राज ठाकरेंच्या भेटीनंतर लक्ष्मण उतेकरांनी घेतला महत्वाचा निर्णय, 'छावा'तील तो सीन डिलीट करणार!
सध्या सोशल मीडियावर विकी कौशलच्या ‘छावा’ चित्रपटाची जोरदार चर्चा सुरु आहे. गेल्या काही दिवसांपूर्वी चित्रपटाचा ट्रेलर रिलीज झाला आणि ट्रेलरमधले अनेक मुद्दे चर्चेत आले. ट्रेलरमधल्या संभाजी महाराजांच्या नृत्यावर वेगवेगळ्या क्षेत्रातून प्रतिक्रिया येत आहे. मुख्य बाब म्हणजे, त्या नृत्यावर शिवप्रेमींनीही नाराजी व्यक्त केली आहे. त्यावर राज्य सरकारनेही आक्षेप घेतला होता. अखेर आता या चित्रपटातील हा वादग्रस्त भाग काढून टाकण्यात आला आहे. याच पार्श्वभूमीवर चित्रपटाचे दिग्दर्शक लक्ष्मण उतेकर यांनी मनसे अध्यक्ष राज ठाकरे यांची भेट घेतली. ‘छावा’चित्रपटाविषयी राज ठाकरेंशी चर्चा केल्यावर लक्ष्मण उतेकरांनी माध्यमांशी संवाद साधला.
येत्या १४ फेब्रुवारीला विकी कौशल अभिनित ‘छावा’ चित्रपट रिलीज होणार आहे. प्रदर्शनाच्या आधीच चित्रपट वादाच्या भोवऱ्यात अडकल्यामुळे दिग्दर्शकांनी ‘शिवतीर्थ’चे दरवाजे ठोठावलेय. ‘छावा’ चित्रपटावरुन निर्माण झालेल्या कॉन्ट्रोवर्सीवर तोडगा काढण्यासाठी दिग्दर्शकांनी राज ठाकरेंची भेट घेण्याचा निर्णय घेतल्याची माहिती मिळत आहे. चित्रपटाबाबत राज ठाकरेंशी चर्चा केल्यावर माध्यमांशी संवाद साधताना लक्ष्मण उतेकर म्हणाले की, “राज ठाकरे यांचे वेगवेगळ्या विषयांमध्ये वाचन खूप आहे. विशेषत: राज ठाकरे यांनी महाराजांसंबंधित मोठ्या प्रमाणावर पुस्तकांचे वाचन केले आहेत. त्यामुळे त्यांच्यासोबत बोलत असताना मला चित्रपटात नेमके काय बदल करायला हवे, याबद्दल खूप माहिती मिळाली आहे. चित्रपटातील बदलांबद्दल मी त्यांच्याकडून माहिती घेतली असून त्यांनी मला या चर्चेतून काही सूचनाही केल्या आहेत. त्यांनी मला चांगल्या प्रकारे मार्गदर्शन केले.”
चित्रपटातले काही सीन डिलिट होणार का? याबद्दल विचारलं असता लक्ष्मण उतेकर म्हणाले, “महाराज लेझीम खेळतानाच्या सीनवरुन सध्या वाद सुरू आहे, तो आम्ही डिलीट करणार आहोत. राज साहेबांनीही मला तोच सल्ला दिला. यामागे कुणाच्याही भावना दुखावण्याचा आमचा हेतू नव्हता. पण, जर त्याच्यामुळे अप्रत्यक्षपणे कोणाच्या भावना दुखावणार असतील, तर ती दृष्य नक्की डिलीट करणार. कारण, तो सीन चित्रपटाचा मोठा भाग नाहीये… त्यामुळे तो नक्कीच डिलीट करणार. चित्रपटाची टीम यावर गेली चार वर्ष रिसर्च करतेय. हा सिनेमा बनवण्यामागचा उद्देश एकच होता की, छत्रपती संभाजी महाराज काय होते? हे संपूर्ण जगाला कळावं, ती व्यक्ती काय होती, किती प्रचंड मोठा योद्धा होता, राजा होता… हे संपूर्ण जगाला कळावं, पण एखाद, दोन गोष्टी जर त्याला गालबोट लावत असतील, तर त्या डिलीट करायला आम्हाला काही हरकत नाही.”
दरम्यान, ‘छावा’ चित्रपट येत्या १४ फेब्रुवारीला प्रेक्षकांच्या भेटीला येणार आहे. यामध्ये बॉलीवूड अभिनेता विकी कौशलसह दाक्षिणात्य अभिनेत्री रश्मिका मंदान्ना, अभिनेता अक्षय खन्ना असे कलाकार झळकणार आहेत. चित्रपटात सुव्रत जोशी, शुभंकर एकबोटे, संतोष जुवेकर असे मराठी कलाकार देखील झळकले आहेत.
.png "Videos"){kind=small}
