‘तारक मेहता का उल्टा चष्मा’ (Taarak Mehta Ka Ooltah Chashmah) या प्रसिद्ध मालिकेला प्रेक्षकांची विशेष पसंती मिळाली. गेली कित्येक वर्ष ही मालिका प्रेक्षकांचं मनोरंजन करत आहे. आता या मालिकेचे निर्माते असित मोदी (Asit Modi) एका वेगळ्या कारणामुळे चर्चेत आले आहेत.
‘तारक मेहता का उल्टा चष्मा’ या मालिकेत रोशन सिंह सोढी ही भूमिका साकारणारी अभिनेत्री जेनिफर मिस्त्री बंसीवालनं (Jennifer Mistry Bansiwal) असित मोदी आणि मालिकेच्या टीममधील अन्य दोन व्यक्तींवर गंभीर आरोप केले आहेत. अभिनेत्री जेनिफर मिस्त्री बंसीवालनं असित मोदी, ‘तारक मेहता का उल्टा चष्मा’ मालिकेचे प्रोजेक्ट हेड सोहिल रमानी आणि एक्झिक्युटिव्ह प्रोड्यूसर जतिन बजाज यांच्यावर लैंगिक छळाचा (Sexual harassment) आरोप केला आहे.
लैंगिक छळाचा आरोप करत गुन्हा दाखल
मिळालेल्या माहितीनुसार, जेनिफरने असित मोदीवर केवळ लैंगिक छळाचा आरोप करत गुन्हा दाखल केला आहे. असित मोदींशिवाय जेनिफरने प्रोजेक्ट हेड सोहिल रमाणी आणि कार्यकारी निर्माते जतिन बजाज यांच्यावरही गुन्हा दाखल केला आहे. जेनिफर ही गेल्या 2 महिन्यांपासून ‘तारक मेहता का उल्टा चष्मा’ या मालिकेचे शूटिंग करत नव्हती. तिनं 6 मार्चपर्यंत शूटिंग केले.
एका मुलाखतीमध्ये जेनिफरनं सांगितलं, “होय, मी शो सोडला आहे. मी माझा शेवटचा एपिसोड 6 मार्च रोजी शूट केला. सोहिल आणि जतीन यांच्याकडून माझा अपमान झाल्यामुळे मला शो सोडावा लागला.”
पुढे जेनिफरनं सांगितलं,“मी त्यांना सांगितलं की मी 15 वर्षे काम केले आहे आणि तुम्ही मला जबरदस्तीने थांबवू शकत नाही. मी निघताना सोहिल मला धमकावत होता. मी असित मोदी, सोहिल रमानी आणि जतिन बजाज यांच्याविरुद्ध लैंगिक छळाचा गुन्हा दाखल केला आहे.”
प्रोडक्शन हेडने फेटाळले आरोप
दरम्यान ‘तारक मेहता का उल्टा चष्मा’ या मालिकेचे प्रोडक्शन हेड सोहिल रमानी यांनी जेनिफर मिस्त्री बंसीवालानं केलेले आरोप फेटाळले आहेत. ते म्हणाले, “हा फक्त पब्लिसिटी स्टंट आहे. असा छळ होत असेल तर तिनं आधी ऑथोरिटीजकडे जायला पाहिजे होतं. आमच्या प्रॉडक्शन हाऊसमध्ये महिलांशी संबंधित सर्व समस्यांसाठी एक समिती आहे. ती तिथे तक्रार करू शकली असती. आम्ही सर्व आरोपांना कायदेशीर पद्धतीने उत्तर देऊ. हा केवळ आमची, आमच्या शोची आणि आमच्या प्रॉडक्शन हाऊसची बदनामी करण्याचा डाव आहे.”
