पुणे : राजगड (Rajgad) किल्ल्याच्या पायथ्याला मृतावस्थेत सापडलेल्या दर्शना पवार (Darshana Pawar) हिचा खून (Crime) झाल्याची धक्कादायक माहिती शवविच्छेदन अहवालातून उघड झाली आहे. दर्शना आणि तिचा मित्र राजगड किल्ल्यावर फिरायला गेले होते. दर्शनाचा मित्र पसार झाला असून त्याने तिचा खून केल्याचा संशय पोलिसांनी व्यक्त केला आहे. पसार झालेल्या मित्राचा माग काढण्यासाठी पोलिसांची पथके रवाना झाली आहेत.
दर्शना दत्ता पवार (वय २६, रा. कोपरगाव, जि. नगर) असे खून झालेल्या तरुणीचे नाव आहे. दर्शना राज्य लोकसेवा आयोगाच्या (एमपीएससी) परीक्षेत राज्यात तिसऱ्या क्रमांकाने उत्तीर्ण झाली होती. वनपरिक्षेत्र अधिकारी म्हणून तिची निवडही झाली होती.
नेमकं काय घडलं?
पुण्यातील एका संस्थेकडून तिचा सत्कार आयोजित करण्यात आला होता. नऊ जून रोजी ती पुण्यात आली होती. नऱ्हे परिसरात एका मैत्रिणीकडे ती राहत होती. १२ जून रोजी सिंहगडावर जायचे आहे, असं मैत्रिणीला सांगून ती घराबाहेर पडली. दर्शनाने कुटुंबीयांना याबाबत माहिती दिली होती. तिच्यासोबत राहुल दत्तात्रय हंडोरे हा मित्र होता. १२ जूनला तिच्या कुटुंबीयांनी संपर्क साधल्यावर मोबाइल बंद असल्याचे लक्षात आले. त्यानंतर कुटुंबीयांनी शोध सुरू केला. मात्र, तिचा ठावठिकाणा न लागल्याने कुटुंबीयांनी दर्शना बेपत्ता असल्याची तक्रार सिंहगड रस्ता पोलिसांत दिली.
दर्शनाचा मित्र बेपत्ता
दर्शनाचा मित्र राहुल हंडोरे बेपत्ता झाल्याचे निदर्शनास आल्यानंतर त्याच्या कुटुंबीयांनीही तो बेपत्ता झाल्याची तक्रार वारजे पोलिस ठाण्यात दिली. राजगड किल्ल्याच्या पायथ्याशी सतीचा माळ परिसरात रविवारी दर्शनाचा मृतदेह कुजलेल्या अवस्थेत सापडला.
राहुल गडावरून एकटाच खाली आला
दर्शना आणि तिचा मित्र राहुल १२ जून रोजी दुचाकीवरून वेल्हे तालुक्यातील राजगड किल्ला परिसरात गेले. सकाळी सव्वासहाच्या सुमारास दोघे जण गडाच्या पायथ्याशी पोहोचले. दोघांनी गड चढायला सुरुवात केली. सकाळी दहाच्या सुमारस राहुल गडावरून एकटाच खाली आला. राजगड किल्ल्याच्या पायथ्याशी असलेल्या हॉटेलच्या परिसरातील सीसीटीव्ही चित्रीकरणातून ही माहिती उपलब्ध झाली आहे. राहुल फरार झाला असून, पोलिस त्याचा शोध घेत आहेत.
.png "Videos"){kind=small}
