शुक्रवार, 21 ऑगस्ट 2026
स्वकीयांमुळेच महासभेत भाजपची कोंडी; नगरसेविका निला सोन्स यांची आक्रमक भूमिका चर्चेत
प्रभाग क्रमांक १८ मधून सलग दहाव्यांदा भाजपच्या तिकिटावर निवडून आलेल्या निला सोन्स या पक्षाच्या भूमिकेशी विसंगत वाटणाऱ्या मुद्द्यांवरही सभागृहात उघडपणे आक्षेप घेत आहेत. जनहिताच्या विरोधात किंवा चुकीचे निर्णय घेतले जात असल्याचे सांगत त्या सत्ताधाऱ्यांना प्रश्न विचारत आहेत. मालमत्ता भाड्याने देणे, करवाढ तसेच विविध नागरी प्रश्नांवर त्यांनी सातत्याने आक्रमक भूमिका घेतली आहे.
मंगळवारी झालेल्या महासभेत पालिका शाळेची इमारत भाड्याने देण्याच्या प्रस्तावाला सोन्स यांनी विरोध दर्शवला. स्वतःचा वैयक्तिक ठराव मांडण्यासाठी त्या उभ्या राहिल्या असता, त्याचवेळी सत्ताधारी पक्षाकडून दुसरा ठराव मांडण्यास सुरुवात झाल्याने सभागृहात काही काळ गोंधळाचे वातावरण निर्माण झाले. ठराव मांडण्याची मुभा नसल्याचे सांगत त्यांना संधी देण्यात आली नसल्याचा आरोपही करण्यात आला. या प्रकारानंतर काही नगरसेवकांनी सोन्स यांच्यावर पक्षांतर्गत कारवाई करण्याची मागणी केली. मात्र, या मागणीवर महापौर किंवा इतर पदाधिकाऱ्यांकडून ठोस भूमिका घेण्यात आली नसल्याचे दिसून आले.
Mira Bhayandar News: ‘महासभा लाईव्ह का नाही?’ मिरा-भाईंदर महापालिकेबाहेर समाजसेवकांचे ठिय्या आंदोलन
महासभेतील छायाचित्रण आणि चित्रीकरणास मनाई करण्याच्या निर्णयाचीही चर्चा सुरू आहे. सोन्स यांच्या महासभेतील भूमिका, व्हिडिओ किंवा छायाचित्रे समाजमाध्यमे आणि प्रसारमाध्यमांमध्ये प्रसिद्ध होऊ नयेत, यासाठीच हा निर्णय घेतला गेला असल्याची चर्चा राजकीय वर्तुळात आहे. मात्र, याबाबत अधिकृत कारण स्पष्ट झालेले नाही. महासभेचे थेट प्रक्षेपण केले जाणार असल्याचा दावा सत्ताधारी भाजपकडून करण्यात आला असला, तरी गेल्या काही महिन्यांत त्याबाबत ठोस कार्यवाही झालेली नसल्याचे विरोधकांचे म्हणणे आहे.
मिरा-भाईंदर महापालिका निवडणुकीत भाजपला ७८ जागा मिळाल्या असून काँग्रेसला १३, तर शिवसेनेला तीन जागा मिळाल्या आहेत. त्यामुळे भाजप सत्तेत असून काँग्रेस आणि शिवसेना विरोधी बाकांवर आहेत. नागरिकांच्या प्रश्नांवर विरोधकांकडून आक्रमक भूमिका अपेक्षित असताना, गेल्या काही महासभांमध्ये सत्ताधाऱ्यांना सर्वाधिक प्रश्न स्वकीय नगरसेविकेकडूनच विचारले जात असल्याचे चित्र आहे.
सोन्स यांच्या प्रश्नांना उत्तर देताना प्रशासनालाही सावध भूमिका घ्यावी लागत असल्याचे दिसून येत आहे. त्यांच्या मुद्द्यांना खोडून काढण्यासाठी तसेच त्यांच्यावर दबाव निर्माण करण्यासाठी भाजपकडून काही महिला नगरसेविकांच्या माध्यमातून सभागृहात ‘फिल्डिंग’ लावली जात असल्याची राजकीय चर्चा आहे. मात्र, त्यानंतरही सोन्स यांना गप्प करण्यात भाजपला अपेक्षित यश मिळत नसल्याचे चित्र आहे.
त्यामुळे आगामी महासभांमध्ये निला सोन्स यांची भूमिका काय राहणार आणि पक्ष त्यांच्याविरोधात कोणती भूमिका घेणार, याकडे आता राजकीय वर्तुळाचे लक्ष लागले आहे.
Mira Bhayandar News: मिरा-भाईंदर महापालिकेत पुन्हा राजकीय रणकंदन; शिवसेना नगरसेविकांचा सभात्याग
