(फोटो सौजन्य - सोशल मीडिया)
वाघ्या-मुरळीच्या पारंपरिक लोकसंस्कृतीवर आधारित कथा मांडणाऱ्या ‘फुला’ या चित्रपटाचा दमदार टीझर नुकताच प्रदर्शित करण्यात आला आहे. या टीझरमध्ये सुबोध भावे यांच्या दमदार आणि प्रभावी आवाजामुळे एक वेगळंच वातावरण निर्माण होताना दिसले आहे. १७ एप्रिल रोजी प्रदर्शित होणाऱ्या या चित्रपटाने टीझरपासूनच प्रेक्षकांची उत्सुकता चांगलीच वाढवली आहे. विशेष म्हणजे आटपाडीतील काही तरुणांनी एकत्र येऊन साकारलेला हा वेगळ्या धाटणीचा चित्रपट असल्यामुळे त्याबद्दल अधिकच कुतूहल निर्माण झाले आहे.
“फुला” या चित्रपटाची निर्मिती पैलवान अजित शिवजी जाधव यांनी केली असून, शिवशर्विल चित्रपट आणि बोधी सिनेमा यांनी चित्रपटाची प्रस्तुती केली आहे. चित्रपटाची कथा आणि दिग्दर्शन अभिषेक जावीर यांचे असून पटकथा रविकिरण जावीर यांनी लिहिली आहे. संगीत दिग्दर्शन समाधान ऐवाले यांनी केले असून सर्जनशील दिग्दर्शन अमर देवकर यांनी सांभाळली आहे. छायांकन प्रताप जोशी यांचे तर संकलन राहुल प्रजापती यांनी केले आहे. निर्मिती रचना अतुल लोखंडे यांनी केली आहे.
चित्रपटातील गाण्यांना वैशाली सामंत, वैशाली माडे, रोहित राऊत, रवींद्र खोमणे, वैशाली कुलकर्णी, वैष्णवी आदोडे आणि आकाश नवगिरे यांनी आवाज दिला आहे. तसेच नृत्य दिग्दर्शन आशुतोष कीर्तिकर आणि सृष्टी जाधव यांचे आहे. वेशभूषा कोमल जवीर आणि अक्षता पाटील यांनी सांभाळली असून रंगभूषा समाधान भोरे यांनी केली आहे.
“फुला” ही एका मुरळीच्या पोटी जन्मलेल्या निरागस मुलीची संघर्षमय कथा आहे. तमाशा फड, जागरण-गोंधळ यांसारख्या पारंपरिक सांस्कृतिक पार्श्वभूमीवर उभी राहणारी ही कथा महाराष्ट्राच्या समृद्ध लोकपरंपरेतून आकार घेताना दिसते. टीझरमधील साखळदंडाने बांधलेली, जमिनीवर आडवी पडलेली आणि आजूबाजूला हळद विखुरलेली दृश्यरचना प्रेक्षकांना विचार करायला भाग पाडते.
विशेष म्हणजे सुबोध भावे यांच्या आवाजात उच्चारलेल्या “यत्र नार्यस्तु पूज्यन्ते, रमन्ते तत्र देवता” या संस्कृत ओळींनी टीझरची सुरुवात होते आणि पुढील दृश्यांमधून चित्रपटाचा गंभीर आणि प्रभावी आशय स्पष्ट होत जातो. एका मुलीच्या अस्तित्वावर समाजाने उभे केलेले प्रश्न आणि तिचा संघर्ष या चित्रपटातून प्रभावीपणे मांडला जाणार आहे. टीझरमधील देखण्या दृश्यप्रतिमा, प्रभावी पार्श्वसंगीत आणि दमदार सादरीकरणामुळे ‘फुला’ या चित्रपटाने प्रदर्शित होण्यापूर्वीच प्रेक्षकांच्या मनात खास स्थान निर्माण केले आहे. त्यामुळे १७ एप्रिल रोजी प्रदर्शित होणाऱ्या या चित्रपटाकडून प्रेक्षकांच्या अपेक्षा मोठ्या प्रमाणात वाढल्या आहेत.
.png "Videos"){kind=small}
