चिखलमय रस्ते आणि वाहतूक कोंडी; पिंपरी-चिंचवडकरांना अवकाळी पावसाचा मोठा तडाखा
PCMC Unseasonal Rain: अवकाळी पावसाच्या पहिल्याच सरीत पिंपरी-चिंचवड शहरातील पायाभूत सुविधांची पोलखोल झाली असून महापालिकेच्या मान्सूनपूर्व नियोजनातील त्रुटी पुन्हा एकदा समोर आल्या आहेत. अचानक झालेल्या मुसळधार पावसामुळे रस्त्यांवर पाणी साचणे, वाहतूक कोंडी आणि वीजपुरवठा खंडित होणे अशा समस्यांनी नागरिकांना मोठा त्रास सहन करावा लागला.सोमवारी (दि. ३०) दुपारी मेघगर्जना आणि गारांच्या सरींसह सुमारे एक ते दोन तास कोसळलेल्या पावसाने शहरातील जनजीवन विस्कळीत केले. अनेक भागांत पाणी साचल्यामुळे वाहतुकीचा वेग मंदावला, तर काही ठिकाणी पूर्णतः ठप्प झाला.
प्रमुख चौकांमध्ये वाहतूक कोंडी
महापालिकेकडून सुरू असलेल्या खोदकामामुळे शहरातील अनेक रस्ते चिखलमय झाले आहेत. विशेषतः निगडी ते दापोडी मार्गावरील सर्व्हिस रस्त्यावर भूमिगत जलवाहिनी टाकण्याचे काम सुरू असल्याने संत तुकारामनगर मेट्रो स्थानक परिसरात मोठ्या प्रमाणात चिखल साचल्याचे दिसून आले. चिंचवड स्टेशन परिसरातही अशीच परिस्थिती निर्माण झाली होती. यामुळे वाहन घसरून अपघात होण्याच्या घटना घडल्या.पावसाळ्यापूर्वी नाले व गटारे साफ न केल्यामुळे अनेक ठिकाणी पाणी साचले. उघडी गटारे आणि चेंबरची झाकणे नसल्याने नागरिकांच्या सुरक्षिततेचा प्रश्न निर्माण झाला. काही भागांत वीजपुरवठा खंडित झाल्याने सिग्नल यंत्रणा बंद पडली आणि प्रमुख चौकांमध्ये वाहतूक कोंडी झाली.
अवकाळी पावसामुळे कांदा उत्पादकांना मोठा फटका;
ऐन पावसात वाहनचालकांना कोंडीत अडकून त्रास सहन करावा लागला, तर दुचाकीस्वारांना भिजत प्रवास करावा लागला. याशिवाय, काही ठिकाणी झाडांच्या फांद्या कोसळल्या, तर जोरदार वाऱ्यामुळे जाहिरात फलकांचे फ्लेक्स फाटून उडत असल्याचे चित्रही पाहायला मिळाले. अचानक आलेल्या पावसामुळे अनेक नागरिक विविध ठिकाणी अडकून पडले.या संपूर्ण घटनेतून महापालिका प्रशासनाच्या मान्सूनपूर्व तयारीचा अभाव स्पष्ट झाला असून, आगामी पावसाळ्याच्या पार्श्वभूमीवर तातडीने ठोस उपाययोजना करण्याची गरज व्यक्त होत आहे.
ऐन उन्हाळ्यात कडाक्याच्या उष्णतेने हैराण झालेल्या पुणेकरांना सोमवारी दुपारनंतर अवकाळी पावसाने दिलासा दिला. पाऊस अचानक आल्याने पुणेकरांची मोठी तारांबळही उडवली. सोसाट्याचा वारा, मेघगर्जना आणि विजांच्या कडकडाटासह झालेल्या पावसाने अनेक ठिकाणी झोडपून काढले. बाणेर, बालेवाडी व पाषाण, सुस परिसरात गारांचा वर्षावही झाला. दुपारपर्यंत निरभ्र असलेल्या आकाशाने सुमारे तीनच्या सुमारास अचानक काळे ढग दाटून आले आणि पावसाने जोर धरला.
सिंहगड रस्ता, नगर रोड, वडगाव शेरी, विमान नगर, चंदन नगर, कल्याणी नगर, लोहगाव, मुंढवा, केशवनगर, कोरेगाव पार्क, वाघोली, फुरसुंगी, औंध, डेक्कन, स्वारगेट आणि शिवाजीनगर या भागांत पावसाचा जोर अधिक होता. काही ठिकाणी सखल भागांत पाणी साचल्याने वाहतुकीवर परिणाम झाला. अचानक आलेल्या पावसामुळे शहरातील सिग्नल यंत्रणा विस्कळीत झाली. प्रमुख चौकांमध्ये वाहतूक कोंडी झाली. वाऱ्याच्या वेगामुळे अनेक ठिकाणी झाडांच्या फांद्या तुटून पडल्या, तर पार्किंगमध्ये उभ्या वाहनांचे नुकसान झाले. रस्त्यावरील फेरीवाले आणि दुचाकीस्वारांची मोठी गैरसोय झाली.
