दुर्दैवी ! भावाच्या लग्नाला आलेल्या बहिणीचा मृत्यू; विजेचा तीव्र धक्का बसला अन् क्षणांत होत्याचं नव्हतं झालं

नागभीड येथे स्वागत समारंभाच्या कार्यक्रमाची तयारी सुरू होती. त्यामुळे घरात आनंदी वातावरण होते. या स्वागत समारंभाच्या तयारीत घरचे सर्वच गुंतले होते. त्यात स्नेहाचाही समावेश होता.

चंद्रपूर : स्वागत समारंभाची तयारी सुरू असताना नवरदेवाच्या बहिणीस विजेचा धक्का लागला आणि यातच तिचा मृत्यू झाला. ही हृदयद्रावक घटना सोमवारी दुपारी दोन वाजताच्या दरम्यान नागभीड येथे घडली. स्नेहा विशाल वरभे (वय ३८, रा. भद्रावती) असे मृतक महिलेचे नाव असून, नागभीड येथील तिचा भाऊ अक्षय बाबुराव कायरकर याचे लग्न रविवारी ब्रह्मपुरी येथे थाटामाटात पार पडले.

सोमवारी नागभीड येथे स्वागत समारंभाच्या कार्यक्रमाची तयारी सुरू होती. त्यामुळे घरात आनंदी वातावरण होते. या स्वागत समारंभाच्या तयारीत घरचे सर्वच गुंतले होते. त्यात स्नेहाचाही समावेश होता. स्नेहा काही तरी धुण्यासाठी घराच्या बोळीत गेली आणि तिचा हाताचा एका विद्युत वायरला स्पर्श झाला आणि तिला विजेचा तीव्र धक्का बसला. हा धक्का इतका तीव्र होता की, काही कळायच्या आत क्षणात ती खाली कोसळली. तिथेच उभे असलेल्या इतर नातेवाईकांच्या लक्षात ही बाब आली आणि क्षणाचाही विलंब न लावता तिला एका खासगी रुग्णालयात दाखल करण्यात आले.

हेदेखील वाचा : चिमुकल्यावर पडली विजेची तार, मृत्यूने विळखा घातलाच होता तेवढ्यात झालं माणुसकीचं दर्शन; हृदय हेलावणारी दृश्ये अन् Video Viral

दरम्यान, स्नेहा वरभे यांची अवस्था लक्षात घेता शासकीय रुग्णालयात दाखल करण्याचा सल्ला डॉक्टरांनी दिला. लगेच तिला येथील ग्रामीण रुग्णालयात दाखल करण्यात आले. मात्र, काही अवधीतच तिचा मृत्यू झाला आणि बघता बघता आनंददायी वातावरण दुःखमय बनले. अकस्मात घडलेल्या या दुर्दैवी घटनेने सर्व कायरकर व वरभे परिवार हादरून गेला आहे. सदर मृतक महिलेला पती व दोन जुळे मुलं आहेत. सदर घटनेबद्दल नागभीड येथे हळहळ व्यक्त होत आहे.

कपडे वाळवताना लेकीला विजेचा धक्का

दुसरीकडे, पावसाळ्यात विजेचा धक्का लागून अनेक दुर्घटना घडत असल्याचे समोर आले आहे. त्यानंतर जळगाव शहरातील अक्सानगर येथे एक हृदयद्रावक घटना घडली. या दुर्घटनेत बाप आणि लेकीचा जागीच मृत्यू झाला. घराच्या छतावर कपडे वाळवत असताना उच्चदाबाच्या वीजवाहक तारेला स्पर्श झाल्याने या दोघांचा जागीच मृत्यू झाला.