार) पक्षाच्या काेअर कमिटीची निवडणुकीसंदर्भात बैठक पार पडली आहे. या बैठकीत निवडणूक रणनीती, संभाव्य आघाड्यांचे पर्याय, तसेच शहरातील प्रमुख समस्या यावर सविस्तर चर्चा करण्यात आली. सध्या महानगरपालिका निवडणुकीसंदर्भात प्रशासकीय स्तरावर सुरु असलेल्या प्रभाग रचनेविषयीच्या प्रक्रियेत उद्भवू शकणाऱ्या तक्रारींची जबाबदारी माजी स्थायी समिती अध्यक्ष विशाल तांबे यांच्याकडे सोपवण्यात आली आहे.
पक्षाने भाजपच्या मागील सत्ताकाळावर तीव्र टीका करत, नियोजनशून्य कारभारामुळे शहरातील वाढती वाहतूक कोंडी, पावसाळ्यातील पाणी साचण्याचे प्रश्न, पर्यावरणाची होणारी हानी आणि विकास प्रकल्पातील अनियमितता यामुळे पुणेकर त्रस्त असल्याचे अधोरेखित केले. हे मुद्दे प्रभावीपणे जनतेपर्यंत पोहोचवण्याचा निर्धार पक्षाने व्यक्त केला.
निवडणुकीसाठी सज्ज राहण्याचे निर्देश
शहरातील पक्ष संघटन अधिक बळकट करण्यावरही बैठकीत भर देण्यात आला. सर्व फ्रंटल सेल्स आणि कार्यकर्त्यांना निवडणुकीसाठी सज्ज राहण्याचे स्पष्ट निर्देश देण्यात आले आहेत. बैठकीत विविध धोरणात्मक आणि संघटनात्मक विषयांवरही चर्चा झाली. या बैठकीस शहराध्यक्ष प्रशांत जगताप, माजी खासदार वंदना चव्हाण, माजी आमदार जगन्नाथ शेवाळे, जयदेव गायकवाड, आमदार बापूसाहेब पठारे, माजी आमदार कमल ढोले पाटील, अंकुश काकडे, रवींद्र माळवदकर, विशाल तांबे, अश्विनी कदम, श्रीकांत पाटील, सचिन दोडके, भगवान साळुंखे, डॉ. सुनील जगताप, पंडित कांबळे, प्रकाश म्हस्के यांच्यासह अनेक पदाधिकारी आणि कार्यकर्ते उपस्थित होते.
.png "Videos"){kind=small}
