फोटो सौजन्य सोशल मीडिया
ग्रामीण भागातील शेतकरी पाण्यासाठी संघर्ष करत असताना शहरांमध्ये नवरात्रोत्सवाच्या नावाखाली मोठ्या प्रमाणावर पैसा खर्च करून भव्य कार्यक्रम आयोजित करणे कितपत योग्य आहे, असा सवाल मराठी एकीकरण समितीने उपस्थित केला आहे.
गरबा-दांडिया कार्यक्रमांसाठी मोठे मैदान, आकर्षक रोषणाई, ध्वनीव्यवस्था, कलाकार आणि इतर व्यवस्थांवर मोठा खर्च केला जातो. यंदा राज्यातील पाणीटंचाईची परिस्थिती लक्षात घेऊन अशा खर्चिक आयोजनांवर मर्यादा आणण्याची गरज असल्याचे समितीचे म्हणणे आहे.
मराठी एकीकरण समितीचे अध्यक्ष गोवर्धन देशमुख यांनी यंदाचे मोठे गरबा-दांडिया कार्यक्रम रद्द करावेत किंवा ते अत्यंत साध्या पद्धतीने आयोजित करावेत, अशी मागणी केली आहे. उत्सवासाठी खर्च होणारा पैसा ग्रामीण भागातील पाणीपुरवठा, पिण्याच्या पाण्याच्या सुविधा आणि शेतकऱ्यांना मदत करण्यासाठी वापरल्यास त्याचा थेट फायदा संकटग्रस्त भागाला होऊ शकतो, असे त्यांनी म्हटले आहे. त्यामुळे यंदाचा उत्सव सामाजिक बांधिलकी जपत साजरा करण्याचे आवाहन करण्यात आले आहे.
राजकीय नेते, सामाजिक संस्था आणि नवरात्रोत्सव मंडळांनी राज्यातील ग्रामीण भागातील परिस्थिती लक्षात घेऊन संवेदनशील भूमिका घ्यावी, असे आवाहन समितीने केले आहे. शासन आणि प्रशासनानेही मोठ्या गरबा-दांडिया कार्यक्रमांना परवानगी देताना स्थानिक पाणीस्थिती आणि दुष्काळसदृश परिस्थितीचा विचार करावा, अशी मागणी करण्यात आली आहे.
उत्सवावर पूर्णपणे बंदी घालण्याऐवजी गरजेनुसार साधेपणाने आयोजन करून उर्वरित निधी सामाजिक कामांसाठी वापरण्याचा पर्याय स्वीकारता येईल, अशी भूमिका समितीने मांडली आहे. यंदाचा नवरात्रोत्सव केवळ मनोरंजनाचा न राहता शेतकरी आणि ग्रामीण भागाला मदतीचा हात देणारा ठरावा, अशी अपेक्षा व्यक्त करण्यात आली आहे.
.png "Videos"){kind=small}
