Yavatmal ५५९ गावांना कृषी संजीवनीचा आधार! जलसंधारणापासून कृषिपूरक व्यवसायापर्यंत शेतकरींना अर्थसहाय्य
Yavatmal News: यवतमाळ जिल्ह्यात हवामान बदलाच्या वाढत्या संकटामुळे पावसाची अनिश्चितता, पावसातील खंड, वाढता उत्पादन खर्च आणि शेतीसमोरील विविध जोखमींनी शेतकऱ्यांसमोर आव्हानांची मालिका उभी आहे. या पार्श्वभूमीवर शेती अधिक सक्षम, शाश्वत आणि हवामान बदलाला अनुकूल करण्यासाठी राबविण्यात येणाऱ्या नानाजी देशमुख कृषी संजीवनी प्रकल्पाच्या (पोकरा) टप्पा-२ला जिल्ह्यात गती मिळाली आहे. जिल्ह्यातील तब्बल ५५९ गावांमध्ये या प्रकल्पाची अंमलबजावणी सुरू असून, पात्र अल्प व अत्यल्पभूधारक शेतकरी तसेच शेतकरी गटांना विविध घटकांसाठी अर्थसहाय्य उपलब्ध करून देण्यात येत आहे.(फोटो सौजन्य – AI)
Yavatmal News: पोलिसांना सुसज्ज वसाहतींची प्रतीक्षा कायम! शासनाने मागवली निवासांची माहिती
पोकरा २मध्ये ऑनलाइन प्रक्रियेला विशेष महत्त्व देण्यात आले आहे. महाडीबीटीऐवजी स्वतंत्र पोर्टलवर अर्ज व पुढील प्रक्रिया केली जात आहे. अर्जाची स्थिती, लाभार्थी यादी आणि आधारविषयक माहिती तपासण्याची सुविधा उपलब्ध आहे. लाभासाठी सातबारा, ८-अ, आधार कार्ड व बँक पासबुक आवश्यक असून, पूर्वसंमती, कामाची पाहणी आणि देयक प्रक्रिया हे महत्त्वाचे टप्पे आहेत. पोकराच्या माध्यमातून विविध घटकांना अर्थसहाय्य मिळत असले तरी योजनेच्या अंमलबजावणीबाबत शेतकऱ्यांकडून अपेक्षा व्यक्त होत आहेत. अर्ज प्रक्रिया सुलभ करणे, लाभाची रक्कम वाढविणे, अनुदान वेळेत खात्यावर जमा करणे आणि गावपातळीवर जनजागृती वाढविण्याची मागणी आहे. डिजीटल प्रक्रियेत येणाऱ्या अडचणी दूर करण्यासाठी प्रभावी मार्गदर्शन करण्याची गरज आहे.
जिल्ह्यात पोकरा-२च्या माध्यमातून कृषी संलग्न व्यवसायांसाठी ६० टक्क्यांपर्यंत अर्थसहाय्य उपलब्ध करून देण्यात येत असल्याची माहिती कृषी विभागाने दिली आहे. या योजनेचा लाभ घेऊ इच्छिणाऱ्या पात्र गटांकडून ऑनलाइन अर्ज मागविण्यात येतात. शेतीपूरक व्यवसायांना आर्थिक पाठबळ मिळाल्यास शेतकऱ्यांच्या उत्पन्नाचे स्रोत विविध होण्यास मदत होऊ शकते, हा या योजनेचा उद्देश आहे.
पोकरा-२चे वैशिष्ट्य केवळ एखाद्या कृषी निविष्ठेपुरते किया अनुदानापुरते मर्यादित नाही. पाणी, माती, पीक पद्धती आणि शेतकऱ्याचे उत्पन्न या सर्व बाबींचा एकत्रित विचार करून शेती अधिक सक्षम करण्यावर या प्रकल्पातून भर देण्यात येत आहे. जिल्ह्यातील शेततळे, सिंचन सुविधा, फळबाग लागवड, कृषी यांत्रिकीकरण, कृषी प्रक्रिया, शेतकरी गट, महिला बचत गट तसेच विविध कृषिपूरक व्यवसायांना या माध्यमातून चालना दिली जात आहे. त्यामुळे पारंपरिक शेतीसोबत उत्पन्नाचे पर्यायी स्रोत निर्माण करण्याच्या दृष्टीनेही पोकरा-२ महत्त्वपूर्ण ठरत आहे.
.png "Videos"){kind=small}
