Thane News: पालिकेच्या शिक्षण विभागाच्या दारात काँग्रेसचे आंदोलन; कार्यकर्त्यांकडून जोरदार घोषणाबाजी

ठाणे महापालिकेच्या शिक्षण विभागाविरोधात काँग्रेसने आंदोलन केले. यावेळी काँग्रेसच्या कार्यकर्त्यांनी सत्ताधाऱ्याच्या निषेधार्थ फलक झळकवून घोषणाबाजी केली.

ठाणे महापालिकेच्या शिक्षण विभागातील वाढत्या अनियमितता आणि विद्यार्थ्यांच्या प्रश्नांकडे दुर्लक्ष होत असल्याचा आरोप करत ठाणे शहर जिल्हा काँग्रेसने शिक्षण विभागाच्या दारात तीव्र आणि लक्षवेधी निषेध आंदोलन छेडले. या आंदोलनाने शहराच्या शैक्षणिक व्यवस्थेतील असंतोषाला वाचा फोडली.

काँग्रेसने बुधवारी घेतलेल्या पत्रकार परिषदेनंतर, गुरुवारी प्रत्यक्ष ठाणे महापालिका शिक्षण विभागाच्या कार्यालयाबाहेर नौपाडा, विष्णुनगर येथे हे आंदोलन करण्यात आले. शहर काँग्रेस अध्यक्ष विक्रांत चव्हाण यांच्या नेतृत्वाखालील या आंदोलनात काँग्रेस प्रवक्ते राहुल पिंगळे, हिंदुराव गळवे, भालचंद्र महाडिक, जे. बी. यादव, रविंद कोळी, स्मिता वैती, महेंद्र म्हात्रे, निशिकांत कोळी, जयेश परमार, जावेद शेख यांच्यासह असंख्य पदाधिकारी आणि कार्यकर्ते सहभागी झाले होते.

‘त्यांच्या डोक्यातील ब्रेन चिप चोरी झालीय’; मत चोरीच्या आरोपांवरून CM फडणवीसांचा राहुल गांधींवर हल्लाबोल

या वेळी कार्यकर्त्यांनी हातात फलक घेत घोषणाबाजी करत महापालिका प्रशासन आणि सत्ताधाऱ्यांवर जोरदार टीका केली. शालेय शिक्षण व्यवस्थेतील ढासळलेली गुणवत्ता, विद्यार्थ्यांना आवश्यक सुविधा न मिळणे, शिक्षकांची रिक्त पदे आणि अन्य अनेक प्रश्न उपस्थित करण्यात आले.

प्रमुख मागण्यांमध्ये –

• तासिका शिक्षकांना अर्हतेनुसार कायम करणे
• रिक्त शिक्षक पदांची तत्काळ भरती
• डायरेक्ट बेनिफिशरीचे (डीबीटी) पैसे तातडीने वर्ग करण्याबरोबरच विद्यार्थ्यांसाठीच्या योजना तातडीने अंमलात आणाव्यात
• शालेय पोषण आहारात दूध, बिस्किटे, चिक्की समाविष्ट करणे
• विद्यार्थ्यांसाठी स्काऊट-गाईडचे गणवेश, बूट इ. साहित्य उपलब्ध करणे
• सर्व शाळांच्या इमारतींसाठी आयआयटी किंवा व्हीजेआयटीमार्फत स्ट्रक्चरल ऑडिट करणे
• शिक्षण समितीतील कर्मचारी व शिक्षकांचे मनपा सेवेत समायोजन करावे.
• इंग्रजी शाळांना मान्यता आणि कर्मचाऱ्यांच्या पदांना मंजूरी
• विद्यार्थ्यांच्या संख्येनुसार अद्ययावत स्वच्छतागृहे, प्रयोगशाळा, विश्रामगृहे व आरोग्य सुविधा
• शाळांमध्ये शैक्षणिक शुल्कवाढीवर नियंत्रण आणि स्वच्छतेसाठी फिरते दक्षता पथक स्थापन करणे
• पालकांसाठी नियमित मेळावे आयोजित करणे
• आरटीईची थकीत रक्कम तातडीने वर्ग करून शांळाकडून त्याचा विनियोग व्यवस्थित होतो की नाही, याची खातरजमा करावी.

या सगळ्या मागण्या निवेदनाद्वारे ठामपा शिक्षण विभागाच्या उपायुक्तांकडे सादर करण्यात आल्या. काँग्रेसने प्रशासनाला इशारा दिला की, मागण्या न मानल्यास पुढील टप्प्यात पालिका मुख्यालयासमोर साखळी उपोषण छेडण्यात येईल. या आंदोलनामुळे शहरात शिक्षण व्यवस्था सुधारण्याची मागणी पुन्हा ऐरणीवर आली आहे.