Thane News: ठाण्यातील १५ कंत्राटी सफाई कामगारांना दिलासा; थकीत वेतनासह ७.५६ लाख रुपये जमा

Thane News: ठाणे महापालिकेतील १५ कंत्राटी सफाई कामगारांना मोठा दिलासा मिळाला आहे. श्रमिक जनता संघाच्या पाठपुराव्यानंतर त्यांच्या बँक खात्यात थकीत वेतन आणि नुकसानभरपाईचे एकूण ७ लाख ५६ हजार ७१२ रुपये जमा करण्यात आले आहेत.

• ठाणे महापालिकेच्या हद्दीतील १५ कंत्राटी सफाई कामगारांना थकीत वेतन आणि नुकसानभरपाई मिळाली
• श्रमिक जनता संघाच्या पाठपुराव्यामुळे कामगारांना आर्थिक दिलासा मिळाला.
• संबंधित कामगारांच्या बँक खात्यात एकूण ७ लाख ५६ हजार ७१२ रुपये जमा करण्यात आले.

ठाणे महानगरपालिकेच्या हद्दीत सीवर लाईन, मलटाक्या, चेंबर्स आदींची सफाई करणाऱ्या जेटिंग गाड्यांवरील १५ कंत्राटी सफाई कामगारांना थकीत वेतनाची फरकाची रक्कम व नुकसानभरपाई मिळवून देण्यात श्रमिक जनता संघ युनियनला यश आले आहे. युनियनच्या पाठपुराव्यानंतर ठाणे महानगरपालिका प्रशासनाने संबंधित कामगारांच्या बँक खात्यात एकूण ७ लाख ५६ हजार ७१२ रुपये जमा केले आहेत. त्यामुळे कामगारांमध्ये आनंदाचे वातावरण आहे.

ठाणे महानगरपालिकेच्या हद्दीत सफाईचे काम करणाऱ्या कंत्राटी कामगारांच्या वेतनातून ठेकेदार मे. ए. एम. रामचंदानी यांच्याकडून कथितरीत्या बेकायदेशीर कपात केली जात होती. तसेच कामगारांना वार्षिक भरपगारी रजा व रजेचे वेतनही दिले जात नसल्याची बाब समोर आली होती. याप्रकरणी श्रमिक जनता संघाचे सरचिटणीस जगदीश खैरालिया यांनी कामगारांच्या थकीत किमान वेतनातील फरक व भरपगारी रजेच्या वेतनाची गणना करून कामगारांच्या वतीने ठाणे कामगार उपआयुक्त कार्यालयात किमान वेतन अधिनियम, १९४८ च्या कलम २० (२) अंतर्गत वसुली दावा क्रमांक ०२/२०२५ दाखल केला होता. या दाव्यावर किमान वेतन अधिनियम, १९४८ अंतर्गत प्राधिकारी तथा सहाय्यक कामगार आयुक्त चेतन जगताप यांनी ४ मे २०२६ रोजी आदेश पारित केला.

Dombivli News: प्लास्टिक, रबर जाळल्याने प्रदूषणात भर; डोंबिवली एमआयडीसीतील कचऱ्याच्या समस्येकडे प्रशासनाचे दुर्लक्ष?

४५ दिवसांत पैसे अदा करण्याचे दिले होते निर्देश

या आदेशानुसार, ठेकेदार मे. ए. एम. रामवंदानी यांनी १५ अर्जदार कामगारांना किमान वेतनातील फरकापोटी ३ लाख ७८ हजार ३५६ रुपये आणि नुकसानभरपाई म्हणून त्याच रकमेइतकी, म्हणजेच आणखी ३ लाख ७८ हजार ३५६ रुपये, अशी एकूण ७ लाख ५६ हजार ७१२ रुपये रक्कम आदेशाच्या तारखेपासून ४५ दिवसांच्या आत अदा करण्याचे निर्देश देण्यात आले होते.

तसेच ठेकेदाराने निर्धारित मुदतीत आदेशाचे पालन न केल्यास मूळ मालक म्हणून ठाणे महानगरपालिका प्रशासनाने पुढील ६० दिवसांच्या आत संबंधित कामगारांना ही रक्कम अदा करावी, असेही आदेशात नमूद करण्यात आले होते.

Kalyan Dombivli News: कल्याण-डोंबिवली महापालिकेच्या महासभेत सचिवांच्या कामकाजावरून वाद; भाजप नगरसेवकांनीही उपस्थित केले प्रश्न

कामगारांच्या बँक खात्यात साडेसात लाख रुपये जमा

श्रमिक जनता सघ युनियनने केलेल्या सातत्यपूर्ण पाठपुराव्यामुळे ठाणे महानगरपालिका प्रशासनाने कंत्राटी कामगार कायद्याच्या कलम २१ (४) अन्वये आपल्या जबाबदारीचे पालन करत २७ ऑक्टोबर रोजी संबंधित १५ सफाई कामगारांच्या बँक खात्यात एकूण ७ लाख ५६ हजार ७१२ रुपये जमा केले. प्रत्येक कामगाराला थकबाकीपोटी ५० हजार रुपयांपेक्षा अधिक रक्कम मिळाली आहे. कामगारांची थकीत रक्कम अदा केल्याबद्दल श्रमिक जनता संघाच्या वतीने चिटणीस सुनील दिवेकर यांनी ठाणे महानगरपालिका प्रशासनाचे आभार मानले.

(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)