Amit Shah : हिम्मत असेल तर संसदेत येऊन चर्चा करा; अमित शाहांचे राहुल गांधींना थेट आव्हान

Amit Shah : हरियाणातील करनाल येथे अमित शाह यांनी राहुल गांधींना संसदेत चर्चेचे थेट आव्हान दिले. एसआयआर प्रक्रियेवर चर्चेसाठी विशेष अधिवेशन बोलवण्याची तयारी असल्याचेही त्यांनी सांगितले.

• राहुल गांधी पराभवाने बिथरल्याची टीका
• संसदेच्या विशेष अधिवेशनात चर्चेस तयार
• घुसखोरांना शोधून देशाबाहेर काढणार

 

केंद्रीय गृहमंत्री अमित शाह (Amit Shah) यांनी गुरुवारी हरियाणातील करनाल येथे काँग्रेस आणि राहुल गांधी यांच्यावर जोरदार हल्लाबोल केला. भाजपच्या ‘लोकशाही वाचवा, अराजकता हटवा’ पदयात्रेच्या समारोपप्रसंगी त्यांनी राहुल गांधी (Rahul Gandhi) यांना थेट आव्हान दिले. संसदेत चर्चा करण्याऐवजी गोंधळ आणि बहिष्काराचे राजकारण केले जात असल्याचा आरोप त्यांनी केला. तसेच, एसआयआर प्रक्रियेवर चर्चा करण्यासाठी संसदेचे विशेष अधिवेशन बोलावण्यास भाजप तयार असल्याचेही त्यांनी स्पष्ट केले.

राहुल गांधी पराभवाने बिथरले

अमित शाह म्हणाले की, 22 ऑक्टोबर ते 5 नोव्हेंबर या कालावधीत देशभरातील भाजपच्या प्रमुख कार्यालयांमध्ये ‘लोकशाही वाचवा, अराजकता हटवा’ अभियान राबवण्यात आले. या अभियानाला देशभरातून मोठा प्रतिसाद मिळाला.

2024 मध्ये नरेंद्र मोदी सलग तिसऱ्यांदा पंतप्रधान झाले. त्यानंतर झालेल्या विविध निवडणुकांमध्ये काँग्रेसला पराभवाचा सामना करावा लागला. हरियाणा आणि महाराष्ट्रात काँग्रेसचा पराभव झाला, तर दिल्ली, आसाम आणि इतर ठिकाणी भाजपने विजय मिळवला, असा दावा शाह यांनी केला.

राहुल गांधी पराभवाचे खापर निवडणूक आयोगावर फोडत असल्याची टीकाही त्यांनी केली. 2014, 2019 आणि 2024 च्या निवडणुकांमध्येही काँग्रेसला पराभव स्वीकारावा लागला. त्या वेळी एसआयआर प्रक्रिया नव्हती, मग पराभवाचे कारण काय, असा सवाल त्यांनी उपस्थित केला.

संसदेच्या विशेष अधिवेशनात चर्चेस तयार

लोकशाहीमध्ये संसद हे चर्चेचे सर्वोच्च व्यासपीठ आहे. मात्र, राहुल गांधी संसद चालू देत नाहीत. महत्त्वाच्या विषयांवर चर्चा करण्याऐवजी गोंधळ आणि बहिष्काराचे राजकारण केले जाते, असा आरोप अमित शाह यांनी केला.

ते म्हणाले, राहुल गांधींना चर्चेची एवढीच इच्छा असेल, तर त्यांनी पंतप्रधान नरेंद्र मोदी यांना पत्र लिहावे. एसआयआर प्रक्रियेवर चर्चा करण्यासाठी आम्ही संसदेचे विशेष अधिवेशनात चर्चेस तयार आहोत. रस्त्यावर चर्चा करण्याची इच्छा असल्यास हरियाणातील कोणतेही ठिकाण निश्चित करावे. भाजप युवा मोर्चाचे अध्यक्ष चर्चेसाठी येतील, असे आव्हानही शाह यांनी दिले.

Kolhapur Gokul Politics : ‘गोकुळ’ वरून राजकारण तापलं! गोकुळमध्ये चार संचालक का नेमले? फडणवीसांनी अखेर सांगितलं कारण

घुसखोरांना शोधून देशाबाहेर काढणार

एसआयआर प्रक्रियेला काँग्रेस विरोध करत असल्याचा आरोप करत अमित शाह यांनी घुसखोरांच्या मुद्द्यावरही भाष्य केले. काँग्रेसची रॅली मतदारांचे मत वाचवण्यासाठी नसून घुसखोरांना वाचवण्यासाठी असल्याची टीका त्यांनी केली.

भाजप घुसखोरांना शोधून त्यांची नावे मतदार यादीतून वगळेल आणि त्यानंतर त्यांना देशाबाहेर काढण्याची कारवाई करेल, असा निर्धारही त्यांनी व्यक्त केला.

Kolhapur Gokul Politics : वोट चोरीनंतर आता सत्ता चोरी; गोकुळवरून सतेज पाटलांचा सरकारवर घणाघात

राहुल गांधींच्या नेतृत्वावरही निशाणा

अमित शाह यांनी राहुल गांधी यांच्या राजकीय कारकिर्दीवरही प्रश्न उपस्थित केले. 2007 मध्ये राहुल गांधी काँग्रेसचे सरचिटणीस झाले, तेव्हा पक्षाकडे 1200 आमदार होते. त्यानंतर ते उपाध्यक्ष आणि अध्यक्ष झाल्यानंतर आमदारांची संख्या कमी होत गेली, असा दावा शाह यांनी केला.

राहुल गांधी यांच्या नेतृत्वाखाली काँग्रेसची राजकीय ताकद कमी होत असल्याचा आरोप करताना, पंतप्रधान नरेंद्र मोदी यांच्या नेतृत्वाखाली भाजपचे आमदार आणि खासदार वाढत असल्याचेही ते म्हणाले.