Bihar Elections 2025 : बिहार निवडणुकीत येणार रंगत; महागठबंधन आणि एनडीएमध्ये थेट लढत, अनेक दिग्गजांची प्रतिष्ठा पणाला… :

राष्ट्रीय जनता दल (आरजेडी), काँग्रेस आणि इतर विरोधी पक्षांचा समावेश असलेल्या इंडिया आघाडीचे उद्दिष्ट एनडीएला सत्तेतून बाहेर काढण्याचे आहे.

नवी दिल्ली : बिहार विधानसभा निवडणुकीच्या तारखा निवडणूक आयोगाने सोमवारी (दि.६) जाहीर केल्या. मुख्य निवडणूक आयुक्त ज्ञानेश कुमार यांनी राज्यातील निवडणुका दोन टप्प्यात होतील असे म्हटले आहे. पहिला टप्पा ६ नोव्हेंबर आणि दुसरा टप्पा ११ नोव्हेंबरला होणार आहे. तर मतमोजणी आणि निकालांची घोषणा १४ नोव्हेंबर रोजी होईल. या घोषणेसह, बिहारच्या राजकारणात निवडणुकीचा बिगूल वाजला आहे. त्यानंतर बिहारच्या राजकारणात आता रंगत येणार आहे.

राज्यात सत्ताधारी राष्ट्रीय लोकशाही आघाडी (एनडीए) आणि विरोधी ‘इंडिया’ आघाडी यांच्यात थेट लढाई होणार आहे. जनता दल (संयुक्त) अध्यक्ष आणि मुख्यमंत्री नितीश कुमार यांच्या नेतृत्वाखालील एनडीए दुसऱ्या टर्मची आशा बाळगत असताना, राष्ट्रीय जनता दल (आरजेडी), काँग्रेस आणि इतर विरोधी पक्षांचा समावेश असलेल्या इंडिया आघाडीचे उद्दिष्ट एनडीएला सत्तेतून बाहेर काढण्याचे आहे. निवडणूक समीकरणातील तिसरी शक्ती म्हणून प्रशांत किशोर यांच्या जन सूरज पक्षानेही सर्व २४३ जागा लढवण्याचे जाहीर केले आहे, ज्यामुळे ही स्पर्धा आणखी मनोरंजक बनली आहे.

हेदेखील वाचा : Bihar Election 2025: बिहारमध्ये आजपासून आचार संहिता लागू; कोणत्या कामांवर बंदी? उल्लंघन केल्यास…

दरम्यान, महाआघाडीने राजद नेते तेजस्वी यादव यांना मुख्यमंत्रिपदाचे उमेदवार म्हणून घोषित केले आहे. निवडणुकीपूर्वी विरोधकांनी मतदार यादीतील कथित अनियमितता आणि ‘मत चोरी’ या मुद्द्याचा वापर प्रमुख निवडणूक शस्त्र म्हणून केला आहे. काँग्रेस आणि राजद यांनी संयुक्तपणे ‘मतदार हक्क यात्रा’ सुरू केली, ज्यामध्ये राहुल गांधी आणि तेजस्वी यादव यांनी राज्यभर प्रवास केला, निवडणूक आयोगावर भाजपला फायदा मिळवून देण्यासाठी मतदार यादीत फेरफार केल्याचा आरोप केला.

तेजस्वी यादव यांनीही काढली यात्रा

यानंतर, तेजस्वी यादव यांनी स्वतःची वेगळी ‘बिहार अधिकार यात्रा’ सुरू केली, ज्यामध्ये त्यांनी बेरोजगारी आणि वाढत्या गुन्हेगारीसारख्या मुद्द्यांवरून नितीश कुमार सरकारवर निशाणा साधला. या यात्रेत मागील यात्रेतून वगळण्यात आलेले जिल्हे देखील समाविष्ट होते.

महागठबंधनात जागावाटपावरून एकमत नाही

जागावाटपावर महागठबगंधनात अद्याप एकमत झालेले नाही. २०२० मध्ये, राजदने १४४ जागा लढवल्या आणि ७५ जागा जिंकल्या. काँग्रेसने ७० पैकी १९ जागा जिंकल्या, तर डाव्या पक्षांनी चांगली कामगिरी केली. सीपीआय-एमएलने १९ पैकी १२ जागा जिंकल्या, सीपीएमने ४ पैकी २ आणि सीपीआयने ६ पैकी २ जागा जिंकल्या होत्या. त्यामुळे या निवडणुकीकडे सर्वांचे डोळे लागले आहेत.

हेदेखील वाचा : Bihar Politics : भाजपसह जेडीयू, राजदची डोकेदुखी आणखी वाढणार? नवा पक्ष बिहारच्या राजकारणात