शुक्रवार, 14 ऑगस्ट 2026
भारतात लवकरच सणासुदीचा काळ सुरू होत असल्याने सर्वच प्रमुख वाहन उत्पादक कंपन्या ग्राहकांना आकर्षित करण्यासाठी सज्ज झाल्या आहेत. आगामी २-३ महिन्यांत अनेक नवीन गाड्या बाजारात धडकणार असून, एकट्या सप्टेंबर महिन्यापर्यंत ६ नवीन कार मॉडेल्स भारतीय शोरुम्समध्ये उपलब्ध होतील. यामध्ये SUV, हॅचबॅक आणि सेडान अशा ग्राहकांच्या पसंतीस उतरणाऱ्या सर्व प्रकारच्या बॉडी स्टाईल्स आणि विविध इंजिन पर्यायांचा समावेश असणार आहे.
महिंद्रा कंपनी १५ ऑगस्ट रोजी आपल्या प्रसिद्ध BE 6 या इलेक्ट्रिक कारचे नवीन 'Sporteq' व्हेरियंट सादर करणार आहे. या नवीन ट्रिममध्ये triple-screen सेटअप दिला जाईल, जो Mahindra XEV 9S आणि XEV 9e मध्ये पाहायला मिळतो. केबिनमध्ये डॅशबोर्ड आणि सेंटर कन्सोलला जोडणारा भाग काढून टाकल्यामुळे युजर्सना अधिक स्टोरेज स्पेस मिळेल. याशिवाय यात आकर्षक 'ब्लॅक अँड टॅन' ड्युअल-टोन कलर स्कीम देखील देण्यात येणार आहे.
स्कोडा आपली लोकप्रिय सेडान स्कोडा स्लाव्हिया १८ ऑगस्ट रोजी नवीन फेसलिफ्ट अवतारात लाँच करणार आहे. या कारमध्ये नवीन डिझाइनचे बंपर, ग्रिल, हेडलाइट्स, टेललाइट्स आणि १६-इंचाचे नवीन अलॉय व्हील्स मिळतील. केबिनमध्ये १०.२५-इंचाचा डिजिटल इन्स्ट्रुमेंट क्लस्टर आणि फ्रंट पार्किंग सेन्सर्स दिले जातील. विशेष म्हणजे, या सेगमेंटमध्ये पहिल्यांदाच ८-स्पीड ऑटोमॅटिक ट्रान्समिशन आणि मागील सीटसाठी मसाज फंक्शन यांसारखे हाय-टेक फीचर्स या गाडीत दिले जाण्याची दाट शक्यता आहे.
जेएसडब्ल्यू एमजी मोटार २६ ऑगस्ट रोजी एमजी हेक्टर टोमाहॉक ही नवीन ३-रो SUV लाँच करणार आहे. ही कार एमजी हेक्टर प्लसच्या वर पोझिशन केली जाईल आणि सुरुवातीला ती पूर्णपणे इलेक्ट्रिक (EV) अवतारात बाजारात येईल, जी थेट Mahindra XEV 9S ला टक्कर देईल. लाँचिंगच्या काही महिन्यांनंतर कंपनी या मॉडेलमध्ये 'प्लग-इन हायब्रिड' (PHEV) इंजिनचा पर्यायही जोडणार आहे.
किआ ४ सप्टेंबर रोजी भारतात आपली पहिली हायब्रिड कार किआ सोरेंटो हायब्रिड लाँच करणार आहे. दक्षिण कोरियातून सुटे भाग आणून भारतात ही कार असेंबल केली जाणार असल्याने तिची किंमत अत्यंत वाजवी आणि स्पर्धात्मक ठेवली जाईल. भारतीय बाजारात या प्रीमियम D-सेगमेंट SUV ची थेट स्पर्धा Skoda Kodiaq, VW Tayron आणि Toyota Fortuner सारख्या दिग्गज गाड्यांशी असेल.
मारुती सुझुकी सप्टेंबरच्या पहिल्या आठवड्यात आपली लोकप्रिय मारुती बलेनो फेसलिफ्ट लाँच करणार आहे. या नवीन मॉडेलमध्ये रिवाइज्ड बंपर, क्रोम स्लॅट ग्रिल आणि नवीन सीट अपहोल्स्ट्री यांसारखे कॉस्मॅटिक बदल पाहायला मिळतील. सर्वात महत्त्वाचे म्हणजे, या नव्या बलेनोमध्ये मारुतीचे नवीन १.२-लीटर ३-सिलेंडर सिरिज-हायब्रिड इंजिन मिळण्याची शक्यता वर्तवली जात आहे, जे तब्बल ३५ किमी/लीटर चे प्रचंड मायलेज देईल.
सप्टेंबरच्या शेवटी ह्युंदाई आपली सेकंड-जनरेशन ह्युंदाई बेयॉन भारतात लाँच करण्याची शक्यता आहे. ही कार क्रेटाच्या खाली पोझिशन केली जाईल आणि ती थेट मारुती सुझुकी फ्रॉन्क्स (Maruti Fronx) ला टक्कर देईल. तरुणांना आवडेल असा स्पोर्टी लुक असणारी ही कार लाँच झाल्यानंतर कंपनी लगेचच हिचा CNG व्हेरियंट सुद्धा बाजारात आणण्याच्या तयारीत आहे.
