शिवक्रांती प्रतिष्ठानचा उपक्रम यशस्वी; भिवंडीतील शिवाजी महाराज शक्तिपीठाला राज्य सरकारकडून ‘ब’ दर्जा

ठाणे जिल्ह्यातील भिवंडी तालुक्यातील मराडे पाडा येथे उभारण्यात आलेल्या भव्य छत्रपती शिवाजी महाराज शक्तिपीठाला महाराष्ट्र शासनाने पर्यटन आणि तीर्थक्षेत्र म्हणून ‘ब’ दर्जा मंजूर केला आहे.

• भिवंडीतील मराडे पाड्यातील छत्रपती शिवाजी महाराज शक्तिपीठाला राज्य शासनाकडून ‘ब’ दर्जा मंजूर.
• सुमारे ७ ते ८ कोटी रुपयांच्या खर्चातून उभारलेले भव्य मंदिर वर्षभरापूर्वी भाविकांसाठी खुले झाले.
• प्रसिद्ध शिल्पकार अरुण योगीराज यांनी साकारलेली शिवाजी महाराजांची भव्य मूर्ती हे मंदिराचे प्रमुख आकर्षण आहे.

ठाणे जिल्ह्यातील भिवंडी तालुक्यातील मराडे पाडा येथे उभारण्यात आलेल्या छत्रपती शिवाजी महाराज शक्तिपीठाला महाराष्ट्र शासनाने पर्यटन व तीर्थक्षेत्र म्हणून ‘ब’ दर्जा मंजूर केला आहे. राज्यातील हे पहिलेच भव्य स्वरूपाचे छत्रपती शिवाजी महाराजांचे मंदिर असल्याचे मानले जात असून या निर्णयामुळे या परिसराच्या पर्यटन विकासाला चालना मिळण्याची शक्यता व्यक्त केली जात आहे. तसेच स्थानिक स्तरावर रोजगाराच्या नव्या संधीही निर्माण होणार असल्याची अपेक्षा व्यक्त होत आहे. भिवंडी तालुक्यातील मराडे पाडा येथे उभारण्यात आलेले हे मंदिर अवघ्या वर्षभरापूर्वी भाविकांसाठी खुले करण्यात आले. छत्रपती शिवाजी महाराजांच्या पराक्रमाचा आणि स्वराज्य स्थापनेच्या तेजस्वी इतिहासाचा गौरव करण्याच्या उद्देशाने हे शक्तिपीठ उभारण्यात आले आहे. या मंदिराच्या उभारणीमागे शिवक्रांती प्रतिष्ठान ट्रस्ट या संस्थेचा पुढाकार असून संस्थेचे संस्थापक अध्यक्ष आणि मुख्य विश्वस्त डॉ. राजू चौधरी यांच्या मार्गदर्शनाखाली हा भव्य प्रकल्प साकारण्यात आला आहे.

Bhayander News : मानवी वस्तीत मगरीचा मुक्त संचार; मांडवी पाडा परिसरात नागरिकांमध्ये भीतीचे वातावरण

संपूर्ण प्रकल्पासाठी आठ कोटींचा खर्च

मंदिराच्या संपूर्ण प्रकल्पासाठी सुमारे सात ते आठ कोटी रुपयांचा खर्च करण्यात आला आहे. या निधीपैकी काही खर्च प्रतिष्ठानच्या माध्यमातून तर काही निधी लोकवर्गणीतून उभारण्यात आला आहे. मंदिराच्या उभारणीची रूपरेखा आणि संकल्पना ह.भ.प. डॉ. कैलास महाराज निचिते यांच्या मार्गदर्शनाखाली तयार करण्यात आली. तर मंदिराचे वास्तुशिल्प आणि अभियांत्रिकी रचना वास्तुविशारद विजयकुमार पाटील यांनी साकारली आहे.

योगीराज यांच्या मूर्तीमुळे मंदिराचे वाढले आकर्षण

या मंदिराचे आणखी एक मोठे वैशिष्ट्य म्हणजे येथे स्थापित करण्यात आलेली छत्रपती शिवाजी महाराजांची भव्य मूर्ती. ही मूर्ती सुप्रसिद्ध शिल्पकार अरुण योगीराज यांच्या हस्ते साकारण्यात आली आहे. अयोध्येतील भगवान श्रीराम यांच्या मूर्तीची निर्मिती करणारे म्हणून प्रसिद्ध असलेल्या योगीराज यांनी घडविलेल्या या मूर्तीमुळे मंदिराचे आकर्षण अधिक वाढले आहे. हे ठिकाण केवळ धार्मिकच नव्हे तर ऐतिहासिक आणि शैक्षणिक दृष्ट्याही महत्त्वाचे ठरत आहे. या शक्तिपीठात दररोज शिवभक्त आणि पर्यटक मोठ्या संख्येने भेट देत आहेत. विद्यार्थ्यांना शिवकालीन इतिहासाची माहिती मिळावी यासाठी विविध शाळांच्या शैक्षणिक सहलीही येथे आयोजित केल्या जात आहेत. मंदिर परिसरात इतिहासाचे जिवंत दर्शन घडविणाऱ्या शिल्पांमुळे विद्यार्थ्यांमध्येही या ठिकाणाबद्दल मोठी उत्सुकता निर्माण होत आहे.

Thane News: वाहनचालकांनो लक्ष द्या! कल्याण-शिळ रोडवर वाहतुकीचे निर्बंध, मेट्रो-१२ कामामुळे ‘या’ वेळेत रस्ता बंद

ब दर्जासाठी लोकप्रतिनिधींचा पाठपुरावा

• या शक्तिपीठाला पर्यटन व तीर्थक्षेत्र म्हणून ‘ब’ दर्जा मंजूर केला आहे.
• हा मानाचा दर्जा मिळवण्यासाठी स्थानिक लोकप्रतिनिधींनीही पाठपुरावा केल्याचे सांगितले जाते.
• विशेषतः किसन कथोरे यांनी सातत्याने केलेल्या प्रयत्नांमुळे हा प्रस्ताव पुढे सरकला असल्याचे सांगितले जाते. या प्रस्तावाला अंतिम मान्यता देताना राज्याचे मुख्यमंत्री देवेंद्र फडणवीस यांनी विशेष बाब म्हणून मंजुरी दिल्याचेही डॉ. राजू चौधरी यांनी स्पष्ट केले.
• या निर्णयामुळे राज्यभरातील शिवभक्त आणि पर्यटकांचे आकर्षण या शक्तिपीठाकडे अधिक वाढेल, असा विश्वास व्यक्त करण्यात येता आहे.
• पर्यटनाचा दर्जा मिळाल्यामुळे भविष्यात मंदिर परिसरातील पायाभूत सुविधा, रस्ते, पर्यटन सुविधा आणि स्थानिक व्यवसाय यांना चालना मिळेल, अशी अपेक्षा व्यक्त होत आहे.

डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.