(फोटो सौजन्य- इन्स्टाग्राम)
एस. एस. राजामौली यांचा नवा मेगा अॅक्शन-अॅडव्हेंचर चित्रपट ‘वाराणसी’ सध्या प्रेक्षकांना सर्वात जास्त उत्सुकता असलेला चित्रपट आहे. या चित्रपटात महेश बाबू, प्रियांका चोप्रा आणि पृथ्वीराज सुकुमारन मुख्य भूमिकेत आहेत, त्यामुळे चाहत्यांचा उत्साह आणखी वाढला आहे.
अलीकडेच रामोजी फिल्म सिटीमध्ये झालेल्या ‘ग्लोब ट्रॉटर’ या भव्य कार्यक्रमात चित्रपटाची पहिली झलक दाखवण्यात आली. या इव्हेंटला ५० हजारांहून अधिक चाहते उपस्थित होते. हा कार्यक्रम केवळ मोठा फॅन इव्हेंटच नव्हता, तर भारतामधील आतापर्यंतचा सर्वात मोठा फिल्म रिव्हील म्हणून ओळखला जात आहे.
चित्रपटाची झलक समोर आल्यानंतर त्याविषयीचा उत्साह आणखी वाढला आहे. विशेष म्हणजे, जागतिक कीर्तीचे दिग्दर्शक जेम्स कॅमेरॉन यांनीही ‘वाराणसी’च्या सेटवर भेट देण्याची इच्छा व्यक्त केली आहे. त्यांनी ही इच्छा स्वतः एस. एस. राजामौली यांच्याशी शेअर केली असून, यामुळे या चित्रपटाविषयीची जागतिक पातळीवरील वाढती उत्सुकता स्पष्टपणे दिसून येते.
अलीकडेच अवतार: फायर अॅण्ड अॅशच्या प्रदर्शनापूर्वी सिनेविश्वातील दोन दिग्गज जेम्स कॅमेरॉन आणि एस. एस. राजामौली यांच्यात व्हिडिओ कॉलवर संवाद झाला. याच संवादादरम्यान जेम्स कॅमेरॉन यांनी ‘वाराणसी’च्या सेटवर येण्याची इच्छा व्यक्त केली.
जेम्स कॅमेरॉन म्हणाले,
“हे आमच्यासाठी अत्यंत आनंददायी आहे आणि पुन्हा एकदा धन्यवाद. मला वाटतं की चित्रपट निर्मात्यांनी एकमेकांशी संवाद साधणं महत्त्वाचं असतं, जेणेकरून आपण कसा विचार करतो, कसं काम करतो आणि कोणती तंत्रज्ञानं वापरतो हे समजू शकतं. मला तुमच्या सेटवर यायचं आहे. कधीतरी तुमचं काम प्रत्यक्ष पाहण्याची संधी मला मिळू शकेल का?”
यावर एस. एस. राजामौली यांनी उत्तर दिलं,
“हे आमच्यासाठी खूप मोठा सन्मान असेल, सर. तुम्ही कधीही येऊ शकता. फक्त मी किंवा माझी टीमच नाही, तर संपूर्ण चित्रपटसृष्टी तुमच्या भेटीने आनंदी होईल.”
यानंतर जेम्स कॅमेरॉन म्हणाले,
“यापेक्षा उत्तम काहीच असू शकत नाही. तुम्ही सध्या ही नवी फिल्म ‘वाराणसी’ शूट करत आहात, बरोबर ना?”
राजामौली यांनी उत्तर दिलं,
“होय, सर. जवळपास एक वर्षापासून शूटिंग सुरू आहे आणि अजून सुमारे सात–आठ महिने बाकी आहेत. आम्ही सध्या शूटच्या मधल्या टप्प्यात आहोत.”
यावर हसत जेम्स कॅमेरॉन म्हणाले,
“म्हणजे अजून बराच वेळ आहे. तुम्ही जेव्हा एखादा मजेदार सीन शूट करत असाल, तेव्हा मला नक्की कळवा. कदाचित… एखादा वाघाचा सीन!”
दरम्यान, ‘वाराणसी’मधील पृथ्वीराज सुकुमारन यांचा कुंभा या भूमिकेतील दमदार फर्स्ट लूक आणि प्रियांका चोप्रा जोनस यांचा मंदाकिनी या पात्रातील प्रभावी अवतार आधीच समोर आला आहे. या दोन्ही लूकने सोशल मीडियावर अक्षरशः खळबळ उडवली असून, देशभरात चित्रपटाविषयीची उत्सुकता आणखी वाढवली आहे. आता ही भव्य आणि मोठ्या प्रमाणावर साकारलेली फिल्म 2027 मध्ये चित्रपटगृहात प्रदर्शित होणार असल्याने प्रेक्षकांची उत्सुकता शिगेला पोहोचली आहे.
.png "Videos"){kind=small}
