शाळेचा पहिला दिवस, चिमुकल्यांनी सूर्यफूलाचे मुखवटे परिधान करून केला प्रवेश
पुणे : उन्हाळी सुट्टीनंतर आता पुढील शैक्षणिक वर्षाची सुरुवात विदर्भ वगळता इतर सर्व विभागांत आजपासून तर विदर्भात सोमवार 23 जूनपासून होत आहे. शाळा सुरू होण्याच्या पहिल्या दिवशी ‘शाळा प्रवेशोत्सवा’च्या माध्यमातून मान्यवरांच्या उपस्थितीत सर्व विद्यार्थ्यांचे स्वागत करण्यात येत आहे. अशातचं आता पुण्यातील कर्वेनगर प्रभागात विकसित केलेली भारतरत्न डॉ. ए. पी. जे. अब्दुल ई-लर्निंग स्कुल या ठिकाणीही पुन्हा एकदा मुलांच्या किलबिलाटाने परिसर दुमदुमून गेला आहे.
ज्युनिअर केजी ते इयत्ता चौथी या वर्गांतील मुलांचे शाळेच्या पहिल्या दिवशी स्वागत करताना सर्व चिमुकल्यांनी सूर्यफूलाचे मुखवटे परिधान करून अनोख्या पद्धतीने शैक्षणिक वर्षांत प्रवेश केला. विद्यार्थी वर्गातील जागृती आणि सृजनशीलता वाढवण्यासाठी राबवण्यात आलेला हा उपक्रम मुलांच्या तसेच पालकांच्या विशेष पसंतीस उतरल्याचे दिसून आले.
याप्रसंगी मुलांचे स्वागत व मुलांना पाठ्यपुस्तके-शैक्षणिक साहित्याचे किट वाटप करण्यासाठी पुणे मनपाचे अतिरिक्त आयुक्त (विशेष) ओमप्रकाश दिवटे यांनी उपस्थिती दर्शवली. त्यांनी विद्यार्थी वर्गाला तसेच शिक्षकांना मार्गदर्शन केले आणि शाळेचा आजवरचा प्रवास तसेच वैविध्यपूर्ण उपक्रमांचे भरभरून कौतुक केले. याप्रसंगी त्यांच्यासमवेत वारजे कर्वेनगर क्षेत्रीय कार्यालयाचे प्रमुख सहाय्यक महापालिका आयुक्त दीपक राऊत उपस्थित होते.
तसेच माजी नगरसेविका लक्ष्मीताई दुधाने आणि राष्ट्रवादी काँग्रेस शरदचंद्र पवार पक्षाचे कोथरूड विधानसभा अध्यक्ष स्वप्नील दुधाने यांनीही उपस्थिती दर्शवली. पुणे शिक्षण मंडळाचे सहाय्यक उपप्रशासकीय अधिकारी धनंजय परदेशी, वारजे कर्वेनगर परिसराच्या पर्यवेक्षिका अरुणा राईंज, सामाजिक कार्यकर्ते दत्तात्रय चौधरी, मुख्याध्यापिका लीना देशमुख, राजश्री भोसले, प्रीती थोरात तसेच सर्व शिक्षक वृंद, शिक्षकेतर कर्मचारी आणि पालक वर्ग आदी उपस्थित होते.
हे सुद्धा वाचा : शाळेची पहिली घंटा वाजली; उपमुख्यमंत्री अजित पवारांनी केले विद्यार्थ्यांचे स्वागत
.png "Videos"){kind=small}
