सहा महिने शिकवूनही पगार नाही! मिरा-भाईंदरमधील ४० शिक्षकांची आर्थिक कोंडी, महापालिकेच्या कारभारावर प्रश्नचिन्ह
मिरा-भाईंदर : मिरा-भाईंदर महानगरपालिकेच्या शाळांमध्ये विद्यार्थ्यांना शिक्षण देणाऱ्या ४० कंत्राटी शिक्षकांवर गेल्या सहा महिन्यांपासून विनावेतन काम करण्याची वेळ आली आहे. नियुक्तीची मुदत संपल्यानंतरही शिक्षण विभागाकडून मुदतवाढीची प्रशासकीय प्रक्रिया पूर्ण न झाल्याने या शिक्षकांचे वेतन रखडले आहे. सलग सहा महिन्यांचे वेतन मिळाले नसल्याने शिक्षकांची आर्थिक कोंडी झाली असून, वारंवार महापालिकेच्या कार्यालयात फेऱ्या मारूनही प्रश्न सुटत नसल्याने शिक्षकांमध्ये नाराजी पसरली आहे. यामुळे आता महापालिकेच्या कारभारावर प्रश्नचिन्ह उपस्थित केले जात आहे.
मिरा-भाईंदर महापालिकेच्या शहरातील विविध भागांत एकूण ३६ शाळा आहेत. या शाळांमध्ये मराठी, हिंदी, उर्दू आणि गुजराती माध्यमांतून शिक्षण दिले जाते. या शाळांमध्ये सुमारे १० हजार विद्यार्थी शिक्षण घेत आहेत. मात्र, विद्यार्थ्यांच्या संख्येच्या तुलनेत कायमस्वरूपी शिक्षकांची संख्या अपुरी असल्याने माध्यमिक आणि उच्च माध्यमिक विभागासाठी वर्षभरापूर्वी ४० शिक्षकांची कंत्राटी पद्धतीने नियुक्ती करण्यात आली होती. (फोटो सौजन्य – AI Created)
येत्या काहीच दिवसांत दिवाळी सुरु होणार आहे. ऐन सणासुदीच्या काळातही वेतन मिळाले नसल्याने शिक्षकांनी नाराजी व्यक्त केली आहे. त्यामुळे आता शिक्षकांचे वेतन कधी मिळणार आणि महापालिका काय निर्णय घेणार याकडे सर्वांचे लक्ष लागले आहे.
.png "Videos"){kind=small}
