Ashok Kharat Case : वर्षातून तीनदा परदेशात जाऊन पूजा केल्यास भरभराट; खरात मारायचा मोठमोठ्या थापा
नाशिक : नाशिकच्या वादग्रस्त ‘कॅप्टन’ अशोक खरात ऊर्फ ‘कॅप्टन बाबा’ याच्या पापाचा घडा आता आर्थिक फसवणुकीच्या गुन्ह्यांनी भरू लागला आहे. 31 डिसेंबरला परदेशात विशेष पूजा केल्यास ‘विशेष लाभ’ मिळतो. तसेच वर्षातून तीनवेळा अशी पूजा केल्यास भरभराट होईल, अशी अपेक्षा दाखवत एका सधन भक्ताला लाखो रुपयांना गंडा घातल्याचा प्रकार उघडकीस आला आहे.
धक्कादायक म्हणजे, आत्तापर्यंत खरातवर ७ बलात्काराचे गुन्हे दाखल असताना, आर्थिक फसवणुकीसह खंडणीचा हा पहिलाच गुन्हा दाखल झाला आहे. फिर्यादीनुसार, खरातने परदेशात मौजमजेसाठी भक्तांच्या खिशांवर डल्ला मारला. आपले कल्याण होईल, या आशेवर फिर्यादीच्या खिशाला सोयीस्कर खिंडार पाडले. ३१ डिसेंबरला परदेशात केलेली पूजा अत्यंत फलद्रूप ठरते, असे सांगून त्याने अनेक भाकडकथा भक्ताला ऐकवल्या. अंधश्रद्धेपोटी फिर्यादीला खरातचा अंतस्थ हेतू लक्षात आला नाही.
खरात प्रकरणातील संवेदनशीलता लक्षात घेऊन राज्य सरकारने स्थापन केलेले विशेष तपास पथक अत्यंत गोपनीय आणि प्रभावी पद्धतीने कार्य करत आहे. या पथकाचे नेतृत्व तेजस्विनी सातपुते करत असून, त्यांच्यासोबत महिला पोलीस निरीक्षक तृप्ती देसाई व इतर अधिकारी महिलांच्या सुरक्षेची विशेष काळजी घेत आहेत. पीडित महिलांची ओळख उघड होऊ नये, याची पूर्णतः खबरदारी घेतली जाते. तपासासाठी किंवा घटनास्थळाच्या पाहणीसाठी नेताना महिलांची गोपनीयता जपण्यावर पथकाचा भर आहे.
दबावापोटी महिला पुढे नाही
अनेकदा सामाजिक दबावापोटी पीडित महिला पुढे येत नाहीत. अशा वेळी केवळ महिलेचेच नव्हे, तर त्यांच्या कुटुंबियांचेही समुपदेशन करून त्यांना न्याय मिळवण्यासाठी प्रोत्साहित केले जात आहे. तपासाच्या प्रक्रियेत पीडितांना कोणत्याही दडपणाखाली वाटू नये, यासाठी पोलीस प्रशासन अत्यंत संवेदनशीलतेने पावले उचलत आहे.
दरम्यान, खरात प्रकरणातील काही व्हिडीओ हे सोशल मीडियावर सहजतेने अपलोड केले जात आहेत. यामुळे महिलेसह तिच्या कुटुंबियांची बदनामी होते. हे प्रकार थांबवण्याचे आवाहन विशेष तपास पथकाने केले होते. मात्र, तरीही वेगवेगळ्या समाज माध्यमांवर व्हिडीओ अपलोड केले जात आहेत. एका प्रकरणात एसआयटीने आहिल्यानगरमधील एकाविरोधात नोटीस बजावून सुद्धा त्याने दुर्लक्ष केले. त्या व्यक्तीविरोधात बुधवारी (दि.२५) रात्री गुन्हा दाखल होण्याचे संकेत संबंधित पोलिस अधिकाऱ्याने दिले.
खंडणीचा पहिलाच गुन्हा
अशोक खरातवर आतापर्यंत नाशिकच्या सरकारवाडा पोलीस ठाण्यांत ७ बलात्काराचे गुन्हे दाखल आहेत. मात्र, परदेशातील पूजेच्या आमिषाने केलेली ही आर्थिक लूट पाहता, खरातने केवळ शारीरिकच नव्हे, तर मोठ्या प्रमाणावर आर्थिक साम्राज्यही उभे केल्याचे स्पष्ट होत आहे. बलात्काराच्या गुन्ह्यांच्या मालिकेव्यतिरिक्त हा पहिलाच आर्थिक फसवणुकीचा गुन्हा ठरल्याने पोलिसांच्या तपासाची दिशा आता खरातच्या बँक खात्यांकडे आणि परदेश वाऱ्यांकडे वळली आहे.
उशिरापर्यंत गुन्हा दाखल
अशोक खरातची वरिष्ठ राजकीय नेत्यांमधील उठबस पाहून भक्ताचा त्याच्यावर विश्वास बसला होता. वर्षातून तीन वेळा आणि सलग पाच वर्षे ही पूजा केल्यास अमाप श्रीमंती मिळेल, अशी फेकाफेक खरातने केली होती. मात्र, खरातचा खरा चेहरा समोर आल्यानंतर फिर्यादीला आपली फसवणूक झाल्याचे लक्षात आले आणि त्यांनी सरकारवाडा पोलीस ठाणे गाठले. रात्री उशिरापर्यंत या गुन्ह्याची नोंद झाली.
