सोमवार, 5 ऑक्टोबर 2026
Ujani Dam Private Fishing Contract
Devendra Fadnavis : २०२७ हे ‘मेट्रो वर्ष’ ठरावे, मुख्यमंत्री फडणवीसांचे मोठे वक्तव्य
उजनी धरण परिसरातील हजारो मच्छीमार कुटुंबांचा पारंपरिक मासेमारी व्यवसाय हा त्यांच्या उदरनिर्वाहाचा प्रमुख आधार आहे. मात्र, धरणावरील खाजगी मासेमारी ठेक्यामुळे पारंपरिक मच्छीमारांच्या व्यवसायावर परिणाम होण्याची शक्यता व्यक्त करत इंदापूर तालुक्यातील मच्छीमार संघटना, महाराष्ट्र राज्य मच्छीमार संघर्ष कृती समिती तसेच उजनी मच्छीमार बचाव अभियानाच्या वतीने ठेका प्रक्रियेला विरोध करण्यात आला होता. यासंदर्भात कृषीमंत्री दत्तात्रय भरणे यांच्याकडे ठेका रद्द करण्याची मागणी करण्यात आली होती.
मच्छीमारांच्या मागणीसाठी संबंधित संघटनांनी पुणे जिल्हाधिकारी कार्यालयासमोर ‘थाळी बजाव’ आंदोलनाचा इशारा दिला होता. त्यानंतर सिंचन भवन येथे आंदोलन करण्यात आले, तर उजनी तलावात जलसमाधी आंदोलन करून मच्छीमारांनी आपल्या मागण्यांकडे प्रशासनाचे लक्ष वेधले होते.या आंदोलनाची आणि मच्छीमारांच्या उपजीविकेच्या प्रश्नाची दखल घेत कृषीमंत्री दत्तात्रय भरणे यांनी उजनी धरणावरील खाजगी मासेमारी ठेका प्रक्रियेला तातडीने स्थगिती देऊन ती रद्द करण्याची मागणी जलसंपदा विभागाकडे केली होती. त्यानंतर मच्छीमारांच्या मागणीवर तोडगा काढण्यासाठी संबंधितांची बैठक घेण्यात आली.
जलसंपदा मंत्री राधाकृष्ण विखे-पाटील यांच्या उपस्थितीत झालेल्या बैठकीत उजनी धरणावरील खाजगी मासेमारी ठेका प्रक्रिया रद्द करण्याचा निर्णय घेण्यात आला. मच्छीमारांचा पारंपरिक व्यवसाय, त्यांच्या कुटुंबांचा उदरनिर्वाह आणि भविष्यातील रोजगाराचा प्रश्न लक्षात घेऊन हा निर्णय घेण्यात आल्याने मच्छीमार समाजात समाधानाचे वातावरण निर्माण झाले आहे.
या बैठकीस ऑनलाईन हर्षवर्धन पाटील, आमदार अभिजित पाटील, आमदार समाधान आवताडे, माजी आमदार संजय शिंदे, प्रधान सचिव एकनाथ डवले, कृष्णा खोरे विकास महामंडळाचे कार्यकारी संचालक एस. डी. चोपडे, जलसंपदा विभाग पुणेचे मुख्य अभियंता प्रवीण कोल्हे यांच्यासह संबंधित अधिकारी उपस्थित होते. तसेच मच्छीमार समाजाच्या वतीने उज्वला परदेशी, संजय दरदरे, चंद्रकांत भोई, बाळासाहेब काळे, अनिल नगरे, सिताराम नगरे, नंदकुमार नगरे, लक्ष्मण शिर्के, नितीन ईरीचे, युवराज नगरे, नवनाथ परदेशी आदी पदाधिकारी उपस्थित होते.
उजनी धरणावर पारंपरिक पद्धतीने मासेमारी करून आपल्या कुटुंबाचा उदरनिर्वाह करणाऱ्या मच्छीमारांच्या हिताचा विचार करून खाजगी मासेमारी ठेका प्रक्रिया रद्द करण्याचा निर्णय घेण्यात आल्याने इंदापूर तालुक्यासह उजनी धरण परिसरातील मच्छीमार बांधवांना मोठा दिलासा मिळाला आहे. या निर्णयासाठी मच्छीमार बांधवांनी कृषीमंत्री दत्तात्रय भरणे यांचे आभार मानले. पारंपरिक मच्छीमारांच्या उपजीविकेला संरक्षण मिळावे, यासाठी सुरू असलेल्या लढ्याला या निर्णयामुळे महत्त्वाचे यश मिळाले असल्याची भावना मच्छीमार बांधवांनी व्यक्त केली.
