Manoj Jarange Patil
बावनकुळे यांच्यावर जात प्रमाणपत्रांबाबत गंभीर आरोप
मराठा मंत्र्यांनाही भूमिका स्पष्ट करण्याचे आव्हान
२९ ऑगस्टच्या आंदोलनाबाबत निर्णायक इशारा
छत्रपती संभाजीनगर: मराठा आरक्षणाच्या मुद्द्यावर पुन्हा एकदा वातावरण तापले असून मराठा आंदोलक मनोज जरांगे पाटील यांनी महसूल मंत्री चंद्रशेखर बावनकुळे यांच्यावर गंभीर आरोप केले आहेत. मराठा समाजाची जात प्रमाणपत्रे रद्द करण्यामागे बावनकुळे यांचा हस्तक्षेप असल्याचा दावा करत त्यांनी सरकार आणि मराठा मंत्र्यांवरही जोरदार टीका केली.
जरांगे म्हणाले की, मराठा समाजाच्या जात प्रमाणपत्रांच्या प्रश्नावर मराठा मंत्र्यांनी स्पष्ट भूमिका घ्यावी. “बावनकुळे यांनी केलेली चूक आम्ही दुरुस्त करू,” असे त्यांनी जाहीरपणे सांगावे, असे आव्हान त्यांनी दिले. तसेच सरकार मराठा समाजामध्ये गैरसमज निर्माण करण्याचा प्रयत्न करत असल्याचाही आरोप त्यांनी केला.
यावेळी त्यांनी असा दावाही केला की, जात प्रमाणपत्रांबाबतचे एक पत्र बावनकुळे यांच्या कार्यालयातूनच आपल्या हाती लागले आहे. संबंधित व्यक्तींची नावे आपण योग्य वेळी जाहीर करू, असेही त्यांनी सांगितले. या आरोपांबाबत मात्र सरकारकडून अधिकृत प्रतिक्रिया समोर आलेली नाही.
‘हाथी चले बाजार, कुत्ते भौंके हजार’; लक्ष्मण हाकेंच्या इशाऱ्यावर प्रसाद लाड यांचा जोरदार पलटवार
मनोज जरांगे यांनी पुढे आरोप केला की, मराठा समाजाच्या मागण्यांवर विलंब केला जात असून काही समन्वयक आणि अभ्यासकांच्या माध्यमातून आंदोलन कमकुवत करण्याचा प्रयत्न होत आहे. मात्र मराठा समाज या सर्व गोष्टींना बळी पडणार नाही, असा विश्वास त्यांनी व्यक्त केला.
संजय शिरसाट यांच्यावरही टीका करत त्यांनी मराठा समाजाच्या विश्वासाला तडा गेल्याचा आरोप केला. मराठा समाजाच्या हिताच्या प्रश्नांवर मंत्र्यांनी ठोस भूमिका घ्यावी, अशी मागणी त्यांनी केली.
दरम्यान, २९ ऑगस्टला होणारे आंदोलन हे अंतिम आणि निर्णायक असेल, असा इशारा देत जरांगे यांनी यावेळी मोठी घोषणा केली. मराठा समाजाच्या सर्व प्रलंबित मागण्यांची अंमलबजावणी होईपर्यंत आंदोलन मागे घेतले जाणार नसल्याचे त्यांनी स्पष्ट केले. मराठा आरक्षण आणि जात प्रमाणपत्रांच्या मुद्द्यावर राज्यातील राजकीय वातावरण आणखी तापण्याची चिन्हे असून, आगामी काळात सरकार आणि मराठा आंदोलक यांच्यातील भूमिका काय राहते, याकडे राज्याचे लक्ष लागले आहे.
.png "Videos"){kind=small}
