BMC Mayor Reservation : आरक्षण सोडतीवरुन पेटलं रान! BMC आरक्षणावर शिवसेना ठाकरे गटाचा आक्षेप

मुंबई महापालिका महापौर आरक्षण सोडतीवर ठाकरे गटाने आक्षेप घेतला आहे. माजी महापौर किशोरी पेडणेकर यांनी ओबीसी महिला आरक्षण देण्याची मागणी केली आहे.

• BMC मध्ये सर्वसाधारण महिला आरक्षण सोडत जाहीर
• ठाकरे गटाकडून आरक्षण सोडतीवर आक्षेप
• माजी महापौर किशोरी पेडणेकर आक्रमक

BMC Mayor Reservation : मुंबई : राज्यातील 29 महापालिकांचे आरक्षण सोडत जाहीर झाले आहे. यामध्ये राज्यातील १५ महापालिकांवर महिला राज असणार आहे. तर १४ ठिकाणी सर्वसाधारण वर्गाला संधी मिळणार आहे. ४ महापालिकांमध्ये ओबीसी महिला, तर ९ महापालिकांमध्ये खुल्या प्रवर्गातील महिलांसाठी आरक्षण लागू होणार आहे. आरक्षण सोडत जाहीर झाल्यानंतर मुंबई महापालिकेवर (BMC Election 2026) सर्वसाधारण महिला महापौर होणार असल्याचे स्पष्ट झाले आहे. यानंतर शिवसेना ठाकरे गटाकडून आक्षेप घेतला जात आहे. मुंबई महापौर (BMC Mayor) आरक्षण सोडतीवर माजी महापौर किशोरी पेडणेकर यांनी आक्षेप घेत आक्रमक भूमिका घेतली आहे.

मुंबई महापालिका महापौर आरक्षण सोडतीवर ठाकरे गटाने आक्षेप घेतला आहे. माजी महापौर किशोरी पेडणेकर म्हणाल्या की, मुंबईमध्ये ओबीसी महिला आत्तापर्यंत महापौर झालेली नाही. 2019 आणि 2022 मध्ये ओपन होतं. यावेळी तरी ओबीसी यायला हवं होतं. ओबीसींवर अन्याय करण्यात आला आहे. शेड्युल कास्ट किती असायला पाहिजे? आता नियम बनवला की शेड्युल ट्राईब तीन असायला पाहिजे. मात्र बीएमसीमध्ये आरक्षण सोडत ठरवून केली असल्याचा आरोप किशोरी पेडणेकर यांनी केले आहे.

हे देखील वाचा : मुंबईत महिला राज! BMC मध्ये सर्वसाधारण महिला महापौर आरक्षण सोडत जाहीर

पुढे त्या म्हणाल्या की, “आदिवासी प्रवर्ग (ST) का वगळला? किशोरी पेडणेकर यांनी सर्वात मोठा प्रश्न ‘एसटी’ प्रवर्गाबाबत विचारला. मुंबई महापालिकेत अनुसूचित जमातीचे (ST) दोन नगरसेवक निवडून आले आहेत. मग आरक्षणाची चिठ्ठी काढताना हा प्रवर्ग का वगळण्यात आला? महायुतीकडे या प्रवर्गाचे नगरसेवक नाहीत म्हणून हा जाणीवपूर्वक केलेला प्रकार आहे का?” असा सवाल त्यांनी उपस्थित केला. जाणीवपूर्वक आदिवासी प्रवर्गाला वगळण्यात आले. अचानकपणे आदिवासी प्रवर्गासाठी किमान तीन जागांचा नियम केला असल्याचा आरोप किशोरी पेडणेकर यांनी केला. सत्ताधाऱ्यांना मिळालेल्या जागांच्या आधारेच लॉटरी काढण्यात आल्याचा आरोप पेडणेकर यांनी केला.

हे देखील वाचा : २९ महानगरपालिकासांठी महापौर आरक्षण सोडत जाहीर, तुमच्या शहराचा महापौर कोण? वाचा संपूर्ण यादी

कोणत्या महापालिकेमध्ये कोणता महापौर? वाचा यादी 

आरक्षणाचे गणित

• अनुसूचित जमाती (एसटी) – १
• अनुसूचित जाती (एससी) – ३
• ओबीसी – ८
• खुला (सर्वसाधारण) प्रवर्ग – १७

प्रमुख महापालिकांमध्ये महापौर कोणत्या प्रवर्गाचा?

• नवी मुंबई – खुला प्रवर्ग (महिला)
• कल्याण-डोंबिवली – अनुसूचित जमाती (एसटी)
• ठाणे – अनुसूचित जाती (एससी)
• मुंबई (बीएमसी) – खुला प्रवर्ग
• पुणे – खुला प्रवर्ग
• पिंपरी-चिंचवड – खुला प्रवर्ग
• नाशिक – खुला प्रवर्ग
• नागपूर – खुला प्रवर्ग (महिला)
• छत्रपती संभाजीनगर – खुला प्रवर्ग (महिला)
• जालना – अनुसूचित जाती (महिला)
• लातूर – अनुसूचित जाती (महिला)
• इचलकरंजी – ओबीसी
• पनवेल – ओबीसी
• अहिल्यानगर – ओबीसी (महिला)
• अकोला – ओबीसी (महिला)
• उल्हासनगर – ओबीसी
• कोल्हापूर – ओबीसी
• चंद्रपूर – ओबीसी (महिला)
• जळगाव – ओबीसी (महिला)
• भिवंडी-निजामपूर – खुला प्रवर्ग
• मालेगाव – खुला प्रवर्ग
• मीरा-भाईंदर – खुला प्रवर्ग
• नांदेड-वाघाळा – खुला प्रवर्ग (महिला)
• परभणी – खुला प्रवर्ग
• सांगली-मिरज – खुला प्रवर्ग
• वसई-विरार – खुला प्रवर्ग
• सोलापूर – खुला प्रवर्ग
• धुळे – खुला प्रवर्ग (महिला)
• अमरावती – खुला प्रवर्ग (महिला)