(फोटो सौजन्य- इन्स्टाग्राम)
मनोरंजनसृष्टीतील दमदार अभिनेता देवदत्त नागे आपल्या प्रभावी भूमिकांसोबतच त्याच्या फिटनेससाठीही ओळखला जातो. मात्र स्वतः फिटनेसकडे लक्ष देताना त्याला प्रेरणा मिळते ती त्याचा जिवलग मित्र, लोकप्रिय अभिनेता कुशल बद्रिके याच्याकडून. देवदत्त नागे आणि कुशल बद्रिके यांच्या मैत्रीची आणि फिटनेसबद्दलच्या बांधिलकीची सध्या चांगलीच चर्चा सुरू आहे. अभिनयासोबतच फिटनेसकडेही लक्ष देणाऱ्या या दोघा कलाकारांची मैत्री आणि एकमेकांना दिलेले प्रोत्साहन चाहत्यांमध्येही चर्चेचा विषय ठरत आहे.
मित्रांकडून मिळणारी प्रेरणा आयुष्याला नवी ऊर्जा देणारी ठरते. अभिनेता देवदत्त नागे यांच्यासाठी फिटनेसच्या बाबतीत कुशल बद्रिके खऱ्या अर्थाने ‘रोल मॉडेल’ असल्याचे त्यांनी सांगितले. आगामी ‘घबाडकुंड’ चित्रपटाच्या फर्स्ट लूक लाँचच्या शानदार सोहळ्यात देवदत्त नागे यांनी हा खुलासा केला. शूटिंगदरम्यान घडलेल्या हलक्या-फुलक्या प्रसंगांमुळे वातावरण नेहमीच आनंदी आणि उत्साही राहिले, असे त्याने सांगितले. त्याच्या मते, कुशल बद्रिके हा त्याचा फिटनेससाठी रोल मॉडेल असून, दोघांची ही मैत्री आणि परस्पर प्रोत्साहन चाहत्यांसाठीही प्रेरणादायी ठरत आहे.
शूटिंगदरम्यान सहकलाकारांसोबत घडलेल्या विविध आठवणींना उजाळा देताना त्यांनी सेटवरील धमाल, मस्ती आणि गमती-जमतींचा उल्लेख केला. पहाटे दिव्याच्या प्रकाशात कुशलसोबत केलेला व्यायाम, त्यानंतरचा फक्कड गुळाचा चहा आणि चमचमीत मॅगी या सगळ्या खास क्षणांची रंगतदार कहाणी सांगताना देवदत्तने कुशलला ‘माझा फिटनेस आयडॉल’ हा किताब देत त्याची फिरकी घेतली. यावर कुशलनेही तितक्याच विनोदी अंदाजात प्रतिसाद देत, ‘हा व्हिडिओ सगळीकडे नक्की टॅग करा!’ असं आव्हान दिलं. कुशल बद्रिके तसेच संदीप पाठक यांच्यासोबतची ही भावनिक आणि अविस्मरणीय सफर कायम स्मरणात राहील, असं सांगत देवदत्त नागेने यावेळी सर्वांचे मनापासून आभार मानले.‘घबाडकुंड’ चित्रपटातील रहस्याचा पडदा उघडण्यासाठी आम्ही सज्ज आहोत असं त्यांनी म्हटलं आहे.
‘कुलस्वामिनी भैरी भवानी’ चैत्र नवरात्रोत्सवाला सुरुवात; Shelar Mama Foundationतर्फे भक्तिमय जागर, भक्तांची मोठी गर्दी
दिग्दर्शक प्रीतम एस. के. पाटील, आणि निर्माते रसिक कदम यांनी सस्पेन्स थ्रिलर जॉनरमधील एक दमदार चित्रपट प्रेक्षकांसमोर आणला आहे. अॅक्शन, विनोद आणि रहस्य यांचा समतोल असलेला मराठीतील पहिला युनिव्हर्स चित्रपट ‘घबाडकुंड’ १९ जून रोजी प्रेक्षकांच्या भेटीला येणार आहे. हा चित्रपट प्रेक्षकांना वेगळा अनुभव देणारा असून, मराठी सिनेसृष्टीत नवीन संकल्पना घेऊन येत आहे.
