Solapur News :सोलापुरात मोठा उद्योग आणणार; तरुणांचे स्थलांतर थांबविण्याचे उदय सामंत यांचे आश्वासन

Solapur News: अभिजात मराठी भाषा सप्ताहानिमित्त सोलापूर विद्यापीठात बोलताना उद्योगमंत्री उदय सामंत यांनी सोलापूर एमआयडीसीमध्ये मोठा उद्योग आणण्याचे आश्वासन दिले. स्थानिक रोजगाराच्या संधी वाढवून तरुणांचे स्थलांतर थांबविण्यावर भर देण्यात आला.

• एमआयडीसीत मोठा उद्योग आणण्याचा निर्धार
• ‘सोलापूर वृद्धांचे शहर बनू देऊ नका’
• १४६ कौशल्य अभ्यासक्रम; ३५ हजार विद्यार्थी ऑनलाइन

Solapur News : मराठी भाषेला अभिजात दर्जा मिळणे हा महाराष्ट्राच्या सांस्कृतिक इतिहासातील महत्त्वाचा टप्पा असून, अभिजात मराठी हीच आपली खरी ओळख असल्याचे प्रतिपादन उद्योग व मराठी भाषा मंत्री उदय सामंत यांनी केले. पुण्यश्लोक अहिल्यादेवी होळकर सोलापूर विद्यापीठात आयोजित ‘अभिजात मराठी भाषा सप्ताह’ कार्यक्रमात ते बोलत होते.

यावेळी त्यांनी सोलापूरच्या औद्योगिक विकासासह विद्यार्थ्यांच्या रोजगाराचा मुद्दाही उपस्थित केला. एमआयडीसीमध्ये मोठा उद्योग आणून पुणे, मुंबई आणि बंगळुरूकडे होणारे तरुणांचे स्थलांतर थांबविण्यासाठी प्रयत्न करण्याचे आश्वासन त्यांनी दिले.

एमआयडीसीत मोठा उद्योग आणण्याचा निर्धार

सोलापूरच्या औद्योगिक विकासाला गती देण्यासाठी एमआयडीसीमध्ये मोठा उद्योग आणणे गरजेचे असल्याचे सामंत यांनी सांगितले. आचारसंहिता संपल्यानंतर विद्यार्थ्यांशी चर्चा करून याबाबत ठोस पुढाकार घेण्यात येईल, असे त्यांनी स्पष्ट केले.

स्थानिक पातळीवर रोजगाराच्या संधी निर्माण झाल्यास तरुणांचे मोठ्या शहरांकडे होणारे स्थलांतर कमी होण्यास मदत होईल, असा विश्वास त्यांनी व्यक्त केला. सोलापूरच्या औद्योगिक विकासासाठी शासनाकडून आवश्यक प्रयत्न केले जातील, असेही त्यांनी सांगितले.

FDA Hits Vaijapur: वैजापूरमध्ये FDAचा दणका! नॅचरल डेअरीचा परवाना निलंबित; पनीर-तुपाचा साठा नष्ट

‘सोलापूर वृद्धांचे शहर बनू देऊ नका’

खासदार ज्योती वाघमारे यांनीही सोलापूरच्या औद्योगिक मागणीचा मुद्दा जोरदारपणे मांडला. रोजगाराच्या संधींच्या अभावामुळे तरुण पुणे, मुंबई आणि अन्य मोठ्या शहरांकडे स्थलांतरित होत आहेत. परिणामी सोलापूर ‘वृद्धांचे शहर’ बनत चालल्याची खंत त्यांनी व्यक्त केली.

एमआयडीसीमध्ये तातडीने मोठा उद्योग सुरू करण्यासाठी उद्योगमंत्र्यांनी विशेष पुढाकार घ्यावा, अशी मागणी त्यांनी केली. स्थानिक तरुणांना रोजगार मिळाल्यास शहराच्या आर्थिक विकासाला चालना मिळेल, असेही त्यांनी नमूद केले.

Maharashtra Drought Relief: दिवाळीपूर्वी शेतकऱ्यांना दुष्काळी मदत देण्याचे महसूल मंत्री बावनकुळे यांचे निर्देश

१४६ कौशल्य अभ्यासक्रम; ३५ हजार विद्यार्थी ऑनलाइन

कुलगुरू प्रा. डॉ. प्रकाश महानवर यांनी विद्यापीठातील विविध उपक्रमांची माहिती दिली. विद्यापीठात सध्या १४६ कौशल्य विकास अभ्यासक्रम सुरू असून, सुमारे ३५ हजार विद्यार्थी ऑनलाइन पद्धतीने जोडले गेल्याचे त्यांनी सांगितले. या अभ्यासक्रमांच्या विस्तारासाठी ‘स्कूल ऑफ स्किल डेव्हलपमेंट’ इमारतीचा प्रस्ताव मंजूर करण्याची मागणी त्यांनी सामंत यांच्याकडे केली.

मराठी विभागातील संशोधनासाठी प्राध्यापक पदांना मंजुरी मिळावी, अशी मागणीही त्यांनी केली. दरम्यान, दुष्काळग्रस्त तालुक्यांतील विद्यार्थ्यांचे परीक्षा शुल्क माफ करण्याच्या निर्णयाची काटेकोर अंमलबजावणी करण्याच्या सूचना सामंत यांनी कुलगुरूंना दिल्या. विद्यार्थ्यांनी सोशल मीडियावर भाषेची सभ्यता आणि संस्कार जपावेत तसेच राजकीय स्वार्थासाठी स्वतःचा वापर होऊ देऊ नये, असे आवाहनही त्यांनी केले.