Umbraj News: उंब्रज जिल्हा परिषद शाळेत निकृष्ट कामामुळे ग्रॅनाईट कोसळले (Photo Credit- X)
शाळेतील विद्यार्थ्यांच्या सुरक्षेशी कोणतीही तडजोड केली जाणार नाही, असा स्पष्ट इशारा देत त्यांनी संबंधित बांधकामाची प्रत्यक्ष पाहणी केली. निकृष्ट कामाचा पंचनामा करून संबंधितांकडून खुलासा मागविण्याचे निर्देश देतानाच जिल्ह्यातील जिल्हा परिषद शाळांमध्ये सुरू असलेल्या बांधकामांचीही तपासणी करून दोषी आढळल्यास कठोर कारवाई करण्यात येईल, अशी तंबी त्यांनी दिली.
सोमवारी (दि. १०) सकाळी शाळेत प्रार्थना सुरू असताना खिडकीला बसविण्यात आलेले ग्रॅनाईट अचानक निसटून खाली कोसळले. यामध्ये यश अजय चव्हाण याच्या पायाला गंभीर दुखापत होऊन त्याला दोन टाके घालावे लागले. प्रथमेश विनोद जाधव याच्या डोक्याला ग्रॅनाईटचा तुकडा लागल्याने त्याला दुखापत झाली असून, अधिक तपासणीसाठी पालकांनी त्याला कराड येथे सिटी स्कॅनसाठी नेले. आणखी एका विद्यार्थ्याच्या पायाला किरकोळ दुखापत झाली.
या घटनेने शाळेच्या बांधकामाच्या गुणवत्तेचा प्रश्न ऐरणीवर आला आहे. नवीन इमारतीचे बांधकाम गेल्या काही महिन्यांपासून सुरू असून काम अत्यंत निकृष्ट दर्जाचे असल्याचा आरोप पालकांनी केला आहे. “ठेकेदाराच्या निष्काळजीपणामुळे विद्यार्थ्यांच्या जीवाशी खेळ झाला आहे. संपूर्ण कामाची सखोल चौकशी करून दोषी ठेकेदाराला काळ्या यादीत टाकावे,” अशी मागणी जखमी विद्यार्थी प्रथमेशचे वडील विनोद जाधव यांनी केली.
शिक्षण सभापती तेजस्विनी कदम यांच्या पाहणीदरम्यान आणखी एक गंभीर बाब समोर आली. शाळेतील सुरू असलेल्या बांधकामाची साधी वर्क ऑर्डरची स्थलप्रतदेखील शाळेत उपलब्ध नसल्याचे निदर्शनास आले. त्यामुळे जिल्हा परिषद बांधकाम विभागाकडून सुरू असलेल्या कामावर प्रत्यक्ष देखरेख कितपत केली जाते, असा सवाल उपस्थित झाला आहे.
शाळेच्या बांधकामाची पाहणी करताना कदम यांनी संबंधित अधिकारी, ठेकेदार आणि उपस्थित पदाधिकाऱ्यांकडून कामाची माहिती घेतली. विद्यार्थ्यांच्या सुरक्षेच्या दृष्टीने धोकादायक असलेले बांधकाम तातडीने दुरुस्त करण्याच्या सूचना देण्यात आल्या.
दरम्यान, जिल्हा परिषद सदस्य रणजित जाधव, मुख्याध्यापक, संबंधित ठेकेदार, शाळा व्यवस्थापन समितीचे पदाधिकारी, पालक आणि ग्रामस्थांनीही घटनास्थळी पाहणी केली. दोषींवर कडक कारवाई करण्याचा इशारा पालकांनी दिला आहे.
“विद्यार्थी ही आपली जबाबदारी आहे. त्यांच्या जीविताशी संबंधित कामात हलगर्जीपणा अजिबात खपवून घेतला जाणार नाही,” या भूमिकेतून शिक्षण सभापती तेजस्विनी कदम यांनी घेतलेल्या आक्रमक पवित्र्यामुळे जिल्हा परिषद बांधकाम विभागातील अधिकारी आणि ठेकेदारांमध्ये खळबळ उडाली आहे.
उंब्रजच्या घटनेने केवळ एका शाळेतील निकृष्ट बांधकामाचा मुद्दा समोर आणला नसून, जिल्ह्यातील सर्व जिल्हा परिषद शाळांच्या बांधकामांच्या गुणवत्तेचे स्वतंत्र ऑडिट करण्याची गरज अधोरेखित केली आहे. आता शिक्षण सभापतींच्या आदेशानंतर संबंधित यंत्रणा प्रत्यक्षात किती कठोर कारवाई करते, याकडे पालक आणि ग्रामस्थांचे लक्ष लागले आहे.
.png "Videos"){kind=small}
