Bajaj Chetak EV Customer Complain
सौ. प्रमिला चव्हाण यांनी २९ मे २०२६ रोजी वाई येथील स्वामी मोटार्स या बजाज कंपनीच्या डीलरकडून इलेक्ट्रिक बजाज चेतक खरेदी केली. वाहनाची डिलिव्हरी घेताना सलग सुट्ट्या असल्याचे सांगून संबंधित डीलरने, “तुम्ही गाडी घेऊन जा, मी पासिंग करून घेतो,” असे आश्वासन दिल्याचे सौ. चव्हाण यांनी सांगितले. डीलरच्या या आश्वासनावर विश्वास ठेवून त्यांनी वाहन ताब्यात घेतले. मात्र, त्यानंतर वाहनाचे पासिंग करून मिळवण्यासाठी वारंवार संपर्क साधूनही त्यांना समाधानकारक प्रतिसाद मिळाला नसल्याचे त्यांनी तक्रारीत म्हटले आहे.
वाहन पासिंगबाबत डीलरकडे वारंवार फोन केला असता, “मी आजारी आहे, दवाखान्यात आहे,” तसेच “माझ्या बायकोची डिलिव्हरी झाली आहे,” अशी विविध कारणे सांगण्यात आल्याचे सौ. चव्हाण यांनी नमूद केले. त्यानंतर “तुमच्या पासिंगसाठी सातारला आलो आहे,” असेही सांगण्यात आले. दरम्यान, डीलरने दोन वेळा फोन करून वाहनाच्या पासिंगसाठी ओटीपी मागितला. सौ. चव्हाण यांनी ओटीपी दिल्यानंतर दोन दिवसांनी नंबरप्लेट बसवून जा, असे सांगण्यात आल्याचे त्यांनी सांगितले. मात्र, त्यानंतरही वाहनाचे पासिंग पूर्ण झाले नसल्याचा आरोप आहे.
२९ मे रोजी वाहन खरेदी केल्यानंतर साडेतीन महिन्यांपासून पासिंग करून मिळावे, यासाठी डीलरकडे वारंवार पाठपुरावा करत असल्याचे सौ. चव्हाण यांनी सांगितले. मात्र, आजतागायत वाहनाचे पासिंग करून देण्यात आले नसल्याने ग्राहक म्हणून आपली मोठी अडचण होत असल्याची भावना त्यांनी व्यक्त केली. वाहन खरेदी केल्यानंतर त्याची नोंदणी, आवश्यक कागदपत्रे आणि नंबरप्लेट याबाबत ग्राहकाला स्पष्ट माहिती देणे आवश्यक असताना आपल्याला वारंवार आश्वासने देऊनही काम पूर्ण झाले नसल्याचे सौ. चव्हाण यांनी म्हटले आहे.
सरकारी नियमांनुसार वाहनाची नोंदणी व आवश्यक प्रक्रिया पूर्ण करूनच ग्राहकाला वाहन ताब्यात देणे अपेक्षित असताना, पासिंग न झालेली गाडी ग्राहकाच्या ताब्यात कशी देण्यात आली, असा सवाल सौ. चव्हाण यांनी उपस्थित केला आहे.
वाहनाची नोंदणी प्रलंबित असताना ग्राहकाला वाहन वापरण्यास देणे योग्य आहे का, याची संबंधित विभागाने चौकशी करावी. तसेच वाहन पासिंगची जबाबदारी असलेल्या डीलरकडून ग्राहकाची गैरसोय का झाली, याचे स्पष्टीकरण कंपनीकडून मिळणे आवश्यक आहे.
वाहनाचे पासिंग प्रलंबित असताना रस्त्यावर वाहन चालविताना अपघात झाल्यास किंवा काही अनुचित घटना घडल्यास त्याची जबाबदारी कोण घेणार, असा गंभीर प्रश्न सौ. चव्हाण यांनी उपस्थित केला आहे.“बजाज कंपनीच्या अधिकृत डीलरकडून वाहन खरेदी करूनही साडेतीन महिन्यांपासून पासिंगसाठी पाठपुरावा करावा लागत आहे. डीलरने दिलेल्या आश्वासनावर विश्वास ठेवून वाहन घेतले. मात्र, अद्याप पासिंग झालेले नाही. अशा परिस्थितीत ग्राहकांच्या सुरक्षिततेची जबाबदारी कोणाची?” असा सवाल त्यांनी केला आहे.
या प्रकरणाची संबंधित परिवहन विभागाने चौकशी करून वाहनाचे पासिंग तातडीने करून द्यावे. तसेच ग्राहकांना वाहन खरेदीच्या वेळी आवश्यक कागदपत्रे, नोंदणीची स्थिती आणि वाहन वापराबाबत स्पष्ट माहिती देण्याची व्यवस्था करावी, अशी मागणी सौ. प्रमिला चव्हाण यांनी केली आहे.
सांगली शिक्षक बँकेत सभेदरम्यान गोंधळ, तरीही ४ मोठे निर्णय; मासिक वर्गणी १३०० वरून १ हजारावर
.png "Videos"){kind=small}
